LEBITIKA 1 - DEENA BAIBÉL (BSI)

Romnam Amane

¹ Ruutum ke dungko Tombu deloge, Mosime Ruutum bí tomala bím poto,

² “Israel kídíem sipe polangka, Ruutum ke keralo noluke akone tarolok aman bomayém, noluke amanpe gooru mamílo mérem demangkom sobén kídílok bomalangka.

³ Romnam amande gooruko iyé mílo, de tarí-tapé kamanape ipe aido. Bí dem Ruutum ke dungko Tombu lamgé delo bomape aido; delo Ruutum bí bíme torík suyé.

⁴ Amide taro delokke dumpo delo, agí alagem pida sulíkpe aiyé, delo bíkke deemangem deebi adumpe tarodem torík suyé.

⁵ Delok rongem bí Ruutum ke keralo rupang dem sobope pape aiyé. Depe irongem Aaron ke miri oo kídíde, delokke iyyiem Ruutum ke keralo bomala, Ruutum ke Tombu lamgé delo duuna runggu delokke abe kídí delo, kuujéng líkpe aiyé.

⁶ Delo bí tarodem ayoem yoopala tarongpe tekpe aiyé.

⁷ Depe idungem Aaronke miri oo kídíde, runggu delo esing-taríem nalíkla emepe parlíkpe aido.

⁸ Delo Aaronke miri oo kídíde, tarongpe teknam kídí demlang, dumpongem delokke unem, runggu delokke emelo romyin líkpe aido.

⁹ Amide akii-asal emlang, ale-alag kídíem asilo arbínla, dem tabudem miride runggu delo romyin líkpe aido. Kapeila de Ruutum ke airupe míínam emelok romlíknam aríkana amane.

¹⁰ “Ami delokke amande mér demangkom sobénpe iyé mílo, dete tarí-tape atí kamana milokong kope ipe aido.

¹¹ Amide taro deme runggu delokke línggí danlo, Ruutum ke keralo sobope pape aiyé. Delok rongem Aaronke miri oo kídíde, delokke iyyiem runggu delokke abe kídí delo kuujéng líkpe aiyé.

¹² Delo bí tarodem tarongpe tekmíkpe aiyé, delokke dekedem miri kídíde laala, delokke dumpong emla una kídíemte itaksula, runggu delokke esing guna teyolo, ai-kampope leeyon líkla romlíkpe aido.

¹³ Amide akii-asalem lang ale-alag kídíem asilo arbínla, dem tabung dem miríde runggu delo romyin líkpe aido. Kapeila de Ruutum ke airupe míínam, emelok romlíknam aríkana amane.

¹⁴ “Ami delokke amande, Ruutum kelo romlík penam pettang aman kope iyé mílo, de pekí komamílo perong kope ipe aido.

¹⁵ Miride pettang dem alínglok etsulla, runggu kerang delo bomala, tukkuem romlík langka. Delokke iyyiem runggu abe delo bítyin lenmolangka.

¹⁶ Delok rongem bí tamé emlang abíd amídem ilenla, runggu delokke sanggo danke metbu mepomlo yoblík langka.

¹⁷ Depe irodem bí alaplok gagbom dola, alabem sérkémape amíl dem sérpansula, runggu delo tabudem romyin líklangka. Kapeila de Ruutum ke airupe míínam emelok romlíknam aríkana amane.”