JOAN 7 - DEENA BAIBÉL (BSI)

Jisulang Bíkke Bíro Kídíe

¹ Depe irongem, Jisu bí Galillo, Judia lokke mootengko amolo yéperung yényok geto. Kapeila delo Judai amikidíe bím petpe emla tobomto.

² Idokom edílo Judai kídíke ippo gíídíe pííníntodí,

³ delo Jisuke bíro kídíe bím poto, “No sim megeyéla nokkelo luyilsuna kídíe nokke irisinyo inamem kaadope Judialo gíkupene.

⁴ Sékodí ami kídílo ami arope ipe míídudí bí agérem isup sumang. No sim atí kídar sim idubonade, tani amoso agísuem lengkan sutola.”

⁵ Legade bíkke agí bírokídi; pagete bím arope míímato.

⁶ Delok legape Jisu bí bulum poto, “Ngokke moodí arue píímangada; noluke legapedan moodíe duuyar sudung.

⁷ Tani amonge nolum belum mang, idola ngom belumdung kapeila sokke atímana agér inamem ngo hakii bidung.

⁸ Nolu domanlo gídung idola ngo so doman so gímayé, kapeila ngokkepe moodí arue píímangada.”

⁹ Sikepe podula bí Galillo duupoto.

Aranlo Jisuke Duumín Gename

¹⁰ Depe idokom, bíkke bíro kídíe aranlo gírongem, bíte pesuppe gíto.

¹¹ Depe iduem doman aran delo Judai kídíe bím matala “De amide ingkoloi” emla íngkídungai.

¹² Milung aradelo bíkke legangem posi porumsula inamílí ito. Ayokone, “Bí aina amiko” emla poto. Ayokone poto, “Demang, bí ami kídíem yaddung.”

¹³ Idokom sékote Judai kídíem pesola amie tatbe dope bíkke legangem pomang.

¹⁴ Donamem raadape dodung amodelo Jisu bí kumkeng ekumlo gíla ngiitomem poboto.

¹⁵ Judai ami kídíe irisinyope mííla poto, “Si amisi porimape kape kísa siddípe kéndune?”

¹⁶ Jisu bí poyansuto, “Ngokkelok lenna luyilde ngokke agí sukemang. Ngom melíkna bíkke lokmin si aadune.

¹⁷ Séko Shédíke míínamem ipe míídudí bí ngokke luyilde Shédí kelokdí demangkom ngokke sulokdí podune dem kényé.

¹⁸ Séko agí sukelok podudí bí agíem amín kamope emlamin podune, idakkom séko melíkna bíkke amín legape agér ibidudí, bí ami arue, bíkkíng menam yadnam kamang.

¹⁹ Mosi bí nolum Ayonem bimanía? Depe ilate nolu sékote ayonem bomna kamang. Nolu kapeila ngom petpe emla raltídune?”

²⁰ “No uyu genako” emla mibamde manto, “Séko nom petpe emla raltídune?”

²¹ Jisu bí bulum poto, “Ngo irisinyo atelko ibito, delo nolu arí anyope kaato.

²² Depe idola Mosi bí nolum dínbíng iyodem bikolok (arolok poyém si Mosikelok lenmang, idola buku kídí lokmin lentone), nolu ojingem Sabbath longelo dínbíng iyoddung,

²³ nolu ojingem Sabbath longelo dínbíng iyod ladumílo Sabbath longelo amiem apíípe ipíkunam legape ngom nolu kapeila marbom kane?

²⁴ Teyong kangkor pelok bisar namem melangka, delokke jonna bisarem matalangka.”

Messiahde Bía?

²⁵ Sok agomsok legape Jirusalemlo ami kídíe ayoko íngkíto, “Buluke petpe emla ruubom namde si ami simangía?

²⁶ Simoko de amide emla tatyin dope pokan duem, delo bulu gompil kote bím pomang. Ruutum kídíe Kristode bímin emla arope kénkanía?

²⁷ Idakkom edílo Kristo bí aayédí sékote bí ingkolok aayédí dem kénmang; delokke si ami si ingko lokdí lentone dem ngolu kéndung.”

