JOSHUA 17 - DEENA BAIBÉL (BSI)

Anggodan Manassehe

¹ Jordan korong lokke anggodanlo, among ayoko Josephke oo obíng Manasseh kepe panbito. Gileadke abu Makhir bí, Manasseh ke oo obínge, delokke sipaying ruutume. Depeila Jordanke sanggodan Gilead delokke Bashan amongem Manasseh kíng panlíkto.

² Jordanke anggodan among abídem, Manasseh ke abíd erang kídílo panlíkto: Abiejer, Helek, Asriel, Shekkem, Hepher delokke Shemida. Bulu Joseph kelok lenna, Manasseh ke otíng-oyin oo kídíe, delokke opín-buang kídíke dumpong kídíe.

³ Buluke aralo, Manassehke oo Makhir, bíkke okunam Gilead kelok olenkunam Hepher ke oo Jelophehad bí oo kamato. Bí ome petome oto. Ome kídíke amíne: Mahlah, Noah, Hoglah, Milkah lang Tirjah.

⁴ Bulu miri Eleajar kíngla, Nunke oo Joshua kíng delokke Israel lok miro kídílo gíla poto, “Ngoluke bíro kídílo lekope ngolute among paadope Ruutum bí, Mosi kíng lulígto.” Depeila, Ruutum ke lulígnam tuubupe bulumte buluke bíro kídí akampe amongem orto.

⁵ Ome kídíem, oo kídílo among ornam kísape orlíknam legape, Jordanke sanggodan Gilead delokke Bashanem pangko teyolo Manasseh bí among moolop íying ngatna kokai abídem pemílo paapekyato.

⁶ Gilead amongem Manassehke otíng-oyin abídlo pan-yinlíkto.

⁷ Manassehke among rísude, Shekkem lokke sanggodan Asher lokke ilenla Mikmethat loope pííto. Delo Entappuah ami kídí emte itaksula rísude sokko danpe toktoku.

⁸ Tappuah asi-amongde Manasseh kepe ito. Idola Manasseh lokke rísulo duuna Tappuah doolung dedan Ephraim ami kídí kepe ito.

⁹ Delokke rísude Kanah emnam rojik delo itokto. Rojik delokke sokko danlo duuna doolung kídíde, Manassehke rísu aralo duudagakom, dekede Ephraim ami kídí kepe ito. Manassehke rísude rojik delokke línggíngdan delo gíla Among Raadang Siyénglo ilíkto.

¹⁰ Rísu delokke sokko danlo Ephraime kato. Línggíng danlo Manassehe kato delokke anggodan rísu duurípe Among Raadang Siyéngde ito. Rísu delokke línggíng anggolo Issakhar amonge kato.

¹¹ Issakhar kelang Asherke yéta aralo: Beth Shan delang Ibleam doolung bottena annyi delang, deke delokke ayir-ago doolung kídíde, delok teyolo Siyéng robengke doolung akonpe Dor delang, Endor, Taanakh, Megiddo delang deke delokke ayir-agongke doolung kídíde Manasseh erangke doolung kídípe ito.

¹² Idola Manasseh kídíde delo duuna ami kídíem monpak lamato. Depeila silo loope de Kanaan ami kídíde doolung kídí delo duudung.

¹³ Idola Israel kídíke ralya momorodem, Kanaan ami kídídem bulu monpakmape, buluke béérangpe bulum yémoto.

¹⁴ Joseph kelok lenna opín-buang ami kídíde, Joshua kíng aala roguto, “Kape no ngolum among sokke alop atel petomko ngolu kepe panbikan? Ruutum bí utepooroem rulík kolok ngolu amie bojé aloodung.”

¹⁵ Delo Joshua bulum poyansuto, “Nolu amie bojé aloodumílo delokke noluke adi amonge anyong aloodumílo, Rephaim kelang Perijjit kídíke amonglok moonamem pabínla dunga bomlangka.”

¹⁶ Bulu poyansuto, “De adi among deteng ngoluk legape atíngmayé, delok teyolo Jejreel yiibe lolang Beth Shanlo duuna Kanaan ami kídíe lang deke delokke ayir agolo duuna doolung kídíke ami kídíe aremlok pínam gaari kadung.”

¹⁷ Delo bulum Joshua poto, “Nolu arope milung aloodung, delokke miram amipe idung. Depeila nolu among moolobem bojéyape paayé.

¹⁸ Adi among kídíde noluke. Deke delokke moonam kídíem nolu ikutla dunga bomlangka. Kanaan ami kídíde arem gaariem bomdagakom, delokke bulu miram amipe idagakom bulum monpak langka delokke nolu bulum monpakyé.”