JOSHUA 18 - DEENA BAIBÉL (BSI)

Abíd Amongem Orbosuname

¹ Among tabungem mimak ila laayinrodem, Israel ke opín-buang tabunge Shiloh lo dumsula Ruutum ke Tombuem delo tuureplíkto.

² Dekepe ido delo, Israel lokke opín kínídko among ormaname kato.

³ Depeila Joshua bí bulum poto, “Ruutum noluke buku kídíke Shédí bíkke, nolum asi among binamem nolu yéyin aabom mangadape edít longe koda nolu toyayatíyén?

⁴ Ngokkíng midum angumko opín-buang miyonglok ullenla, bidum suyintoka. Bulum ngo among tabusim gígoola yarkang dope lulíkyé. Bulu agí-agíke mííbang supe among sim kanggola, agí-agíke opín-buang akorem kaasula, agí-agíke yége-dagge supenam moole kídíem méppe atla ngokkíng bidum sukupe aido.

⁵ Nolu asi-among sim moole kínídkope ipansupe aido. Judah bí agíke moole sokkodan belo yésupe aido, delokke Joseph kíng lenna opínde moole línggíngdan telo yésupe aido.

⁶ Nolu moole kíníd delokke mépdem atrongem, ngokke so bomang kupe aido. Delo ngo Ruutum ngoluke Shédíke kangkolo lotoripe iyé.

⁷ Idola Ruutumke miri agérde Lebi kídíke tarongpe itoname, bulu among tarong paamín gemayé. Delok teyolo Gad, Reuben delokke Manassehke opín arot konde buluke among tarongem, Jordan korong sanggodan elo paatobong. Bulume, Ruutumme agér ibina Mosi bí panbito.”

⁸ Ami kídar delokke amongdem mép idope emla gílendoem, Joshua bí bulum poyilto, nolu among delokke rego mipílo kanggola, delokke legí-sígangem atlangka. Depe irongem, noluke píídum suyékuem, so Shiloh doolung so, Ruutum ke keralo ngo lotoripe nolum ibiyé.

⁹ Depe emrongem, ami kídíde amongke rego mipílo gígongkai. Bulu asi-among delokke legí-sigangem kitabkolo, doolung-doolungpe orek kínídkope atgeyéla, Shiloh notko delo Joshuakíng píídum sutoku.

¹⁰ Píídum surongkudem buluke legape, Joshuabí Ruutum ke keralo, Shiloh notko delo lotoripe iboto. Depe ibila bí Israel ke opín-buang miyongem amongem orpan subito.

Bénjamin Opínem Panbiname

¹¹ Kerayalumpe, Bénjamin opíndem, pínmík-ramíkpe panbito. Bulum panbinam amongde, Judah kelang Joseph ke opín kídíke among pénsamlo ito:

¹² Buluk among rísude, línggíngdan lokke Jordan korong lok ilen langaala, Jeriko línggíngdan etpangpe gído langkula, anggodanke adi amongpe gílangala Bethaben emko yépol mooruk amonglok pattoku.

¹³ Depe irongem rísude Bethel emlate mínnam Luj lokke sokko yiibe kíng boolangkula, Rumkíng Beth Horon emkoke sokkodan dííte lokke Ataroth Addar loope píílíkto.

¹⁴ Beth Horonem gekasuna sokkodan dííte delokke rísude sokko anggodanpe gílangkula, Kiriath Baal (emnamde Kiriath Jearim) emnam Judah kídíke doolung kolo pattoku. Si anggodanke rísue.

¹⁵ Sokkodanke rísude, Kiriath Jearimke anggodan duurílok ilenla Nephtoah Siirunglo patlentoku.

¹⁶ Delokke ila rísude Rephaim Yiibe línggíng danlo duuna Ben Hinnom Yiibeme geríksuna díítum kídíke lebelok gíto. Delok gílangala Jebus kídíke doolung rumkíng yiibe kídí delok gílangala Enrogello lentoku.

¹⁷ Delokke rísude línggíngpe gerlangkula, Enshemesh em gíboola, Adummim dííte borkogem dakríksuna Geliloth díítepe bootoku. Delokke de oilangkula Reubenke oo Bohanke Líísik díínam delo pííto.

¹⁸ Delokke de línggíngpe saadan tetelangkula Beth-arabah ke etpangem píílangala Arabahlo oitoku.

¹⁹ Delokrongem Beth Holgahke línggíng dan etpang delok gílangala Sina Siyéngke línggíngdanke Jordan asi olíkko robenglo pattoku: si sokko rísue.

²⁰ Jordan korong agísude sanggodan rísupe ito. Sikesi Bénjamin opín tabungke yébompenam among panbinam rísu kídíe.

²¹ Pínmík-ramík miyongpe Bénjamin opínlo si doolung kídísi kato: Jeriko, Beth Hoglah, Emek Kejij,

²² Beth Arabah, Jemaraim, Bethel,

²³ Abbim, Parah, Oprah,

²⁴ Kepher Ammoni, Ophni delokke Geba. Sikesi idumsula doolung améng nemte hantaksula íying kolang annyiko ito.

²⁵ Gibeon, Ramah, Beeroth,

²⁶ Mijpah, Kepirah, Mojah,

²⁷ Rekem, Irpeel, Taralah,

²⁸ Jelah, Haeleph, Jebus (emnamde Jirusalem), Gibeah delokke Kiriath Jearim, sike sokke teyolo doolung aména kídíemte handumsula, íying kola appiko ito. Sikesi Bénjamin kídíke pínmík-ramíkpe yébomnam doolung kídíe.