LEBITIKA 19 - DEENA BAIBÉL (BSI)

Abíd Ayon Delokke Idong Kídíe

¹ Ruutum bí Mosi me poto,

² “Israel banggoem sikepe polangka: Deelangka, kapeila Ruutum noluke Shédí ngo deene.

³ Mipile agíke anem lang abuem airupe míngge langka. Nolu Sabbath em igelangka, ngomino Ruutum noluke Shédíbí.

⁴ Mimang kummapeka demangkom arem yokmolok nolu agísukepe mimang pímapeka. Ngomino Ruutum noluke Shédíbí.

⁵ Edílo nolu Ruutum kelo ashéng aman ipagem iyédí delo ipak dem torík subadope ilangka.

⁶ Ipak ido longe delo adínem dolangka demamílo longekon delo doyin langka. Longum nana delo dekedem rompak langka.

⁷ Longum nanalo dekedem donamko kamílo de deemanape iyé delokke deme torík sumayé.

⁸ Sékodí dekem doyéne, bí delokke ajéngem paasuyé, kapeila bí Ruutum kelo binam deena ekurangeme deemamoto. Depeila dekena amiem, agí amikonpe hanyimapeka.

⁹ Edílo nolu aríklo ali-ayéme gatyédí, delo arík lokke kéényung-kéérung ali-ayém gatmapeka, delokke gatruk lokke gadak namem gatta kumapeka.

¹⁰ Noluke ríksénglo gígoo langkula onggur pílagem pílkumapeka. Demangkom oletla doonaem títa kumapeka. Dekeme opan arééna kepe lang mibo-miying kepe mebi langka. Ngomino Ruutum noluke Shédíbí.

¹¹ Pyoomapeka delokke mela-yatla imapeka.

¹² Nolu emmumpe mííla, ngok amínlok pésumapeka, de ngok amínem mínpu-mínléname, ngomino Ruutum noluke Shédíbí.

¹³ Noluke kumrí-donggongem míílum mapeka, demangkom bíkke lok ato rotmapeka. Yébonam lokke areme bimape imapeka. Yoh atel kote bomkap mapeka.

¹⁴ Ruubénem pémapeka demangkom mikmana keralo tupsupenam ato leemapeka. Noluke Shédíme pesolangka. Ngomino Ruutum bí.

¹⁵ Deepítnam agérem ipat sumapeka. Aatí-opanem míípu-mííléla miremem mííbayala imapeka, noluke kumrí-donggongem kamporupe kelíng-kebang ibosulangka.

¹⁶ Ami kídí aralo menam-yatnam agomem pogo bosumapeka. Noluke repe-sinyingke yénam-dagnamem itung-irépeko ségulo itígo mapeka. Ngomino Ruutumbí.

¹⁷ “Noluke bíroem aapí-aanglo míínyila yémapeka. Noluke repe-sinyingke imemem nolute gemín gemadope bulum jonnampe lutor langka.

¹⁸ Edo rayansupe itamapeka demangkom amiem míngki kitímapeka, nolu agísuem kape kísa ayasududí noluke kumrí donggong emte dekepe ayalangka. Ngo mino Ruutum bí.

¹⁹ Ngokke poyil lulígem igelangka. Angu-anguna simon siliem métmín sumo mapeka. Arík atello angu-angupe ina amíeme siyyél sumomapeka. Angu-angupe ina enno lok sumyél sunam egem gemapeka.

²⁰ Akon amike éémépe tomnam delokke repít lenku mangadanam abíl mime konem akone deemang-amo ibosuyémílo, ajéng ipe aido. Idola bínyim mokamapeka, kapeila mimede ruutum sukumang ada.

²¹ Idola amide Ruutum ke Tombu lamgé delo imem amanpe mérko bomalangka.

²² Delo bíkke paab imemnam legape imem aman deloge miride Ruutum ke keralo deebín kunam ipagem ibirodem, bíkke paabem mesam biyé.

²³ Edílo nolu Kanaan amonglo pííyédí, delo nolu siipí-siiyé ilíkyém, deke delokke ayéme toodí tagum loope dormo ayon lok deemanape míílangka. Dekena longelo nolu deke delokke ayéme domapeka.

²⁴ Toodí takpi nanalo siipí-siiyé tabungem ashéng amanpe Ruutum kíng tolík langka.

²⁵ Sok kékon lokke toodí takngo nanalo deke delokke siipí-siiyé kídíem nolu dolado. Sikepe imílo noluke siipí-siiyé kídíde bojémomoyé. Ngomino Ruutum noluke Shédíbí.

²⁶ “Iyyi kana yayina adínem domapeka. Líímé-tagil demangkom jadu-montrong atíem iyil sumapeka.

²⁷ Noluke dumídem dumpongke abe eelenlok ngíbín mapeka, delokke nammídem mojimoma sumapeka.

²⁸ Noluke amíl amoem sina amike legape gatsumapeka demangkom soktampe morí-mojok sumapeka. Ngomino Ruutum bí.

²⁹ “Noluke omem notiipe imola, buluke mikmo-lepang kaimadope imomapeka. Depe imílo nolu abíd uyu kídílo sémat sulík langkula, among si ipum-sikame bojé alooyé.

³⁰ Sabbath longem bomgapla, ngom kumsukuem mííte subom langka. Ngomino Ruutum bí.

³¹ “Nolu sina ami kídí lokke aid kídíem íngkí-tatkína kídílo poyil kosupe gímapeka. Kapeila bulu kelok nolu deemang iketsuyé. Ngomino Ruutum noluke Shédíbí.

³² Mijing eejo keralo darep bila, abu mineme airupe míílangka, delokke noluke Shédíme airupe míílangka. Ngomino Ruutum bí.

³³ Noluke amonglo mibo-miyingpe yénem nolu ipusiléémapeka.

³⁴ Dekena mibo-miying amiem agí kísape ségu-siange iríklangka. Nolu agíke kísape bulum ayang bosulangka. Kapeila nolukom Ijipt amonglo mibo-miyingpe yétuai. Ngomino Ruutum noluke Shédí bí.

³⁵ Nolu bodong-andeng rungkolo, essa-tebeg bekkílo, anyo-bojé rungkolo yadmapeka.

³⁶ Nolu jonnampe runanalok, jonnampe kínanalok, jonna Ephah delokke jonna Hin lok ilangka. Ijipt among lok nolum laalenkuna, Ruutum noluke Shédíbí ngomin.

³⁷ Nolu ngokke lulígnamem igapgela, ngokke ayon tabungem bomgap langka. Ngomino Ruutum bí.”