LEBITIKA 11 - DEENA BAIBÉL (BSI)

Dopenam Delokke Dopemanam Taro Kídíe

¹ Ruutum bí Mosi melang Aaron me poto,

² “Israel kídíem sipe polangka: moopílo yéna taro kídí ara lokke sike sim nolu dolado,

³ lepuge apíírupe lebokpe ila delokke dogung guuna taroem dolado.

^4-6 Taro arang lokke ingkuedí lepuk gedola lebok madudí, demangkom dogung guumadí, deke deme domapeka. Uut simonde dogung guuduakom lepuge lebokpe imang. Iname, de dormo ayon lok nolu kepe deemane. Líírenglo yéna piripogo de dogung guduakom, lepuge lebokpe imane, si nolu kepe deemane.

⁷ Éékde lepuge lebokpe iduakom, dogung guumane, iname si nolu kepe deemane.

⁸ Nolu buluke adínem domapeka delokke simang emte ukkí mapeka. Bulu noluke legape deemane.

⁹ “Siyéng kídí lolang korong kídí asilo turla yégoona ato kídí ara lokke méper-lapper genem, tarku kanem, nolu dolado.

¹⁰ Idola siyéng kídí lolang korong kídí asilo turla yégoona kídí aralokke méper-lapper gemana delokke tarku kamana, byanggoona demangkom asi aralo abíd yégoona ato-siro kídíde nolu kepe belumname.

¹¹ Nolu bulume belum rodem, buluke adínem nolu domapeka delokke simang emte belum langka.

¹² Asi aralo méper-lapper delokke tarku kamape yéna ingko ato-siro dakkom, dekede nolu kepe belum pename.

¹³ Sim pettang kídí sim nolu belum langka delokke domapeka, kapeila sikesi belum name: míya, sogum, yakana sogum,

¹⁴ yalína tunsik, yakana tunsik kídí,

¹⁵ atí atípe ina paak kídí.

¹⁶ Areng kísape gena pettun, loyid pettun, siyéng pettang, atí-atípe ina pemí,

¹⁷ tunsik améngona, engo pona, tundang,

¹⁸ yasina pettun, mooruk pettun, kedonla alínge bodongna pejap,

¹⁹ delubore, atí-atípe ina longkurang, lene perok delokke tappon kídíemte.

²⁰ “Takom-taruk arang lokke yopgoola, ale-alag appilok gígoola ina kídíde belum name.

²¹ Idola yopgoola, ale-alag appi lok gígoola ina takom-taruk ayokonem nolu dolado, dekede: ale-alag appi teyolo ale bodona annyiko getemla tíkna kídíe.

²² Sike sokke atí-atípe ina pemírem, turiem, takomem delokke pesi mimum kídíem nolu dolado.

²³ Idola yopgoola, ale-alag appi petomem gena takom-taruk kídíem nolu belum langka.

²⁴ Sike sok nolu deemang-amo ipaasuyé; sékodí buluke simangem ugyéne, bí adeng loope deemayé.

²⁵ Séko buluke ingkona simang oleko bomyédí, bí agí ege galugem etbín supe aido delokke bí adeng loope deemayé.

²⁶ Taro kídí aralokke apíírupe lebogpe imana, lepug gemala demangkom dogung guumanade nolu kepe deemane.

²⁷ Taro kídí ara lokke ale-alag appilok gína aralokke, lakpyo lok gínade, nolu kepe deemane. Sékodí dekena simangem ukkí yédí, bí adeng loope deemayé.

²⁸ Séko dekena simangem bomyédí, bí agíke ege-galugem etbínpe aido delokke bí adeng loope deemangyé. Dekede noluke legape deemane.

²⁹ Amolo dunggona taro kídíde noluke legape deemane, dekede: kírtínabu, kebung, atí-atípe ina sarkot,

³⁰ sisik sarkot, joojing, sipajoonjo, yépol lokke joojing delokke jongkeng kídí.

³¹ Amonglo dunggona taro kídí sokke kísana tabude nolu kepe deemane. Buluke simangem ukkínade adeng loope deemayé.

³² Sike sokke simang kone, esing demangkom ayo demangkom gadum demangkom ingkona agér aana ekurang atílo olet líkyémílo, de ekurang de deemayé. Dekeme asilo jiburuk líklangka; adeng loopede deemangyé delokke kékonlo deeyéku.

³³ Deke delokke simang kone kiilíng peking kolo ua yémílo, peking arangke ato tabude deemayé, depeila deme nolu benpakpe aiyé.

³⁴ Donam-tíínam dopenam kolo dekena peking lokke asie ikatyémílo de deemayé delokke dekena peking lokke asi-alangde deemane.

³⁵ Sike sokke simang olíkko ato de deeyimayé: Ettíng pampom demangkom líísiklo olíkyémílo dem benpakpe aido, kapeila dekede deeyimangkai, delokke deemape míípe aido.

³⁶ Idola sirung demangkom asi mepom kídíde deeyé, idola buluke simangem ukkínade deemayé.

³⁷ Buluke simang konde lepenam ali-ayé teyolo olík yémílo deke dedan deenape duusuyé.

³⁸ Idola ali-ayé deme asi balrongem, dekena simange olík yémílo de nolu kepe deeyimayé.

³⁹ “Noluke dolanam tarode domang adape sipu yémílo delokke dekena simangem ukkí yémílo, adeng loope deemayé.

⁴⁰ Dekena simang adínem donade agíke ege-galugem etbínsupe aido delokke bí adeng loope deemayé. Sékodí dekena simangem bomyéne bí agíke ege-galugem etbín supe aido delokke bí adeng lope deemayé.

⁴¹ Among teyolo dunggona taro aména kídíde belumname delokke dope maname.

⁴² Among teyolo dekepe ale-alag appilok gígola, dunggona demangkom akii lok eggoona demangkom ale-alag bojérupe kala eggoona kídíde belumname, iname dekeme nolu domapeka.

⁴³ Sikena taro kídí akon lokte nolu deemang-amo iket sumapeka. Bulu kelok nolu deemape iko sumapeka demangkom deemang ilík kosupe aimang.

⁴⁴ Ngomino Ruutum noluke Shédíbí. Ngo deene dekepeila nolu agíem dunggona taro kídílok deemang-amo kosumapeka.

⁴⁵ Noluke Shédípe idope, nolum Ijipt among lok laalen kuna Ruutumbí ngomin; Ngo kape kísa deedudí, dekepe nolukom deelangka.

⁴⁶ “Sikesi moko, amonglo yégoona taro kídí takam kelang pettang kídíke delokke asilo turla yégoona ato-siro takamke legape luyilnam ayon kídíe.

⁴⁷ Nolu taro kídí ara lokke deenem lang deemanem, delokke turna ato-siro aralo dopenam emlang dopemanamem kaapansupe aido.”