JOSHUA 8 - DEENA BAIBÉL (BSI)

Ai Doolungem Nyokmoname

¹ Ruutum bí Joshua me poto “No aapí-aange amémape delokke atí pesokamape, nokke maglíngem gíbola, Ai doolungem mimakpe aabomlangka. Ngo nok alag aralo, Ai doolungem, doolung delokke rojem, doolung delokke ami kídí emlang, asi amongem ruulíkbiyé.

² Jeriko emnam doolung delokke rojem, no kape kísa itodí, dekepe Ai doolung demlang, doolung delokke rojemte no iyé, idola so irum so dan nolu doolung delokke ekuserang kídí emlang simon-sili kídíem agíke supe bomsing suladoku. Doolung méélam dan delok bulu mamam sudope mimagem aabomdope irusulangka.”

³ Depe lulík kolok Joshua lang bík maglínge, Ai doolung delo mimak ipe leemosulento. Bíkke maglíng delok bí midum éjar íying angumko miga-miramna amilok ullenla yoem melíkto.

⁴ Bulum sikepe ukum líkto, “Doolung delokke kékon elo runyok sulangka, idola nolu doolung lokke mootelo rugemapeka. Menape mimak iyabomdope irusulangka.

⁵ Ngo lang ngokke ami kídíe doolungdem jonnampe aabomyé. Edílo Ai lokke ami kídíe ngolum mimak imínsupe doolung delok lenbomyédí, delo ngolu kerangke kísape dugge langkula dugru géyéku.

⁶ Doolung lokke mootenggam loope bulume ngolu monkosuyé. Ngoluke kerangke inam kísa ngolu bulum dugge dungku emla bulum míímoyé.

⁷ Delo nolu noluke rusi supomlok lenbomla doolungdem laatoka. Ruutum noluke Shédíbí noluke alag aralo doolung dem melíkbiyé.

⁸ Ruutum ke podupe, doolung dem noluke laarodem nolu emepe ríílíklangka. Sikesi moko noluke ipename.”

⁹ Depe Joshua bí bulum lulíkla, bulu Ai doolung lokke anggodanlo gíla, Bethel kelang Aike pénsam delo rusisuto. Idola Joshua lang bík ami kídíde delo yoh delo notkolo doopoto.

¹⁰ Roh rokompe Joshua bí darepla maglíngem tomdumsula, bí lang Israel lokke abíd maglíng ruutum kídíde maglíng dem Ai doolungpe gíboto.

¹¹ Bí lang bíkke maglíngde línggíng danpe gíla, doolung lokke yabgo bottenake kerang delokke yiibe kékon delo notko ito.

¹² Delok teyolo bí anggodanke Ai kelang Bethel pénsamkon delo midum éjar pilngoko rusisumoto.

¹³ Maglíng kídídem mimak igape orek, orekpe imotula aropak notko arodem doolung línggíngdan delo ito, delokke abíddem doolungke anggodan delo ruyinmoto. Joshuabí yohdem yiibe delo dooto.

¹⁴ Edílo roh rokomdem Ai doolung delokke rojade Israel kídíem kaatodí, delo bí lomto. Bí lang bíkke maglíngde Israelem mimak imínsupe, kerangke iko, Jordan yiibe delo lento. Idola bulume doolung méélam danlok mimakpe lenbomyé emla bulu kénmato.

¹⁵ Delo Joshua lang bíkke maglíngde yépol moorukdan amongpe anyong anyongpe mimakdem imínsula ngétkutsuge bidolangkula duggetoku.

¹⁶ Deme kaala Ai lokke miro takamem tomdumsula, Israel maglíngdem monmín geto. Dekepe buluke monmín gedudem; bulu doolung delokke mooteng alongkai.

¹⁷ Bethel kelang Aike miro takamde, Israel kídíem monmín geyinto, delokke doolung dem aya-pesa aloope mela kaabomna kamato.

¹⁸ Ruutum bí Joshua me poto, “Nokke gíníng dem Ai doolung danpe leedung sulangka. Kapeila doolung esim ngo nokke alag aralo ruulíkto.”

