JONAH 1 - DEENA BAIBÉL (BSI)

Shédíke Lulígem Jonahke Tatmaname

¹ Longe konem Ruutumbí Amittaike oo Jonahme lupoto.

² Bí poto, “Botteruna luune Ninebi among elo gíkaala delo duuna ami kídíem pokan langka; bulu kape kísa atímana agér idudí ngo kéndung.”

³ Idokom Jonah bí delo among delo gímape Ruutumke keralok gínyokla, angu among danpe gípat suto. Joppa amo delo bí pííla kaatoname asi jajiko Ispein among danpe gípenako paato. Bí enre em dorpala, enpena ami kídíem lekope jaji delo renga bosuto. Depe Ruutum me gínyok gepe emla séguem rungkíto.

⁴ Delo Ruutum bí siyéng asilo gumnam botteko melíkla siyéng aside yagorupe sipar taala, jaji de betta-betmang ikai.

⁵ Jaji dem yutbomna ami kídíde yagorupe pesolok ulo gogla agí-agí míngkeng sunam shédíem kumsuto. Delo jajide etsang yala jiilum madope emla ekuserang ayokonem asilo bulu yoplíkto. Depe idudem Jonahbí rumkíng yalum dungko pírtek delo ipduai.

⁶ Jaji delokke ruutumde bím delo ipdope kaala ííto, “Kape no ipdune? Gerepla nokke míngkesunam shédíem ngolum iguldope kumsutola. Bí ngolum ayang kaapala nyokmo madope.”

⁷ Jaji yutbomna ami kídíde buluke aralo lubosuto, “Kaju ngolu lotori sokí lajuka; sékoke deemang-amo lokdí ngolum sipe adír paamo dune.” Depe bulu líímé kaane Jonahke amíne lenkai.

⁸ Delo bulu bím ííto, “Sa supak ngolum pobika, sokke legape supak sékom lukayén? No kape ina koda? No ingko among lokda aadune? No ingko among lokke amieda?”

⁹ “Ngo Hibru amiko,” emla Jonah poyan suto. “Ngo among emla asiem pílenna, Ruutum teyong amongke Shédíme kumsune.”

¹⁰ Jonah bí kape kísa Ruutumke polík namem imape ipat sutodín, dem legang tabudem bulum poyin bisuto. Delo ami kídíde yagorupe peso dola pokai, “De botterupe yirí-pedínam agér kolalo no itone.”

¹¹ Delo gumnamde yago yayang ibomkai ila, bím ami kídíde íngkíto, “Gumnam sim motumpe ngolu kape ipedín?”

¹² Delo Jonah bí poyan suto, “Ngom asi so yoplík tola, delo gumnam sikom aiyéku. Ngo kéndung, nolum ngokke imem legape sikepe gumnam lamname adírpe ibom dung.”

¹³ Idokom ami kídíde jaji etkung dem moopídanpe yutlenpe raltí kíto; depe ilate gumnamde yago yayang ibom teteng kai. Depe ikolok bulu atí míngkén yimangkai.

¹⁴ Delo ami kídíde Ruutum kíng ulo gogdola kumto, “E Ruutum nom rogudung, sim ami sim petgaape, ngolum no bíkke midumem ramapeka; kapeila E Ruutum nomin nok míínam supe sikepe imo dakne.”

¹⁵ Delo bulu Jonahme joola asi delo yoplíkto. Depe irodem gumnamde tengap kaku.

¹⁶ Dekepe inam dem kaala ami kídíde yagorupe yirí-pedípe míngkai. Delo bulu Ruutum kelope ipan aman bila kumsula bík agérem gérpe emla toge suyinto.

¹⁷ Ruutumke lulíglok botteruna engo kone Jonahme métto, delokke Jonahbí engo akii aralo longum kolang yongumko duuto.