JOEL 3 - DEENA BAIBÉL (BSI)

Opín Takamem Shédíbí Kebang Lubomyéku

¹ “Edílo ngo Jirusalem emlang Judah em, mite-mirempe jémo yékudí,

² delo longe kídí delo ngo opín takamem, Jehoshaphat ke Yiibe delo laadum suyinyé. Delo buluke teyolo ngo kebangem baabomyé. Kapeila bulu ngokke ami kídíem, mibo amonglo monpan suyinla, ngok asi-amongem orpan suyinla ibosuto.

³ Bulu ngok ami kídí teyolo gíngkí-gíngo bosula, mimum-yaamé koo kídíem abílpe kola, notiipe imola, buluke asi-apong tínggang-dogape, agí-agí míídupe ipusilééto.

⁴ “E Tur lang Sidon, delokke Philistiake yéta kídí takame, ngokke teyolo íngkona aklíng koda kadun? Ngokke itonam legang kua nolu ngok teyolo edo radung kune? Nolu atíko kala edo radung kumílo, noluke ire areme, menarupe noluke dumpong teyolo ngo bilat suyéku.

⁵ Kapeila nolu ngokke uunem, baldín kídíem, delokke gairuna ekuserang kídíem líílangala, noluke kumpom kídílo mesiitoku.

⁶ Nolu Jirusalem lolang Judahlo duuna kídíem, mibo mooteng amonglo mibo minnompe yégoodope Grik ami kídílo konyokto.

⁷ Kaatola, noluke konyok líkko among lok, ngo bulume darngo sumoyéku. Noluke itonam ato-siro kídíem, ngo noluke dumpong kídílo ruulat líkyéku.

⁸ Noluke ome-oo kídíem Judah amilo ngo kolíkyé. Bulu, mootengoolo duuna Sabian ami kídílo koyon sulík yéku,” Ruutum bí sikepe polendung.

⁹ “Sim agom sim opín kídí tabulo gogyipe goggoo langka: ‘Mimak legape irung sulangka; miram kídíeme tomlangka. Sipaying tabungem laadum sula mimakpe iya molangka.

¹⁰ Noluke aal gurnana pang kídíeme demjépla, yoksape pílangka, delokke noluke kíglong-ngélonana eyok kídíeme gíníngpe pílangka. Ralmanete, “Ngo raldung,” emla manlangka.

¹¹ Menape, opín takame lomdum sula yiibe belo dumsu langka.’ ” E Ruutum, nok maglíngeme tokmo langka.

¹² “Opín takamem leemo sumola, Jehoshaphat ke Yiibe telo píídum suyin molangka. Delo Shédí ngo, rego miyoolo duuna opín takam teyolo kebangem baabompe telo duuyé.

¹³ Ali-aame minkai, katsik lok gatlen bomlangka. Aatola, onggur ayéme tujém jémmíklangka, kapeila alang kétpome bíídung. Alang edunge bíípok aloola biilen dubong, kapeila ami kídíke atímange yago alongkai.

¹⁴ “Íngkí-bengkí kuko yiibelo, sanam yimanam éjar-éjar amie kadung! Kapeila Ruutum ke Longe íngkí-bengkí kuko yiibelo píínín alongkai.

¹⁵ Doonyiem lang pooloem kaamo moyé, delokke takare angun yimayé.”

Shédíbí Bíkke Ami Kídílo Utepooro Biyéku

¹⁶ Jayon lok Ruutum bí uglen bomdung; Jirusalem lok líídor onam kísa bík adude dudlen dung; among elang talenge pesolok dandung. Idola dekena longe kídí delo, bíkke ami kídí legape Ruutum bí rusi sukepe iyé, Israel kídí legape duupí suge peko lííne-lííreng ekumpe iyé.

¹⁷ “Delo Ruutum noluke Shédí ngo, ngokke deena díítum Jayonlo duudung emla nolu takam kényinyé. Jirusalem de deena doolungpe iyar yéku, delo miru kídíe edílokom aabom yimayé.

¹⁸ “Dekena longe kídí delo, dííte kídílo, onggur ane garyin saabom yéku. Díítum kídílo gooru-sobéne yéyin bomyéku, delokke Judah among lokke sirung kídí takame, asi kayin yéku. Ruutumke Kumkeng Ekum lok korong ko bilenyé, delokke de Akasia Yiibe em asi biyé.

¹⁹ “Idola Ijipt besi yépolpe iyé, delokke Edomde moorukpe batyéku. Kapeila bulu Judah amonglo mimak iabomla, siidum-dengepe yésuna ami kídíem moka kayinto.

²⁰ Judah among dem agínpe amie yéyar bomyéku, delokke Jirusalemke ami kídíe, siirum-siirum lope turyaryé.

²¹ Kapeila ngo iyyi líítonam kídíke, edoem rabiyéku. Imemna midum atel kokom mepak mayé, Jayonlo Ruutum bí duudung.”