JOEL 1 - DEENA BAIBÉL (BSI)

¹ Pethuelke oo Joel kelo Ruutum ke agome pííto:

Ali-ayéem Pemír Kídíke Aabomname

² Abu-mine takam nolu, delokke Judah among so duuna ami takam nolu; sim agom sim tatgap langka. Sikena agéreke noluke buku kídíke longe lolang, noluke yédoso ikítonía?

³ Noluke ome-oo kídílo legí-sigang kídí sime pokan bilangka. Noluke ome-oo kídíde, buluke ome-oo kídílo pobi kupe aido, delokke oten ome-oo kídíde, buluke oyon remé sukunam siirum kídílo poyon subipe aido.

⁴ Ali-ayé aam kídílo pemír-mírbame yoba bomla, mírbam kone dorongem mírbam kone, aabom langkula dobomla, delokke deke delokke gírongkuem, dongong kídíem anípe mírbam kone doang bomlang kula ibomkai.

⁵ Tíngír suna kídí nolu gerepla kaptola; apong legape nolu ankíla ulo gogtola. Kapeila noluke tíngku penam kídíem nyokyin moto.

⁶ Pemír maglínge, ngoluke amongem aabomkai. Bulume sanam yimang. Deke delokke iipang kídíe, delokke leyin-lakyin kídíe myomur simyo kísaneke.

⁷ Bulu ngoluke onggur ane kídíem siyin moto, delokke pik ane kídíeme rekka kayinto. Aag kídíe san-gedupe, asig kídíem kalyinto.

⁸ Ankí gasorem gela, atí-agolo milo sinyonam kídíke mimum meyéng ankí kísa, ankíla kaptola.

⁹ Kumkeng Ekumlo ali-ayé amanem lang tíínam amanem bipenam kaimang. Dekepe atí bipenam kaimala, miri kídíete ankí alongkai.

¹⁰ Arík kídíe atí kaimape rukyinkai; amonge teng erengkai. Kapeila ali-aam kídíe siyinkai, onggur ayé kídíe ere reyinkai, delokke olib esing kídíe sanyinkai.

¹¹ E arík ina kídía, nolu ankí-kenotola. Onggur ríkséng ina kídíe kaptola; kapeila géhu kídíe, anyat kídíe, delokke takam ali-ayé kídíe nyokyinkai.

¹² Onggur ane kídíe erengkai, donam tapang esing kídíe sanyinkai. Dalim esing kídíe, kejur kídíe, apél esing kídíe, delokke arík lokke esing takame sanyinkai; aropakpe ami kídíke ashéng-alenge kaimangkai.

¹³ E miri kídía, ankí gasorem gela kapla-rííla ilangka. Deena runggulo agér ina kídía, yagorupe ankítola. Yoh ruubungem Kumkeng Ekum aralo gíala, ankí gasorem gela ankí tola. Kapeila noluke Shédíke Kumkeng Ekum lok, ali-ayé aman binam kídíe lang tíínam aman kídíe kaimang.

¹⁴ Deena nyonamko gogyi lenla, kebang dumsuko tomla, kebang miro kídíem lang, Judah amonglo duuna ami takamem gogdum suyinla, Shédíke Kumkeng Ekumlo píídum suyin mola, Ruutum kíng kapgu-rogu molangka.

¹⁵ Ruutum ke longe píídak, de edítko reyub-runam longe kope iyén! kapeila de longe de, Ralya yalumna Shédí kelok atímana nyokdí longe kope de aayé.

¹⁶ Ngoluke ali-ayé kídíe, ngoluke kangkolo nyoklateng ngolu atí ilamang. Ngoluke Shédíke Kumkeng Ekumlo, ashéng-angam emnam atí kaimang.

¹⁷ Ali-ayé kídíde kédéng aralo ere líkdung. Depeila donam-tíínamem mesing penam kaimang. Kumsung kídíe suurompe iyinkai.

¹⁸ Simon-sili kídíe, dopenam kaimang kolok, yagorupe ankí-kenola muudung. Mér sobén kídíe teng keno lok sakkop lendung.

¹⁹ E Ruutum, nome ngo kapgu sudung. Kapeila neyi-neyang kídíem lang, moonam kídíem eme gukutkai.

²⁰ Asi sirung tabunge ooyinkai. Depeila moonamlo duuna simon-sili daadi takame, nokkíng kapgu sudung.