JOAN 18 - DEENA BAIBÉL (BSI)

Jisume Umname

¹ Jisu bí kumnamem kumyin rongem, bí bíkkelo luyilsuna kídíem gíbosula Kidron korongem kooto. Rotkon delo baganko dungai, delo bílang bíkkelo luyilsuna kídíe gíto.

² Delo bím míírí míínyona Judas bí dem amodem kéndungai, kapeila Jisu bí leko leko luyilsuna kídíem duubosula delo duudungai.

³ Dekepe iname Judas bí sipaying apééko, ríne kídí lokke amie kelang Pharisi kídíeke ayoko gíbola delo bagan delo aato. Bulu bijuli, meru delokke gíníng yoksa bomla gíto.

⁴ Jisu bí agílo ingko ingkuedí pííyéne, dem kénru sudola, gílenla bulum íngkíto, “Sékome nolu matadune?”

⁵ “Najareth lokke Jisume” emla bulu poyansuto. “Ngomino bí” emla Jisu bí pokansuto. Delo míírí míínyona Judaskom bulukíng dakbo sudungai.

⁶ Jisu bí “Ngomoko bí” emyéname, bulu gílat sulangkula amolo oletto.

⁷ Lekoda bí bulum íngkíto, “Sékome nolu matadune?” Delo bulu pokai, “Najareth lokke Jisumena.”

⁸ Jisu bí “Ngo nolum ngomoko bí emsuto” emla poto. “Nolu ngom mata dumílo sim ami kídí sim gímotoku.”

⁹ Bíkke agom ponam kídare apíínape sikepe ikai: “Nokke ngom binamem atelkote ngo nyok momang.”

¹⁰ Delokrongem Simon Pitor bí yoksadem satsula ríne ruutumlokke béérang ruubígem papakto. Béérang delokke amínem Malkos emdungai.

¹¹ Jisu bí Pitorme ngiitomto, “Nokke yoksem melat suto langku! Ngo Yayike binam batiem tííma yénía?”

Annake Keralo Jisume Aaboname

¹² Delokrongem sipaying opéé delang lulíkna ruutum elang delokke Judai kotoki kídíe Jisume umto. Bulu bím yééla

¹³ delokke delo dítag delo ríne ruutumpe ina, Kaiaphake ato Annakíng bím kerape aaboto.

¹⁴ Kaiapha bímino ami kídí legape midum atelko sigemílo aiyé emla Judai amikídíem ngiitomnade.

Pitorke Possuname

¹⁵ Simon Pitorlang luyilsuna akonko Jisukíng mamín gedungai. Si luyilsuna akonsi ríne ruutumlokke kangkén namko, depe ila bí Jisukíng ríne ruutum tunggu lope gímín geto,

¹⁶ idola Pitor bí ekum gíídalo dakyape aikai. Ríne ruutumke kénnam luyilsuna ami akonde, lenlangkula delo kaabomna mimedem popala, delo Pitorme aralo langaato.

¹⁷ “Berokpe no sok amisokke luyilsuna ami akon mangkua?” emla eyab delo dakbomna mimede Pitorme íngkíto. Bí “Ngomang” emsuto.

¹⁸ De ansinge idokuai, depe iname béérang kídí elang kotoki kídíe buluke pamsudope mepom romnam delo pamsula dakto. Pitorteng bulum dakbosula, agí ete pamsula dakto.

Ríne Ruutumke Jisume Íngkí Bengkíname

¹⁹ Depe iduem ríne ruutumde Jisume bíkkelo luyilsuna kídí legang emlang bíkke ngiitom legangem íngkí bengkíto.

²⁰ “Ngo tani amoso berokpe pokan tobong. Ngo agínpe kumkeng ekum kídarlo demangkom kumkeng ekumlo luyil poyilto, delo Judai ami kídí takame aato. Ngo atíkote leesupla pomang.

