JOSHUA 2 - DEENA BAIBÉL (BSI)

Jeriko em Rokangdope Melíkname

¹ Delo Nunke oo Joshua bí Shittim lok midum annyiko, rusisula rokang goodope lulígdola políkto, “Nonyi Kanaan amongem kanggong dola, Jeriko doolungem kaasi gootoka.” Depe polík kolok bínyi delo gíla notiipe ina Rahabke ekumlo dooto.

² Asi amongem rokang goona, Israel ami annyi delokke delo yoh delo aala doonamem, Jeriko delokke roje tatpaato.

³ Depeila bí Rahabme, “Nok ekum delo doona ami kídíde, asi among tabungem rokang goope emla aaneke. Bínyime so aabo langka.” emla agom políkto.

⁴ Delo mimede ami annyidem rumyokpala poyansuto, “Aroe, amieke ngokkíng aatuai. Idola bulu ingkolokdí aatone dem ngo kénmang.

⁵ Doonyi uarongem, edílo luuyabem sittumdíe itodí, delo ami annyide gíkaku. Ingkolodí bínyi gíkakune, dem ngo kénmang. Nolu menape monmín gekaka. Bínyim píílangkom iyépe.”

⁶ Idola bí bínyime ekum míílong teyong delo, alem-alempe leenam siipyak kídí delo rumnyokto.

⁷ Depe emkolok ami kídíde bínyime mabomla, bedang lokke Jordan korongem iríksuko loope monmín geto. Buluke monmín gelenrodem luuyabem sittumto.

⁸ Rokang goona annyi delokke ibaamang adape, Rahab bí míílong delo saala, ami annyidem poto,

⁹ “Sim asi among sim, nolum Ruutum bí bitung emla ngo kéndung. Kapeila sok among kídí sokke ami takame, nolum pesola reyubrupe mínggedung.

¹⁰ Noluke Ijipt amonglok lendokuem, noluke keralok Silíng Siyéngem kape kísa Ruutum bí pítíl motodí, delokke Jordan kékonlo Amorit kídíke roja Sihon melang Ogme, kape kísape nolu nyoggít motodí, deke takamem ngolu tatyinto.

¹¹ Edílo ngolu dekedem tattodí, delo ngoluke aapí-aange améng aloola, noluke legape ngolu takamke aapí-aanglo, ralnam atí kayimangkai. Kapeila Ruutum noluke Shédíbí, teyong among kelang tani among sokke Shédíe.

¹² Depeila ngo kapekísa nonyim ai-kampope iríktodí, dekepe ngokke edung erang emte nolu ai-kampope iyé emla, Ruutum ke amínlok pésulangka, delokke nonyike agomem ngo aroe emla míídope iyodko ikan bilangka.

¹³ Sok teyolo, ngokke ane-abuem, bírme-bíroem delokke edung erang takamem mokamayé emla togesulangka.”

¹⁴ Delo ami annyide bím poto, “Ngonyike igoonam legang sim no séko memkom pomayémílo, edílo Ruutum bí among sim ngoluke alag aralo bilíkyédí, delo nomlang nok edung erangem, ngolu ai-kampope iríkyé. Ngonyike agom pokampe imayémílo noluke ayanpe ngonyike yénamsi nyoklatyé.”

¹⁵ Dekepe embosurodem, ami annyidem Rahab bí sotkyalok ila, kirki lok reeyi motoku, kapeila bíkke ekumde, doolung yapgo língkum delo modasula molíknamkuai.

¹⁶ Bínyime Rahab bí políkto, “Nonyi adi danpe gítokuka, demamílo roja lokke ami kídíe nonyim umyé. Adi dan telo, buluke angkumang tetedem longum kope rusisula duupongtoka. Depe irongem nonyike akorsupe enladoku.”

¹⁷ Delo ami annyide bím poto, “Nokke ngonyim togesumonam agom sim ngonyi mesiisuyé. Idola no sikepe ipe aido,

¹⁸ edílo ngolu, noluke among so mimakpe aabomyédí, delo no, ngonyike reebong kuko kirkiso, sim yalína enno rímo sim paklík langka. Delo nokke ane-abu, bírme-bíro delokke abíd erang kídí emte nokke ekum so dumsumolangka.

¹⁹ Séko amiedí ekum sok gílen yédí, bíkke sinamde agí imempe isuyé, delokke daidem ngolu togemayé. Idola nokke ekum araso mokanamko kayé mílo, delokke daidem ngolu togeyé.

²⁰ Sok teyong so ngonyike legí-sigangem no pokan yémílodan, nokke ngonyime togesumonam agom-aang sim ngonyite mesiisumayé.”

²¹ Rahab poyansuto, “Dem ngo tolík dung, nonyike pokampe iyé.” Dekepe pobosurodem bí bínyim melík langkula, bínyike gírongku deme, Rahab bí kirki delo yalína enno rímodem paklíkto.

²² Rokang goona annyide delok gílen langkula, adi amonglo rusisula dunggeto. Longe angum kokai roja delokke ami kídíde bedu-bedang among tabungem matagooto. Idola bulu bínyim mapang kíramla Jerikope aalatsutoku.

²³ Depe irodem rokang goona annyide, adi amonglok oilangkula, korongem koolangkula, Joshua kíng aalatsutoku. Bínyi legí-sigang takamem popang biyintoku.

²⁴ Delok teyolo bínyi bím poto, “Asi-among tabusim, ngoluke alag aralo Ruutum bí bilíktung emla ngonyi arorupe míngkai. Ngolum ami takame pesorían along gedung.”