JOSHUA 3 - DEENA BAIBÉL (BSI)

Jordanem Kooname

¹ Roh rokompe Joshua lang Israel tabunge, Shittim lok gílen langkula, Jordanem koomang adape korong robeng delo notko ila doopoto.

² Longumko doorongem, maglíng ruutum kídíde notko miyonglo gígoola ami kídíem pogooto.

³ “Edílo nolu Lebi miri kídíe, Ruutum noluke Shédíke Daapong Sondugem joola gídope kaayédí, delo nolu ippoem adpala gímín gepe aiyé.

⁴ Nolu sike so letel kokom yékímang ila, noluke bedangem bulu gíboyé. Idola noluke lang Daapong Sonduk delokke pénsamem, kilomitar koope mootengem melangka, nolu delokke anínlo gínín mapeka.”

⁵ Ami kídíem Joshua bí poto, “Nolu agísuem deebín sulangka. Kapeila nyampo noluke gooralo, Ruutum bí irisinyo agérem ikanboyé.”

⁶ Delo Joshua bí miri kídíem lulíkto, “Nolu Daapong Sonduk dem joola ami kídídem gíbola gígelangka.” Depe pokolok bulu deme joolangala, ami kídí kerape gígeto.

⁷ Ruutum bí Joshuame poto, “Ngo Mosi kíng kape kísa yémín getuadí, dekepe nokkíng ngo yémín gedung emla, ami takame kéndope, Israelke amig keralo nome ngo silo botterupena amikope kaadope ikanbiyé.

⁸ Daapong Sondugem joobomna miri kídídem sipe polangka, ‘Edílo nolu Jordan asi robeng paklo pííyédí, delo daklangka.’ ”

⁹ Joshua bí Israel kídíem poto, “Nolu so aala, Ruutum noluke Shédíke agomem tatlangka.

¹⁰ Noluke keralok aropakpe bí Kanaan, Hittit, Hibit, Perijjit, Girgashit, Amorit emlang Jebusit amiem, monpakbiyé. Delo noluke aralo turna Shédí bí yémín gedung emla nolu arope mííyé.

¹¹ Kaatola tani among takamke, Ruutum bíkke Daapong Sondukde noluke kerape Jordanlo konganggeyé.

¹² Depeila supak, opín miyonglok midum atelpe laalenla, midum íying kolang annyiko ullenlangka.

¹³ Edílo tani among takamke, Ruutum bíkke Daapong Sondugem joobomna miri kídíe asilo ale tuayédí, delo sokko danpe biitokna Jordan korong asie biiyimape, bingesula alop atel kolo bingkumsuyé.”

^14-15 Dekepe emkolok ami kídíe agí agíke notkoem atlangkula, Jordanem edílo koope itodí, delo Daapong Sondugem joobomla miri kídíe buluke kerangem gígeto.

¹⁶ Dekepe ido delo ali-aam gatdí-idíe, delokke Jordan korongde goola bottedo. Idola edílo, Daapong Sondukdem joobomla miri kídí delokke ale koronglo tuatodí, aside biiyimape biidesula, Jarethan deego-yilo loope duuna Adam emnam, mootengo telokai duuna luune deloope korong aside biingkumsuto. Delokke sokko danpe Arabah Siyéng (Alo Siyéng) loope biitokna asidem gensékto. Depe ikolok ami kídíe Jerikoke arotkon danlo pííto.

¹⁷ Ami kídí lokke pítílko among delok gíla, opín-buang daadie gíyin loríloope, Ruutum ke Daapong Sonduk dem joobomna miri kídíe, Jordan among pítílna korong raadang delo joobomla dagya yatíto.