¹⁹ Joshua bí Ruutum ke pokampe edílo itodí, delo rusisuna maglíng de dugabomla, doolung dem aajétbomto. Delo bulu menape doolung dem emepe ríto.

²⁰ Edílo Ai lokke maglíng de buluke doolung delok míkkí saadupe kaatodí, delo bulu duggekupeko atí kényimato. Delok teyong delo yépol moorukpe duggekuna Israel maglíngde, bulume mimakpe dugang bomlattoku.

²¹ Edílo Joshua lang bíkke maglíngde, buluke magpékondem doolung dem aajétbomla emepe rídupe kaatodí, delo bulu ngéélat sulangkula, Ai lokke ami kídídem petbomtoku.

²² Depe idung delo, doolung dem emepe rílíkna opéé dete, mimakdem idum sutoku. Delo Ai doolung lokke ami kídídem mimakpe isép aloosubomto. Bulu Israel maglíng gooralo ila sékote dugge langkuna kalamato, delokke bulum takam moka kayinto.

²³ Idola Ai lokke rojadem mokamape umla Joshuake keralo bomato.

²⁴ Israel kídíe mimak ipom delo, Ai ami kídíem moka kayinrodem, buluke yépol mooruklope duggena kídíemte, petyinrodem, bulu doolung delo aalangkula, delo dungkína amiem mipil miyongpe moka kayinto.

²⁵ Ai doolung delokke ami takamem petyinma tete deloope, Joshua bí, bíkke gíníngem Ai danpe ilíkla bomtíto.

²⁶ Delo longe delo, Ai doolung delokke ami takamem midum atel koteng turmomape petyinto. Bulu mimedak, milodak, midum éjar íying kolang annyiko petto.

²⁷ Israel kídíe, Joshuame Ruutumke pokampe, Ai doolung delokke turna taro kídí emlang ekurang kídíem, agí-agíke supe orbosula bomyinto.

²⁸ Joshuabí Ai doolungdem emepe ríkut geyéla dekepe merom romyamto. De silo peteng dekepe dung.

²⁹ Bí, Ai doolung lokke rojadem esing kolo paksul geyéla, adeng loope simang amíldem dekepe daktímoto. Doonyi uadelo, Joshua ke polík kolok bíkke amíldem laalangkula, doolung yabgo eyab pakdelo joolíkpala mepakto. Delokrodem bulu simang teyong delo língkum bottenako kumlíkto. De silo peteng dekepe duudungada.

Ebal Díítumlo Daapong Ayonem Isi-imokuname

³⁰ Ruutum me agér ibina Mosike Israel kídíem lulígnam tuubupe, Ebal díítum delo Joshua bí, Ruutum Israelke Shédíke legape rungguko píto.

³¹ Edílokom arem yokmo ekuranglok gatkímanam elínglok pínam runggukope emla Mosike ayon kitablo atlíknam tuubupe Joshua bí píto. Runggu delo bulu romnam aman lokla ashéng aman lok ipak ilíkto.

³² Delo Joshua bí, Israel daadi takam kangkolo Mosike attonam ayon kídíem elíng kídílo tuplíkto.

³³ Delo Ruutum ke Daapong Sondukdem joobomna Lebi miri kídíde arotkon eelenlo mikmo geríksula, Israel daadi takam elang buluke ruutum kídíe, miro kídíe, delokke mite migom kídíe lang, buluke aralo yémín gena mibo miying kídíe dagyinto. Milung delokke arotkone Ebal díítum dem buluke lamku em gekangsuto delokke arotkone Gerijim díítumdem buluke lamkuem gekangsuto. Buluke teyolo utepooroem ruulíkdí moodílo dekepe ibo sulangka emla Ruutum me agér ibina Mosike agom lulík kolok bulu depe ibosuto.

³⁴ Ayon kitaplo atlíknam utepooro agom kídíemla, béénam kídí agom takamem itaksula ayonlo igepenam idong takamem atlíknamem, mipil takame tatyin dupe, Joshua bí borope rikan biyinto.

³⁵ Mosike lulíknam ngiitom takamem atel koteng mepakmape, Joshua bí, mime delokke milokong kídí, delokke takamem itaksula milung takamke tatkolo pori rikan biyinto.