JOSHUA 13 - DEENA BAIBÉL (BSI)

Asi Among Laapenam kídíe

¹ Deddína dítagem yéla Joshuake mijingrodem, Ruutum bí Joshua me lupoto. “No mijing alongkai, idola supakte deddína asi-amongem lapename kadungada:

² Philistia among kídíe lang Geshur amonge;

³ sokkodanke Abbim kídíke among takame. Ijipt lokke sanggodan Shihor roojik lokke ila, línggíng danke Ekron among loope. Sim tabung sim Kanaan amipe sandung. So araso Philistia lokke Gaja, Ashdod, Ashkelon, Gad delokke Ekron doolung luunem yébona Philistia roja pilngoe kadung.

⁴ Sikesok teyolote, Kanaan among de Sidon ami kídí ke Arah (Mearah) lokke mootengoolo duuna Aphek loope, de Amorit kídíke among rísulo kadung.

⁵ Delokke Gebal ami kídíke among kídílok ilangala, Hermon dííte sokko danke Baalgad lok irek lenlangkula, Lebanonke sanggodan tabungde ilangala, Hamath dííte begot loope karídung.

⁶ Lebanon adi among lokke ila, Misrephoth Maim loope duuna ami kídí emnamde Sidon ami kídíem, ngo agísue Israel kerape monpak biyé. Nom ngo kape kísa poyiltodí, dekepe sim among kídí simkom Israel kídíe yébomdope, bulum orpan subilangka.

⁷ Sikepe orpansunam sim no Manassehke opín arotkon emlang Israelke opín konang araso ilangka.”

Jordan Sanggoke Amongem Orpansuname

⁸ Manassehke opín arotkone lang Gad kídíe, delokke Reuben kídíe, Jordan korongke sanggodandem, Ruutum me agér ibina Mosike panlíknampe bulu paato.

⁹ Buluke among rísue Arnon kobung duurí Aroer lok ilenla, kobungke raadalo duuna doolung delok sanlangala, Dibon loope itaksula, Medebake gíílíng-géjongpe ina among takamde ito.

¹⁰ Si Ammon kídíke rísu loope duurína, Amorit roja Sihonke Heshbonlo duudola yébomko doolung tabungem itaksudung.

¹¹ So araso, Gilead amongde, Geshur amongde, Maakah amongde, Hermon dííte, delokke Salekah loope karína Bashan among takamde,

¹² sipe emnamde, Astaroth lolang Edrei lok rojape yébomna Bashanke Og rojake asi-among takamde (bí migo-mimat Rephaim kídíke yétíl yalumna akone); Mosi bí deke delokke ami kídíem mimaklo ikumla, buluke asi-amongem laayinto.

¹³ Idola delo longe kídí delo, Israel kídíe Makah kelang Geshur ami kídíem, mimak ila monpakmato. Depeila silo loope bulu Israel gooralo duudung.

¹⁴ Idola Lebi opíndem Mosi bí among ormato. Kapeila Ruutum ke Mosime políknampe, Ruutum Israelke Shédíkíng romnam aman ilíknam tabungdem buluke adusupe Mosi bí tolíkto.

Reuben Opínem Tolíknam Amonge

¹⁵ Si asi-among kídísi, Reuben opín pínmík ramíkpe Mosike panlíkname:

¹⁶ Arnon kobung duurí, Aroer lok ilenla kobungke raadalo duuna doolung dem itaksula, Medeba lokke Heshbon loope edítko gíílíng-gééjongna dííte amonge kadudí deke takamde;

¹⁷ delokke sok araso duuna doolung takame lang, si doolung kídísi: Dibon, Bamoth Baal, Bethmeon,

¹⁸ Jahaj, Kedemoth,

¹⁹ Kiriathaim, Sibmah, Jareth,

²⁰ Bethpeor, Pisgah lokke etpang abuude delokke Beth Jesimothde.

²¹ Sike takam sokke dííte abuudelang yiibe among tabungdem Heshbonlo duudola, Amoritke roja akon Sihon bí ruutum bomtuai. Sihonke yéta araso rojape ila bíkkíng makpépe imín gena Midian ruutum kídíke Ebi, Rekem, Jur, Hur delokke Reba bulum takam Mosi bí mimaklo ikumto.

²² Mimak ido delo mokanam kídí aradelo líímé-tagil ina Beorke oo Balaam bíte kato.

²³ Reuben kídíke anggodan rísue Jordan korongke robengde ito. Korong robeng abuuso duuna doolung takamde Reuben opín pínmík ramíkpe orpansula yébomnam asi amongpe ito.

Gad Opínem Tolíknam Amonge

²⁴ Si asi among kídí si Gad Opínem pínmík ramíkpe Mosike panlíkname:

²⁵ Jajer among takam dem, Gilead ke doolung takam demlang Rabbah anínlo duuna Aroer loope itaksula Ammon ami kídíke asi-among arotkonem,

²⁶ Heshbon lokke ila Ramath Mijpah delokke Betonim loope. Mahanaim lokke ila Debirke among takam loope.

²⁷ Sikesok teyolo yiibe among aralokke Beth Haram, Bethnirmah, Sukkoth, Japhon delokke Heshbon lokke roja Sihonke asi-among moolekonem emnamde Jordan korong sanggo robeng lok sanlangala Galil Siyéng loope.

²⁸ Sike takam sokke doolung takam delang asi-among tabungde Gad opínke pínmík ramíkpe orpansula yébomnam asi-amongpe ito.

Sanggo Manassehem Tolíknam Amonge

²⁹ Si asi-among si Manassehke opín arotkonem emnamde Manasseh kíng lenna erang arotkonem, pinmík-ramíkpe Mosike panlík biname:

³⁰ Bashan lokke roja Ogke yébomnam asi-among takamdem itaksula Mahanaim moole loope. Bashan aralo duuna Jair moole lokke doolung íying akké delang,

³¹ Gilead ke arotkone, delokke roja Ogke doolung bottepe inam Bashan aralo kana Astaroth lang Edreide. Sim asi-among tabung sim Manasseh kelok lenna Makirke oten ome-oo takamem, pínmík pelang ramíkpe orlíkname.

³² Edílo Mosibí Moab díítelo yégotodí, delo longe kídí delo bí, Jeriko kelang Jordan korong sanggo danke asi-among kídíeme sikepe jokpan sugebito.

³³ Idola Lebi opínem Mosi bí, asi-amongem panlíkmato. Sok ayanpe Ruutum Israelke Shédíke legape aman bomanam tabungde buluke paayar subompenam tarongpe Mosibí lulíkto.