JOSHUA 7 - DEENA BAIBÉL (BSI)

Akhanke Paab Iname

¹ Jeriko doolunglok nyokmopenam ekuserang atelkote lamapeka emla Ruutum ke Israel kídílo ukum binamem, bulu igemato. Akhan emnam amikone lulígnamdem tatmape ikolok Israel daapong teyonglo Ruutum bí marto. Akhanbí Karmike ue, delokke Jabdike otene. Bí Judah opínke Jerahke pínmík lokke amikuai.

² Bethaben anínke Bethel doolung lokke sanggodanlo duuna Ai doolung demlang among tabungem rokang goodope Joshua bí ami ayokondem Jeriko lokke lulígto.

³ Bulu kanggopala, “Ai doolungde maglíng tabunge mimak iya bomsupenam kamang. Si améngona doolungko, iname midum jarnyi mamílo jarum atíko mílokom aiyé,” emla Joshua me pokukolok,

⁴ Israel maglíng lokke midum jarumkone mimakpe aabomto. Idola bulu iramla duggetoku.

⁵ Ai doolung delokke ami kídíde bulum doolung yabgo luyab delokke monbomla Shebarim loope monlíkto. Depe idudelo Israel amiem midum íying angum kolang akkéko etpang bedang delo mokato. Dem kaala ami kídí delokke aapí-aange améng aloola asi kísa ito.

⁶ Deme kaala Joshua bí agí egeme bétsula Ruutumke Daapong Sonduk kerang delo amongpe gubala yume adeng loope ankí kítíto. Abíd Israel kídíke ruutum kídíete bíkking lekope, buluke agí-agí dumpolo demul ilíksula ankí mínto.

⁷ Joshua bí poto, “Ruutum Shédía, ngolume Amorit ami kídí keralo nyokdope kapeda Jordan korongem koomola sim ami kídí sim so among so langaangkan? Jordan rotkondan elo ngolum siidum dengepe duumotuamílo.

⁸ Israel kídíem, miru kídíke ikumnam sim ngo kape emyén, E Ruutum.

⁹ Sim legang sim Kanaan ami kídíe lang sike sokke abíd ami kídíe tatla, bulu ngolum gargoobomla tani among sok petkutmílo, nokke agíke botteruna amín legape no kape iyén?”

¹⁰ Ruutum bí Joshuame poto, “Darepto, kape no amonglo migmoe gubala idun?

¹¹ Israel kídíe paab ito. Bulum bomgapdope ngokke ukumlíknam daapong ayonem bulu ipéésuto. Nyokpakdope emla lulíknam ekuserang ayoko bulu bomtungku. Bulu doppyotula agom medung. Dekena belumnam ekurangem buluke ekuranglo meyél sutungku.

¹² Depe ikolok Israel kídíe buluke miruem dagrík sulamang, bulu miru kerang lok duggedungku, kapeila bulum nyokdope ruulíkto. Dekena deemana ato-siro kídíem noluke arasulok ipak sukumamílo, nolu kelo ngo yémín geyimayé.

¹³ Darep tokula, ami kídíem deebín dokula sipe polangka, ‘Nyampo nolu agí-agísue deebín suyinlangka. Kapeila Ruutum Israelke Shédíbí sikepe podung, “E Israel kídí, noluke aralo nyokmopenam atoeke bomsup bosudung. Dekena nyokmopenam ato kídíem noluke aralo bombo sudutetedem nolu miruem dagrík sulamayé.”

¹⁴ Depeila nyampoke rueme bulume opín, opínpe dagamolangka. Ingkona opínem Ruutum bí ulyéne de pínmík remépe dagape aiyé. Ingkona pínmígem Ruutum bí ulyéne de erang remépe dagangkupe aiyé. Delokke ingkona erangem Ruutum bí ulyéne de mipil-miyongpe dagangkupe aiyé.

¹⁵ Delo ingko amilodí nyokmopenam ekurangem paayédi, dem amidem umla bímlang bíkke edung-erang tabungemla bíkke ekuserang takamem lekope emelo romkape aido. Kapeila de amide ngokke daapong ayonem betla, Israel daadi takamlo botteruna annyingem bomato.’ ”

¹⁶ Depeila roh kondem Joshua bí Israel daadi takamem aabola opín opínpe dagaboto: delo Judah opínem ullento.

¹⁷ Delo Judah opínem pínmík remépe, bí dagamola, delo Jerah pínmígem ullento. Delo Jerah pínmík lokke erang miyongpe dagamola, delo Jabdi erangem ullento.

¹⁸ Depe irodem bí Jabdi erang kídíem mipil-miyongpe dagamoto, delo Karmike oo delokke Jabdike oten Akhanme ulto.

¹⁹ Joshua bím ííto, “Ngok ua, Ruutum Israelke Shédíke keralo aro agomem popasula ponkan sulangka. No ingkokodí itone dem rumnyokmape ngok keralo pokan sulangka.”

²⁰ Delo Akhan popasuto, “Aroe ngo Ruutum Israelke Shédíke keralo paab ito. Dem ngo sikepe ito.

²¹ Ngoluke ekuserang líídodelo Babilon lokke kamporuna lukdor galuk kolang kilogram annyina baldíneke, delokke kilogram arotkope tebegna uun banggén alopko ngo kaala dekedem ngo yagorupe kaabola laato. Dekedem no ngokke tombu aralo baldín kídíem rumkíyalumlo ila yutupe kaayé.”

²² Delo Joshua bí ami ayoko lulíkla, bulu bíkke tombu aralo, baldín kídíem rumkíng yalumlo ila ekurang kídídem yutupe kaato.

²³ Dekedeme bulu Israel takamke kaangko lolang Joshuake kaangkolo bomlen langkula, Ruutum ke keralo mekan bitoku.

²⁴ Depe irodem Joshua lang Israel daapongde, Akhan melang bíkke edung-erang, ome-oo kídíem, baldín kídí demlang, lukdor galuk dem delokke uun banggén alopdem; delok teyolo, Akhanke bomnam rubo, gado, mér kídíem, delokke tombu demte ila, daadi tabungem umla Akhor yiibe emko delo gíboto.

²⁵ Delo bím Joshua luto, “Kape no ngoluke teyolo ankí-keno bomangkan? Depeila silo nok teyolo Ruutum bí ankí-kenoem bomadung.” emla lurongem, Israel takame bíme elínglok gekato. Delok teyong lote bíkke erang doolung emlang bíkke ato-siro takamem elínglok gekala emelo romyinto.

²⁶ Depe irongem bíkke teyolo, bulu língkum botterunako kumjémlíkto. De silo loope delo duudung. Depe irongem Ruutum ke aklínge buluke teyonglok nyokkaku. Dekepe inam legape silo peteng dem moolop dem Akhor Yiibe emla mandung.