KOLOSIA 4 - DEENA BAIBÉL (BSI)

¹ Ruutum kídía, noluke pakbo kídíem aina belenglok yébotoka, kapeila nolu kekom teyong amolo Ruutume kadung dem nolu kénsudung.

Poyillíkname

² Ansuodola delokke yidgedola nolu agíe kumnam joonamem mínggap langka.

³ Ngokke lega peteng Kristoke arang ngiitomem pogoo nana bedangem Shédí bí bidope kumbilangka. Kapeila delokke lega pemin ngo patek so duubom sudune.

⁴ Ngokke pogong penamem deenampe podope kumtoka.

⁵ Nolu luyulo yéna ami kídíem yébo dakbo sukolo milo aro langka; aina moodíem menge sumapeka.

⁶ Noluke lupo manmuem yanggolok, moodíem kénbom dola tíína ngamnalok lubo sulangka, demílomin nolu mipilem poyan supenamem kényéne.

Lujin Pojin Agome

⁷ Tukik bí ngokke legangem nolum pobiyépe. Bí ayanam bíroko, míngkesula yébonako delokke Ruutum kelo béérang ajonko.

⁸ Ngolu kapepak akore idudí delokke aapí ainangem edíí podíng bodope emla, sok agom kídísok legape ngo bím nolukelo melíkdung.

⁹ Bí Onesim me aabosudak. Bí ngoluke míngkesuna delokke ayanam bíro, noluke opéé lokkeko. So kape pak idudí dem takam bínyi nolum poboyé.

¹⁰ Barnabake opín bíro Markke inam kísape ngokke patek duujon Aristark bí bíkke salamem nolum bidung. (Markke nolukíng pííyém nolu aipe kaarík langka emnam pogap líknam koborem nolu paatobong).

¹¹ Justo emlate mínnam, Jesukom salamem bidung. Sikesim Shédíke yéta legape ngokke agér ibosunam aralokke Judai amikídíe, delokke bulu ngokke kangír sukepe ito.

¹² Noluke aralokke akon delokke Kristo Jisuke béérangkon, Epaphra bí salamem bidung. Bí agínpe noluke legape noluke míínamem paayé emla berokdope delokke kénbee sula, Shédíke míínamlo edíípe yégapdope kumnamem yébom sudung.

¹³ Noluke legape delokke Laodikia lolang Hirapolilo duuna kídí legape bí edítko agérem ingéé sutítodí delok igul napeteng ngo duusudung.

¹⁴ Ngokke ayanam angong, daktorpe ina, Luk bílang Demakom salamem bidung.

¹⁵ Ngokke salamem Laodikia lokke bíro kídí lolang Numpha delokke bíkke ekum erang mondoli kídílo bikan langkuka.

¹⁶ Sim sithi sim nolu porirongem, Laodikia bíro kídílokke sithi melík kunam emte nolu poribipe aido.

¹⁷ Arkipme “No Ruutum kelok paanam agérem igap bomla iyin langka” emtoka.

¹⁸ Paul agí ngokke alaglok sim salam sithi sim atdung. Ngokke pateklo duunamem míípang sulangka. Yanggonge nolukíng duudaklangka. Amen.