JOSHUA 6 - DEENA BAIBÉL (BSI)

Jerikoke Oletname

¹ Israel kídí legape Jerikoke doolung yapgo eyabdem, edíírupe ikapla meto. Depe ila sékote gílen gíana kamato.

² Ruutum bí Joshua me poto, “Kaatola, simlang sokke rojem, delokke sipaying takamem, nokke alag aralo ngo bilíkdung.

³ No lang nokke maglíng kídíe, longem lekodada doolung sim bilgola gígotoka. Sikepe longe akkékope billangka.

⁴ Miri ami kínídko aareng bikulem mipile bomla, Daapong Sonduk kerang-keralo gígemolangka. Longe kínídnana longe delo, nolu lemkíníd kokai billangka, delokke miri kídíde bikulem dekepe idungem muttílangka.

⁵ Depe irodem bulu leko oolooko mutyar polangka. Depe mutyarnamem tatrongem, nolu daadi takame bottepe ngommín gelangka, dekepe iyém doolung delokke yabgoe bényé, delo nolu maglíng takame doolung delo mimakpe dugabomlangka.”

⁶ Deme tatla, Joshua bí miri kídíem tomla poto, “Nolu Ruutum ke Daapong Sondugem joolangka, delokke miri kínídko bikul tapung bomla, Daapong Sonduk delokke kerang-kerangem gígelangka.”

⁷ Delo bí ami kídíem, “Ruutum ke Daapong Sondugem kaabomna maglíng opééko kerayalumpe gígela, doolung sim bilgola gílangka,” emla lulíkto.

⁸ Joshuake lulíknamem tatrongem, miri kínídko, bikul tapung kínídko bomla, kerang kerape bikulem mutgela, gíto. Buluke méélamlo Ruutum ke Daapong Sondukde gímín geto.

⁹ Deke delokke kerayalumpe, maglíng opééko bikul mutla, miri kídí keralo gígeto, delokke opéékonko Ruutum ke Daapong Sonduk méélam delo gímín geto. Dekepe gídu rubudem bikulem muttíto.

¹⁰ Idola Joshuabí ami kídíem sikepe poyilto, “Nolu mimak togogem gogpomapeka, nolu adud-ayud atí manpomapeka. Ingkona longelo ngo nolum ngomlík langka emla manyédí delo longepak delo ngomlangka.”

¹¹ Dekepe bí leko, Ruutum ke Daapong Sonduk dem joobomla, doolung dem bilgo bopala, notkolo aalat subolangkula, yohdem apéé mopotoku.

¹² Roh kondem Joshua rokompe gerepto, delokke miri kídíde Ruutum ke Daapong Sonduk dem joobomto.

¹³ Bikul bomna miri kínídde, Daapong Sondukke kerang kerape bikul mutla gígeto. Dekepe bikul muddungem, maglíngke opéékonde kerayalumem gígeto, delokke opéékonde Daapong Sonduk méélam delo gímín geto.

¹⁴ Dekepe loonyinana longe delo, bulu doolung dem bilgola notkolo aasutoku. Sike pedada bulu longe akkékokai itíto.

¹⁵ Longe kínídnana longe delo, doonyi saaduem bulu gerepla abíd longe kísa, doolung dem bilgola gígooto. Idola delo longe delo, bulu lemkíníd kokai bilto.

¹⁶ Lemkíníd bildo delo, edílo miri kídíe bikulem muttodí, delopak Joshua bí ami kídíem poto, “Ngomlangka, Ruutum bí nolum doolung sim bito.

¹⁷ Sim doolung simla, doolung arang sokke ato-siro takamem, Ruutum ke amanpe petkut alope aiyé. Notii Rahab melang bíkke ekum aranglo duuna kídí petomem melangka, kapeila ngoluke magro rokana annyidem bí rumnyok bito.

¹⁸ Idola Ruutum kepe nyokmo penam ekurangem ukkímapeka. Dekepe imílo nolu agísuke nyokkupenam bedangem agísue, delokke Israel notkolo ankí-kenoemla sinam-nyoknamem bomayé.

¹⁹ Ruutum ke keralo uun, baldín delokke, pitol ekurang kídíe lang, arem ekurang takamde deena ato-sirope idung, iname dekeme Ruutum ke ekurangpe mesing kolo melíkpe aiyé.”

²⁰ Edílo bikulem muttodí, delo ami kídíde ngomto. Bikul adud delok edílo ami kídíe bottepe ngomtodí delo doolung yabgo de bénla oletkai, delo Israel maglíngde mipil miyongpe dugabomla doolung dem laato.

²¹ Bulu doolung dem Ruutum keepe tolíkla, delo duuna mimedak milo dak, eejo-míjingdak koo-kíangdak, tani takamem petyinto. Bulu gooru, mér, gado, sobén delokke abíd taro kídíemte moka kayinto.

²² Dekepe irongem, kerape rokang goona ami annyidem Joshua bí, “Nonyike togesunampe, notii ekum elo gíla, bímla bíkke abíd edung-erang duuna kídíem tomyin aatoka,” emla lulíkto.

²³ Delo bínyi gíla, Rahab melang bíkke ane-abuem, bírme-bíroem delokke abíd edung-erang kídíem tomla aabotoku. Bulu Rahab mela bíkke erang takamem, delokke abíd kídíem gíbola, Israel kídíke notko anínlo duumoto.

²⁴ Depe irongem bulu, uun, baldín, pitol delokke arem kídí paanam emla, delok pínam ato-siro kídíem, Ruutum ke ekuserang mesing kukolo melík kunamke kékondem, apíírupe doolung demla delo duuna ato-siro takamem emepe ríkutto.

²⁵ Idola Jerikolo rokangdope melíknam ami annyidem, Rahabbí rumnyokla igulkolok, Rahab melang bíkke edung-erang tabungem Joshuabí turmoto. Rahabke otíng-oyine Israel gooralo silo loope duudung.

²⁶ Delo longe delo Joshua bí lutorgoonam agomko ilento: “Jeriko doolungem, doolungpe iya bomkuna amide Ruutum ke béénamko paayé. Sékodí kerape gaangem díngge yéne, bí agíke oo abíyalumem nyokmoyé; delokke sékodí yabgo eyab kídíem moyékudí, bí agíke oyiyalum uem nyokmoyé.”

²⁷ Dekepe Ruutum bí Joshua kíng duumín gela, bíkke miram amíne among takamlo gíyin gooto.