JOSHUA 22 - DEENA BAIBÉL (BSI)

Joshuake Sanggodanke Israel Opín-buangem Ekumlo Lulíkkuname

¹ Dekepe irongem Reuben, Gad delokke sanggodanke Manasseh opín kídíem tomdumsula Joshua bí poto,

² “Ruutum me agér ibina Mosike lulígnampe nolu ato-siro tabungem iyinkai. Nolu ngokke agom-aangem apíírupe tatbikai.

³ Siddína longe so, nolu agíke Israel amisuem letel kokom yatla, mepaksula inam kamato. Ruutum noluke Shédíke agom-aangem airupe nolu igeto.

⁴ Ruutum noluke Shédíke agí posunampe, bí Israel kídíem aapí eetet mokai. Depeila noluke asi-amongem tosula, nolum Ruutum ke agér ibina Mosike orlíknam Jordan korongke sanggodan among elo nolu enlangkuka.

⁵ Ruutum noluke Shédíme nolu ayasula, bím míngkesula, bík míngkorpe yéla, bík agom-aang lulígem tatla delokke noluke aapí-aang loklang aidlok airupe bím agér ibilangka.”

⁶ Joshua bí bulum agí-agíke yétalo utepooro agomem polík bila lulígtoku.

⁷ Bí sikepete políktoku, “Nolu agí-agíke yéta sulo deddína uun em, baldínem, pitolem, deddína ege galug emlang simon-siliem bomla gídakku. Noluke miru kídílok líínam ato-siro takamem agíke Israel edung-erang kídílo orbo sulangka.” Depe emrodem bulu agí-agíke yétalo enyin sukaku.

⁸ Manasseh ke opínem ipansula opín arodem Jordan korong sanggo danlo Mosi bí orlíkto. Depeila Manassehke opín arot kondem Joshua abíd Israel opín-buanglo asi-amongem ortak sulíkto.

⁹ Dekepe, Reuben, Gad delokke Manasseh opín arotkonde agí-agí yétasulo enkaku. Bulu abíd Israel kídíem Kanaan amongke Shiloh emko doolung delok gípan sutoku. Mosi kíng Ruutum ke lulíg binam tuubupe Gilead amonglo buluke agí-agí yétasulo bulu enyin sukaku.

Jordan Koronglo Runggu Píname

¹⁰ Jordanke anggodan robenglo duuna Geliloth emko delo edílo Reuben delokke Gad kídíe lang sanggodan Manassehe píítokudí, delo bulu korong robeng delo gairupe runggu bottenako píto.

¹¹ Dekepe buluke pínam dem, “Reuben, Gad delokke sanggodan Manasseh kídíe, Geliloth emkolo, ngoluke Jordan korong robengdan elo rungguko píkai,” emla abíd Israel kídíem popala tatrodem,

¹² bulu opín-buang takame Shilohlo gídumsula sanggodanke opín kídídem mimak ipe emla ibomto.

¹³ Depe igeyéla Israel kídíde Reuben ami, Gad ami delokke sanggodanke Manasseh kídíke dungko Gileadlo, miri Eleajarke oo Phinehasme lulígto.

¹⁴ Anggodanke opín-buang miyongke ruutum kídílok midum íyingko ullenla Phinehas kíng gímín geto.

¹⁵ Bulu Gilead amonglo pííla, Reuben, Gad delokke sanggo Manasseh ami kídídem kaaríksula bulum lupoto.

¹⁶ Bulu ami kídí tatkolo popato, “Israelke mirupe nolu kape sikena atímangem idune? Nolu agísue sim runggu sim píla Ruutum ke mirolpe ilenkai. Nolu bíkke bedanglok gíyimang.

¹⁷ Nolu Peorlo ngoluke paab inamem míípa sutola. Delo Ruutum bí agí amisu teyolo kilii-ramliem melígmanía? Delokke legape supak peteng ngolu ankang sudungada. De paab manía?

¹⁸ Bíkke bedanglok nolu gílíyimanía? Silo nolu Ruutum ke mirolpe rollen yémílo, bíkke marname Israel mipílo nyampo kayé.

¹⁹ Depeila noluke among si dormo agér legape deemangpe idumílo, Ruutum ke Tombu dungko rotkon elo nolu aatoka. Ngoluke asi-among yébomko aralo, noluke yéta legape togemíntoka. Idola Ruutum ke mirolpe imapeka, delokke teyolo Ruutum ngoluke Shédíke runggu kasuko teyolo runggu konko píla, ngoluk arasuloteng mirolpe rolmín sumapeka.

