LEBITIKA 14 - DEENA BAIBÉL (BSI)

Tííd Kinamlok Deengkut Sukuname

¹ Ruutum bí Mosime poto,

² “Edílo tíídlok kitona amikonem miri keralo aabola deengkut moyékudí, delo sim ayon kídí sim ige bosulangka.

³ Miride notko luyulo gíla kitona dem kangípe aido. Delo tííd lok aidokupe kaayémílo,

⁴ miride kítona ami deme, deena pettang turna annyi kolang sidar esingko, yalína enno lok noyadko delokke hissop esing aagko bomadope lulígpe aiyé.

⁵ Delo miride pettang kondem deena asi kana kiilíng peking kolo petdope lulíg langka.

⁶ Delok rongem bí turna pettang kondemla, sidar esing dem delokke yalína noyad demlang hissop esing aagdem bomla lekope, pettonam pettang iyyi delo jilum líkpe aido.

⁷ Delokrodem tíídlok kitona amidem lemkíníd kokai píkkatpe aiyé delokke deengkaku emla pokanpe aiyé. Depe irodem bí turna pettang dem mítbín kolo mepakpe aiyé.

⁸ “Depe irodem deemo kupenam amide bík ege galugem etbínla, dumídem ngíkutsula asilo irbínsupe aiyé, depe irongem bí dormo ayonlok deeyéku. Sikepe irongkuem bí notko aralo aaladoku. Idola bí longe kínídko agí tombu luyulo duupongkupe aiyé.

⁹ Longe kíníd nana longe delo, bí dumpong dumíd tabungem ngíkutsula, nammíd em, mikmídem delokke bík amíllok abíd amíd kídíem ngíbín supe aido. Delo bí asilo írbinsula, agí ege-galugem etbín supe aido, depe irodem bí deeyéku.

¹⁰ Longe píínyi nana delo, bí atí tarí-tape kamana méro annyi kolang dítak atelna mérneko delokke olib téllok soyél sunam ettílok kilogram angum kolang olib tél lok pua angumko bomalangka.

¹¹ Miride amidem lang aman kídídem Ruutum ke Tombu lamgé delo laaríkpe aiyé.

¹² Delo miride méro kondem lang pua angum olib téldem laala deme imem aman ipak ibipe aido. Deme bí miri legape Ruutum ke keralo gairuna amanpe bipe aido.

¹³ Delokke bí romnam aman kelang paab amanke taroem sobope, deena papom alop delo mérdem sobope pape aido. Bí sikepe ipe aido, kapeila paab amanke kísape si imem aman sikom mirike taronge delokke deenarunge.

¹⁴ Delo miride mér delokke iyyiem bomla tíídlok deemo kupenam ami delokke ruubík ruuballo, lakbík laknelo, delokke lebík lenelo tídlíkpe aido.

¹⁵ Delok rongem miride olib tél ayoko laala bíkke lakké lakpyo delo toolík sula,

¹⁶ bíkke lakbík lokke lakkéng kolok níklumla, lakké lakpyo delokke tél delok amidem lemkínídko Ruutum ke keralo píkkat langka.

¹⁷ Delok rongem bí lakpyo delokke tél delok ayoko laala, mér delokke iyyi ayoko laala dekedem ami delokke ruubík ruuballo, lakbík laknelo delokke lebík lenelo tídkatpe aido.

¹⁸ Delokke bíkke lakpyolo abíd duuna dem, ami delokke dumpong delo mollíkpe aiyé. Sikepe bí deebín kunam ayonlok ipe aido.

¹⁹ “Delo miride paab aman ipagem ila, deemana amidem deemokupe aido. Depe irodem miride romnam aman tarodem pakala,

²⁰ deme ali-ayé amanlo lekope itaksula runggu delo romlíkpe aiyé. Sikepe miride dormo ayonlok deebínkupe aiyé delo amide deeyéku.

²¹ Idola de amide opanla dekedem ila mayémílo, bím ipít sunam imem amanpe, dítak píína méro kolang, olib tél lok hoyél sunam ettíng lok atelko delokke olib tél lok pua angumko ali-ayé amanpe,

²² delok teyong delo pekí annyi mamílo perong annyiko, akonem paab amanpe delokke akonem romnam amanpe bomalangka.

²³ “Bí dekedem longe píínyinana longe delo, bíkke deengkut sugape Ruutum ke Tombu lamgé delo bomalangka.

²⁴ Miride mérdem imem amanpe laarík sula delokke olib tél demte laarík sula Ruutum ke keralo leesak líkla, leesak amanpe ipe aido.

²⁵ “Delo bí mérdem imem aman sobope pala, iyyi ayokonem laala deebín kupenam ami delokke ruubík ruuballo, lakbík laknelo delokke lebík lenelo tídkat líklangka.

²⁶ Depe irongem miride olib tél delok ayoko bík agí lakké lakpyo delo pílík sugeyéla,

²⁷ bíkke lakbík lakkéng delok ami teyong delo Ruutum ke keralo lemkínídko píkkatlíkpe aido.