²⁸ Delo Jisu bí kumkeng ekumlo luyil tetedula ukto, “Nolu ngom kéndung aro, ngo ingko lokkedí dem kéndung aro. Ngo agí mínggípe yésumang, idola ngom melíkna bí aronako. Nolu bím kénmang,

²⁹ idakkom ngo bím kéndung kapeila ngo bíkke lokke delokke bí ngom melíktung.”

³⁰ Sok legalok bulu bím umpe emla ralbomto, idokom sékote bím ukkímato, kapeila bíkke moodíe píímang ada.

³¹ Depe idokom milung delokke deddína amie bíkkíng míngkesuto. Bulu poto, “Edílo Kristo bí aayékudí, delo bí irisinyo iyodem sim ami sim penem bojéyape iboyédí?”

Jisume Umdope Sontori Kídíem Melíkname

³² Pharisi kídíe milung kídíem bíkke sikena legangem lugedope tatla bím umdope emla sontoriem melíkto.

³³ Jisu bí poto, “Ngo nolukíng ool yémayé, delokrongem ngo ngom melíknalo gíyéku.

³⁴ Nolu ngom matayéku, idakkom nolu ngom pangku mayé; delokke ngo ingkolo duududí delo nolu aalamayé.”

³⁵ Judai kídíde aralo pobosukai, “Ingkolodí si ami si ngolu paalang kuma dope gíkupe míídune? Grik amolo ngoluke ami kídíe rego regolo duula Grik ami kídíem luyilko amolodí bí gíyéne?

³⁶ Bíkke ‘Nolu ngom matayéku, idakkom nolu ngom pangkumayé delokke ngokke dungkolo nolu aalamayé’ emnam agomde kape emnamedí?”

Turnam Bina Sirunge

³⁷ Méélam yalum longe delokke botte yalumpe aran dodí longelo, Jisu bí dakdola bottepe poto, “Asi tíílína amidem ngokkíng aala tíímotoka.

³⁸ Séko ngom arope míídudí, Dooying kitabe ponam kísape turna asi sirunge bíkke aralok lenyé.”

³⁹ Bíkke depe emnamde, bím arope míngkesuna kídíe méélampe pangku penam Aidem emdung. Jisume angun ralnamlo laalík kumangada iname, delo longedelope Aidem bimangada.

Amikídí Aralo Apan Aran Iname

⁴⁰ Bíkke agomem tatla, ayokon amie poto, “Berokrupe si ami si kaaluna miriko.”

⁴¹ Abíde pokai, “Bímin Kristo.” Ayokon abíde poka teteng, “Kristo bí kape kísa Galillok aapene?

⁴² Dooying kitabe Kristo bí Dabidke erang odonglok aayé delokke Dabidke dungako taon Bethlehemlok lenyé emla pomanía?”

⁴³ Dekepe ila ami kídíe Jisuke legalok apan aran ito.

⁴⁴ Ayokone bím umpe emla mííto, idola sékote alag píngana katomang.

Judai Ruutum Kídíke Aro Míímaname

⁴⁵ Méélam yalumpe sontori kídíde ríne kídí lolang delokke Pharisi kídílo gílat sutoku, bulu “Nolu kapeila bím umla bomang kumane?” emla ííto.

⁴⁶ “Sékote sok amisok kísape pona luna kamang” emla sontori kídíde pokanto.

⁴⁷ “Noluke depe emnamde nolumte bí yattonía?” emla Pharisi kídíe íngkíto.

⁴⁸ “Yébo dakbona ruutum akone demangkom Pharisi akone bím arope míínako kadunía?

⁴⁹ Depe míína kamang! Idakla si atí ayon kénmana mibam simino bulukíng gérmange dung.”

⁵⁰ Kerape Jisukíng gína delokke buluke aralokke akon Nikodim bí íngkíto,

⁵¹ “Ngoluke ayone amidem ingkoko bí imemdudí dem gakdope kerape tatkí kangkí poomape ajéng luket sémdunía?”

⁵² Bulu poto, “Nokom Galil lokkía? Sim kaasutola kaaluna miride Galillok lenmayé emnamdem paayé.”

⁵³ Delokrongem mipil miyonge agí ekumpe gítoku.