²¹ Ngom kapeila íídune? Ngokke agomem tatna kídíem tatkí topena. Ngo ingkuem potodí bulu berokpe kénsudung” emla Jisu bí poyansuto.

²² Jisu bí dekepe poyansuname, kotoki akonde bím mingmolok pito. “Dekepía ríne ruutumem poyan sudune?” emla bí poto.

²³ Jisu bí poyansuto, “Ngo atíko pomem tumílo, ingkuem pomem imem tudí ngom lubitoka. Idola aruem podumílo, no ngom kapeila kíddune?”

²⁴ Delokrongem yéénam dem yéénamrupe ríne ruutum Kaiapha kíng melíkto.

Pitorke Possuname

²⁵ Depe iduem Simon Pitor bí agíem pamsula dakdungem, “Berokrupe no bíkkelo luyilsuna kídí akon runge mai?” emla bím tatkí nako kato. Bí dem possudola, “Ngomang” emkai.

²⁶ Ríne ruutum akonlokke béérang, Pitorke nyorungem gatpaknam ami delokke aní bíro ami akonde bím lukísuto, “Bíkkelo lekope baganlo duudope nom ngo kaamape ito langa?”

²⁷ Lekoda Pitor bí possukai, delokke delo anyo delopak peroge kokkai.

Pilatke Keralo Jisuke Dakname

²⁸ Delokrongem rokomope Kaiapha kelokke Rom Gobornorlo Jisume gíboto. Judai ruutum kídíe gobornor ekum aralo aamato, kapeila bulu gíbong gíídí domanem dopala, agíem deenampe mesupe emla mííto.

²⁹ Dekepe iname Pilat bí gílenla íngkíto, “Ingkona ajéngko nolu sim luket líkdune?”

³⁰ Bulu poyansuto, “Bí imemna ami manga mílo nokkíng ngolu bím melíkgíng kamang.”

³¹ Pilat bí pokai, “Nolu bím bomsutoka delokke noluke ayon sulok bím bisartoka.” “Idakkom ngolum séko mete pansaa nana ralnam bimang” emla Judai kídíe lupéé sukai.

³² Jisuke agí sigangem poyin subinam agom kídarem apíípe aromope emla sikepe ikai.

³³ Pilat bí delo agí dungkolo gílat langkula, Jisume tompala bím íngkíto, “Nua Judai kídíke Roje?”

³⁴ Jisu bí poyansukai, “De nokke míísunam agomía demangkom ami kídía nom ngokke legangem pobitone?”

³⁵ Pilat bí poyansuto, “No ngom Judai amiko emla míídunía? Nokke ami kídíde delokke nokke ríne kídí emino ngokkíng nom melíktune. Nokke inam atí kídíe ingkuekeda?”

³⁶ Jisu bí poyansukai, “Ngokke amode tani among sokkemang. Si sokkepe ituamílo, ngokke béérang kídíe ngom Judai amikídíe umdungem mimak imín suyai. Idakla supak ngokke amode angu konlokke.”

³⁷ “No demílo rojako ai!” emla Pilat bí poto. Jisu bí poyansuto, “No ngom rojakua emnamde arodung. Arope lumílo sok legapemin ngo tani amoso hakii bipe emla aatone. Arodanlok yéna miyonge ngokke agomem taddung.”

Jisume Pansaadope Luname

³⁸ “Arode ingkuedi?” emla Pilat bí íngkíto. Sim talla Pilat bí Judai ami kídídelo gílen langkula poto, “Ngo sim ami sim ajéng luket bompenam leríng paamang.

³⁹ Idakkom noluke ayonlok Gíbong gíídílo patek duuna amiko nolukíng ngo melen bikupe aidung. Nolu ngom ‘Judai kídíke roja’ sim melen mokupe míídonía?”

⁴⁰ Bulu bottepe gokpéé sukai, “Bím mang! Ngolum Barabbame melen bikui!” (Barabba bí ebín ikolo yémín genakuai).