JOSHUA 5 - DEENA BAIBÉL (BSI)

Gilgallo Dínbíng Iyodsuname

¹ Jordan korongem ngoluke gíyinma tetengem, Ruutumke Israel kídí legape, asiem pítílmola inamem edílo Jordan korongke anggodanlo duuna, Amorit roja kídíe lang siyéng robeng abulo duuna Kanaan roja kídí takame tattodí, bulu dem tatla buluke aapí-aange yagorupe améng gela, Israel kídíem mimak iríksupe atí ralnam kaimato.

² Delokrongem Ruutum bí Joshuame poto, “Elínglok yoksikpe mopala, lekoda Israel kídíem dínbíng iyod sumolangka.”

³ Depe polík kolok Joshuabí elínglok yoksikmola, Gibeath Haaralot emko delo Israel tabungem dínbíng iyod suyinmoto.

⁴ Sikepe bíkke igang si ikai: Ijipt amolok gílenkuna minena ami tabunge, bedang entíngke yépol mooruk amonglo siyinkai.

⁵ Ijipt lok gílenkuna takamde, dínbíng iyod suyinto. Idola bedu-bedalo endungkuem onam oo kídíde dínbíng iyodsumato.

⁶ Ijipt elok lenkuna minena ami tabunge, Ruutum ke agom-aangem tadbimanam legape, Israel takame yépol mooruk amonglo takying appi kope bilgola, minena tabunge siyinma tetengem yégooto. Kapeila Ruutum bí buluke abu kídí keralo ngullange lang gakíre biingko amongem ngolume biyé emla togesutuai. Idola buluke agom-aang tadmanam legape, bulum dem among dem kaapamomayé emla Ruutum bí pésuto.

⁷ Depeila Ruutum bí buluke ome-oo kídíem, buluke ayanpe siirep motoku. Dekepe siirep mokunam bulum min Joshua bí dínbíng iyodtokune, kapeila entíng-gítínglo dínbíng iyodmape ituname, bulu dínbíng iyodsumana amipe yéyinto.

⁸ Israel opín-buang tabungpe dínbíng iyod suyinrodeme, taríe géngkuma teteloope bulu notko delo duupoto.

⁹ Depe irodem Ruutum bí Joshuame poto, “Siloke longe so, ngo noluke Ijipt amonglo abílpe duutuai emla deemana amínem ipakto.” Depeila delokke moolop dem silo loope Gilgal emla míndung.

¹⁰ Jeriko lokke yiibe Gilgallo duudungem, poolo delokke longe íying kola appinana lokke yume delo, Israel kídíe Gíbong adeng-ape em ibosuto.

¹¹ Gíbong adeng-apeem gítít pakna longe delo ali-ayé aman emlang siiyé líkmanam ettíngem dobosuto. De Kanaan amolo buluke ali-ayé paanam lokke kerang doge yalumname.

¹² Dekepe Kanaanlo donam arík ila dorongem, delok longe delokke ila, Israel kídí legape manna doname olet biyimato.

Joshua Lang Teyong Amide

¹³ Edílo Joshua bí Jeriko anínlo píítodí, delo menang asak amiko alaglo yoksako bomla, bík kerang delo dagdupe bí kaapato. Joshua ami anín delo gíala bím íngkíto, “No ngoluke opéékua ma mirukua?”

¹⁴ Delo amide “Sékoke petemang, ngo Ruutumke sipaying maglíng lokke migompe aadung,” emla poyansuto. Dem tatla Joshua bí, amonglo gubala kumsudola poto, “Ruutum nokke agérem ibine ngo. Ingkona agom koda no ngom políkpe míídun?”

¹⁵ Ruutumke sipaying maglíng lok migomde bím poto, “Nokke leyugem ibínsutoka, kapeila no deena moolop kolo dagdung.” Bíkke pokampe Joshua bí ibito.