²⁰ Deemana ekurangem romnyokdope depe lulíknamem tatmape ina, Jerah ke oo Akhan me míípa sutola. Bíkke tatmanam legape maglíng takamem anka sumoto. Depeila bíkke paab legape bí atel sisumato.”

²¹ Dekepe emrodem, Reuben, Gad delokke sanggo Manasseh kídíde, buluke anggodanke opín erang ruutum kídíem poyansuto,

²² “Ralya yalumna bí Shédíe! Bímin Ruutume! Ralya yalumna bí Shédíe! Bímin Ruutume! Ngolu sikepe kape idudín dem bí kéndung, delokke noluteng kéndope emla ngolu míídung. Ngolu mirolpe ila Ruutum kelo míngkeng kamamílo ngolume turmoyimapeka!

²³ Ngolu Ruutumke lulígem tatmape agí mínggolok rungguem písula delokke ali-ayé amanem, ashéng amanem, romnam amanem ipakpe ilíkpe emla míídumílo, Ruutum bí agísue ngolum atímape ikalangka.

²⁴ Dekepe ngolu míímang. Lunnying-lunke delo noluke ome-oo kídíe, ngoluke ome-oo kídíeme, ‘Nolu Ruutum, Israelke Shédí kíng ingko koda kabosudun?

²⁵ Nolu Reuben kídíe lang Gad kídíe Ruutum kelo atí kabosumang. Bí Jordan korongem nolum lang ngolum rísupe tokké motung,’ emla Ruutum me kummo yimape lutum pelo,

²⁶ emla ngolu peso-rían aapíko kala, sim runggu sim píto. Iname so ngolu amanem ilíkla, demangkom romnam ipagem ilíkpe emla pímang.

²⁷ Delok ayanpe ngolukom Ruutum ke Tombulo ashéng amanem bila, romnam amanem ipak ilíkla Ruutum ke deena Tombulo kumsudung emla ngolukom, nolum lang ngolum yétít kupena siirum-siirum loope kénsudope, noluke lang ngoluke pénsamlo iyod konpe idope sim píto. Sipe irodem noluke oten ome-oo kídíe, ‘Nolu Ruutum kíng atí kabosumang,’ emla manlang kumayé.

²⁸ Dekepe ebín-ebon agom-aang atíko kanamko kabo suyémílo, ngoluke oten ome-oo kídíe sipe polayé, ‘Kaatola, Ruutum ke runggu kísa pakna moi-muangko ngoluke buku kídíekom pítung.’ Iname ngoluke inamsi romnam aman demangkom, abíd ipak kídíem ilíkdope inammang. Idola noluke lang ngoluke pénsamlo iyodkope idope emla iname.

²⁹ Ngolu edílokom Ruutum ke mirolpe ipe míímang, demangkom bíkke luyilem tatmape ipatsupe emla ali-ayé amanem, romnam amanem, delokke abíd ipak samoem ikepe emla sim imang. Ruutum ngoluke Shédíke runggue deena Tombulo duududem, delok kékonlo angukon runggu píngusupe edílokom ngolu míímang.”

³⁰ Edílo rotkon anggodanke opín-buang takamke ruutum íying kídí delang miripe ina Phinehas bulu, Gad kídí kelang, Reuben kídíke delokke sanggo Manasseh kídíke agom-aang kídídem tattodí, delo buluke aapí-aange denge alongkaku.

³¹ Miri Eleajar ke oo Phinehas bulume manto, “Ruutum bí ngolukíng yémíndung emla, ngolu supak kénkai. Nolu bíkke mirolpe imang. Nolu Ruutumke Israel ami teyolo marla itung iréé kupenam lok mopítto.”

³² Depe irongem Israel kídíke ruutum kídí delang Phinehas bulu Gilead amongke Reuben ami kídí delokke Gad ami kídí delok yamlík kosula agíke Kanaan among, Israel kídí sulo enlang kula legí-sigang tabungem popa botoku.

³³ Buluke popang kunamem Israel kídíde tatlangkula, aapíe eetetkaku, delokke bulu Ruutum me yidgetoku. Reuben kídídem delokke Gad kídídem mimak idope bulu edílokom popang-lupang bosuyimato.

³⁴ Reuben kídíe lang Gad kídíé, “Ruutum bí Shédíe emla ngolu takamke keralo si hakiipe idung,” emla manbosula runggu deme “Hakiie” emla amín mínlíkto.