²⁸ Delok rongem abíd tél delok miríde imem amanke iyyiem kape kísa ami delo ilíktuadi, deke akampe bík ruubík ruuballo, lakbík laknelo delokke lebík lenelo tídkatpe aido.

²⁹ Delok ingong tél kídídem, deebín kupenam ami delokke dumpo delo Ruutum ke keralo deedokupe mollíkpe aido.

³⁰ Depe irodem ami delokke iteng supe, bilasunam pekí annyidem mamílo perong annyidem laala,

³¹ akonem paab imem aman ipakpe delokke akon dem romnam ipakpe ali-ayé aman delo itak sula ilangka. Sikepe deebín kupenam ami delokke ayanpe miride deebín kunam agérem Ruutum ke keralo ilangka.

³² Sike simino tíídem deebín sukunam ayon kídíem ilamínmana opan kídíke tíídlok deebín sudokupe igepenam idong kídíe.”

Tíídlokke Deemang-amo Kakoem Ikutnam Idonge

³³ Ruutum bí Mosi melang Aaron me poto,

³⁴ “Ngokke nolum bomyardope binam Kanaan amonglo noluke pííyém, among delokke ekum kolo, ngokke ilíknam tííd deemang-amoko kaapayém,

³⁵ ekum delokke atode mirilo gíla, ‘Ngok ekumlo tííd lokke deemang-amo kísana atíeke kadung,’ emla pokan supe aido.

³⁶ Delo, ekum delokke ato-siro kídíem deemang poket madope, miri delokke kangípe emla ekum delo aamang adape miride ekum delokke ato-siro tabungem laalen lenyin modope pope aido.

³⁷ Miride suppi kídíem kangíla, suppi kídí delo yayina demangkom yalína akang eke suppi asig dem eeríyape kaayémílo,

³⁸ miride ekum luyupe lendokula, ekum eyab dem longe kíníd kope sittumpe aiyé.

³⁹ Longe kíníd nana longe delo miride ekum dem kangang kupe aiyé. Delo deemang akangde suppi kídílo bojémomo ikamílo,

⁴⁰ miride dekena akang kana suppi elíng kídídem itkalla doolung luyu lokke deemang yoppomlo yoppakdope pope aiyé.

⁴¹ Ekum arang danke suppidem itkal kalyinla, itkal lennam tabung dem doolung luyu lokke deemang yoppomlo joolík líkyinpe aido.

⁴² Delok rongem bulu elíng anílok ilík langkula aní déngkyam lok suppi kídíem molyin líkkupe aiyé.

⁴³ “Idola ekum delokke suppi elíng kídíem itkal lenpala aní elíng ilík langkula, déngkyam molyin rongku emteng tííd deemange lenyé kumílo,

⁴⁴ miride gílangkula deme kangíng kupe aiyé. Deemade ekum delo bojémomo yémílo, de atírumana deemange, iname ekumde arope deemangdung.

⁴⁵ Depe ina ekumdem atpakla, elíng kídíem, esing kídíem delokke déngkyam molnam kídíem doolung luyulo joolen bomla deemang-amo yoppomlo joopakpe aido.

⁴⁶ Ekum deme sitkap dungem ami gíana kayémílo, bí adeng loope deemayé.

⁴⁷ Sékodí dekena ekumlo ipla, dola-tííla iyédí, bí agí ege-galugem etbín supe aiyé.

⁴⁸ “Delokke ekum dem molrong kuem, mirike aala kaayékuem, deemang amo dem kaimadope kaayém, bí ekum dem deengkaku emla pokanpe aiyé, kapeila deemangde nyokkaku.

⁴⁹ Ekum dem deebín kupe, bí sidar esing alopko, nolíng yadnamko delokke hissop esing aag kolang pettang annyiko bompe aiyé.

⁵⁰ Bí pettang kondem asi kana kiilíng peking kolo mokape aiyé.

⁵¹ Depe irodem bí sidar esing alop demlang, nolíng yadnam dem delokke hissop esing aag demlang turna pettangkon deme laala, moka tonam pettangke iyyi delokke asi delo deke dem nípyom geyéla ekum dem lemkíníd kokai píkkatpe aiyé.

⁵² Bí ekum dem sina pettangke iyyi delok, kiilíng pekingke asi delok, turna pettang delok, sidar alop delok, hissop aag delokla nolíng yadnam delok deebínpe aiyé.

⁵³ Depe irongem bí turna pettang dem doolung luyu mítbín kolo mepakpe aiyé. Sikepe bí ekum dem deebín langkula deme deemoyéku.”

⁵⁴ Sike simoko tííd kinamke, bíína tarí-tape lokke, tasut bottena, asig-ayo kinamke,

⁵⁵ ege-galuklo tíídlok deemang akang dakna demangkom ekumlo kana,

⁵⁶ marna abuk demangkom yasina alop,

⁵⁷ dekena atílok, deenam deemang kangu sumonam idong kídíe. Sike simoko tííd taríke, asig-ayolo bukna delokke ege-galug, ekurang momemlo daklíkna legape idong kídíe.