JONAH 4 - DEENA BAIBÉL (BSI)

Jonahke Buuname Delokke Shédíke Ayange

¹ Jonah bí yagorupe buula marto.

² Dekepeila bí kumto, “RuutumA sikepe ikupenamem ngo kerapekai ekum lok gílen mang adapekai pomanía? Sikepe ikupenam emmin ngo kénto sula, Ispein among danpe dugnyok gepe ituane. Ngo kéndung no ayana Shédí, agínpe doojém jémgapne, agínpe ayang remyakne. Delo agínpe aapí-aang míngkup-míílatsuna, delokke adír bimane.

³ Ruutum supak ngom simo langka. Ngo turnamem pemílo sinamem aiyape míídung.”

⁴ Ruutum bí poyan suto, “No ingko marlíngko kadune?”

⁵ Jonah bí luune lokke sanggo danpe gínyokla, dungkengko mola, delo ugyum delo bí duuto. Delo Ninebide kapepak iyédín, dem kaape toyala duuto.

⁶ Delo Jonahbí aipe ugyumlo duuno sula duudope emla Ruutum Shédí bí kakí-yayo esingko saamoto. Esing ugyum delo duula Jonahbí esing dem gairupe mííto.

⁷ Idokom longekon lokke rokom ngargo delo, Shédíke lulíglok esing dem tapume dobomkai. Delo esingde sankai.

⁸ Delok rongem doonyie saarongem Shédíke ruulíklok sanggodan delok pamkina asare mudaato. Delo Jonah bí doonyi delo asar pamkina mutkolok pamkilok sita-simang igekai. Bí sinamde aiyang mííla, “Ngo turnamem pemílo siname aiyado,” emto.

⁹ Idola Shédíbí bím poto, “No esing delok legape marlíng dunía?” Jonah poyan suto, “Ngo margídung, delokke marka sulík dopeteng margídung!”

¹⁰ Ruutum bí bím poto, “Si esing si yoh atel lok saala, longe kondem nyokkaku. Nokke delo atí míípenam kamang. No dem ngésang-kaasana petemang. Idolate no delokke legape míídír dung.

¹¹ Dem pemílo Ninebi de luune bottenako. Delo akor kamana koo kídíe 120,000 em bojéyangko duudung. Depe simon-sili eteng bojéko kadung. Ngo dem kape ayangmape iyén?”