JOSHUA 14 - DEENA BAIBÉL (BSI)

Jordanke Anggodanem Orpanbosuname

¹ Supakke si, Jordan korongke, anggodanke Kanaan amongem Israel kídí aralo, opín-buangpe orpan bosunam legange. Asi-among dem, Nunke oo Joshua, miri Eleajar delokke Israelke opín takamke ruutum kídíe lekope, ami kídí teyolo orto.

² Ruutumke, Mosike teyolo lulíknam tuubupe, bulu opín konang kolang, opín arotkonke asi-among yétaem lotoripe ila orbosuto.

³ Kapeila Mosi bí kerapekai, Jordan korongke sanggodan deme, opín annyi emlang opín arotkonem buluke tarongpe orbito. Idola depe ordo deloteng Lebi opínem among tarong orbimato.

⁴ Joseph kelok lenna Manasseh lang Ephraim bínyike opín annyi kope ito. Lebi kídíe among tarong paamín gemato, idola buluke duupeko doolung kídí emlang taro kídíke yégo peko moolop kídí petomem paato.

⁵ Sikepe Mosi kíng Ruutum ke lulígnam tuubupe, Israel kídíe asi-amongem panbosuto.

Hibronem Kaleb Kíng Panbiname

⁶ Sikepe idudelo, Judah opín lokke ami ayoko Gilgal notko delo Joshua kíng aato. Delo Kenijjit pínmík arang lokke, Jephunneh ke oo Kaleb bí Joshuame poto, “Kadesh Barnealo, Shédíke ami Mosike teyolo Ruutumke, nokke lang ngokke legape ponamem no kénsudung.

⁷ Kadesh Barnea lok asi-among tabung sim rokang goodope, Ruutum me agér ibina Mosike ngome lulíg dodem, ngo takying appiko ido. Delo ngokke amigsok arorupe kaanamem deenampe pobitoku.

⁸ Idola ngokkíng gímín gena bíro kídíde, buluke agom-aang pokunamlok ami kídí aapí-aangem yagorupe pesomoto. Idola ngo agísue Ruutum ngokke Shédíke lulígem apíírupe ibito.

⁹ Depeila delo longe delo Mosibí ngome sikepe togesubito, ‘Ingkona amonglo nok ale tuatodí, de nokke yébom kupenam amongpe iyé. Deme nokke ome-oo oten-siirek loope yéyarbomyé, kapeila no Ruutum ngokke Shédíke agom-aangem apíírupe igeto.’

¹⁰ Depeila, Israel kídíke yépol mooruk amonglo magoodungem, Mosike teyolo Ruutumke podo delokke ila supak loope Ruutumke togesunampe bí ngom takying appi kolang takngokope turmotung. Kaatola, silo ngo noluke araso, dítak íying píínyi kolang dítak pilngona mijingpe ila dagadung.

¹¹ Mosike ngome lulígdo longe delokke kísa, silo loope ngokkíng tolnam-ralname kadungada.

¹² Delo longe delokke Ruutumke togesunam adupe sim adi among sim ngom bilangka. Delo longe delo no agísuete, migo-mimat Anakim ami kídíe yédung, delokke buluke doolung kídíem língkum kumgongsula botterupe doolung kídíem ila bulu duudung emnamem tatsuto. Idola Ruutum bí ngom iguldung. Bíkke pokorpe, ngo Anakim kídídem monpakyé.”

¹³ Delo Jephunneh ke oo Kalebke teyolo, Joshua bí utepooro agomem lulígla, bíkke yébompenam asi-amongpe Hibronem bím bito.

¹⁴ Ruutum, Israelke Shédíme airupe míngkesula tatbikolok, silo loope Kennijjit pínmík lokke Jephunneh ke oo Kaleb ke yétape Hibronde ikai.

¹⁵ Sok kerape Hibron dem Kiriath Arba (Arbake doolunge) emdungai. Kapeila Arba bí migo-mimat Anakim kídíke aralo miram yalumna akonpe ituai. Sikepe irongem asi-amongde eetet-monetpe, mimak kaimape itoku.