LEBITIKA 18 - DEENA BAIBÉL (BSI)

Lutumnam Abír-ayoe

¹ Ruutum bí Mosi me poto,

² “Israel kídíem sipe polangka: Ngomino Ruutum noluke Shédíbí.

³ Nolu kerangke duupongko Ijipt ami kídí lokke ségu kísape imapeka demangkom ngokke nolum gíbodungko, Kanaan among sokke ségu-siyang kídí emte igemapeka.

⁴ Nolu ngok ayonem igela, ngok lulígem tallangka. Ngo Ruutum noluke Shédíe.

⁵ Ngokke ayon emlang ngokke lulígem bomyarlangka. Dekedem bomgapnade, deke delok bí turyé. Ngo mino Ruutum bí.

⁶ Sékote agíke edung-eranglo deemang-amo ibo sumapeka. Ngomino Ruutum bí.

⁷ Nokke anelo deemang-amo ibosula nokke abueme annying momapeka, bí nokke ane, bíkkíng deemang agér ibosumapeka.

⁸ Nokke abuke abíd mime kídí lote deemang-amo ibosumapeka. Depe inamde nokke abuke mikmo lepangem atímomayé.

⁹ No agíke bírme kídílo emnamde, nok abuke demangkom aneke, ekumlo onam demangkom luyulo ogonam kídílo deemang-amo ibosumapeka.

¹⁰ No agíke oo lokke omelo demangkom ome lokke oten omelo deemang-amo ibo sumapeka. Depe imílo nokke migmo lepang kayimayé.

¹¹ No agíke abuke abíd mimelok onam omelo, deemang-amo ibo sumapeka, kapeila bíkom nokke bírme.

¹² No agíke abu lokke bírme lo deemang-amo ibosumapeka, kapeila bí nok abuke ranín sue.

¹³ Nokke ane lokke bírmelo deemang-amo ibosumapeka, kapeila bí nok ane lok ranínsue.

¹⁴ Nokke abu lokke bíroke mimem deemang-amo ibosudope aang gememla bík mikmo lepangem nyokmo mapeka, kapeila bíkom nok ane.

¹⁵ Nokke nyamenglo deemang-amo ibosumapeka, kapeila bí nokke oo ménge. Bíkkíng atí deemang kabosumapeka.

¹⁶ Nokke bíroke mimelo deemang-amo ibosumapeka. Depe imílo nokke bíroke mikmo lepange kamayé.

¹⁷ No ona ane delolang bíkke onam ome delo deemang-amo kabosumapeka. Nokke kerape kaarík sunam mime lokke ooke oten omem demangkom bíkke ome lokke oten omelo deemang-amo kabosumapeka. Kapeila dekede nokke iyyilok lenkuna ali pete idupe. De atírumana deemange.

¹⁸ Nokke ménge turdung adape, no yingneme éémépe bomla deemang-amo ibosumapeka.

¹⁹ No deemang-kodang ina mimelo deemang-amo ibosupe aamapeka, kapeila dekena poolo moodílo mimede dormo ayonlok deemang dung.

²⁰ No agíke kumrí lokke mimelo deemang-amo ibosula, agísuem bíkke lok deemang ilík sumapeka.

²¹ No agíke ome-uem Molék uyukíng ilík momapeka. Legade, dekepe imílo nok Shédíke amínem belummoyé. Ngomino Ruutum bí.

²² Mimem ibbo sunam kísa miloko terenglo ibbosula míímem bosumapeka. Depe inamde reyubrupe belumruname.

²³ No agísue tarolo deemang-amo ibosula deemang iket sumapeka. Mimete tarolo deemang amo ibosula agíem deemang iket sumapeka, de miyod ségu agére.

²⁴ Nolu sikena ségu kídí sokke akon emkom imem kímapeka. Kapeila noluke keralo, ngokke monlennam opín kídísi sikena ségulok deemang dung.

²⁵ Buluke sikena ségu kídísi asi-among simteng deemang mokai. Depeila ngo buluke paab legape among sim itung irééla, so duuna ami kídíem abatpe batpak sulen motung.

²⁶ Idola nolu ngokke ayon binam emlang poyil lulígem bomgap langka. Noluke agí olensunam kídíe sikena belum runam agér kídíem ibosumapeka.

²⁷ Sikena deemana ségu agérem, noluke keraso duuna ami kídíe iyinla among siteng bulu kelok deeyimang.

²⁸ Noluke keralo yégena ami kídí sim kape kísa among si abatpe batpak sududí, dekepe nolute deemana ségulok yéla amosim deemang-amo imílo, nolumkom among si abatpe batpakyé.

²⁹ Sikena ségu kídí sokke akon emkom igena miyoodem agí amikonpe hanyimapeka.

³⁰ Ngokke ngiitom lulígnam kídí sim igelangka. Noluke kerape yégena, among sokke ségu-siyang idong kídíem imín gemapeka. Nolu sikena ségu kídí sokke akon emkom igela agísueme deemang momapeka. Ngomino Ruutum noluke Shédíbí.”