JOAN 12 - DEENA BAIBÉL (BSI)

Bethanilo Jisume Tél Nyooname

¹ Gíbong gíídí longké kerape Jisu bí Bethanilo pííla, delo Jisuke sikolokke iturkunam ami Lajar bí duuto.

² So Jisume mínggela dotké iruuboto. Martha bí ibo saabola, Lajar bí dobosula duuna kídí lokke akonpe ito.

³ Delo Mari bí namporuna tél kootírlok anyongko laala, Jisuke alem píkat pala agí dumídlok alem nyoobín toku. Delokrongem ekumde nampona arí mílípe ikai.

⁴ Idakkom bíkkelo luyilsuna akon, Judas Iskariot, Jisume méélamlo míírí míínyo penade, dem agdola pokai,

⁵ “Sim arí nampona atísim kogeyéla murkongem opan kídíem kapeila bimane? Si dítag lokke hajirang adumko isudung.”

⁶ Bíkke sikepe ponamde opan kídíem ayang kolokmang idakla bí doppyo nakuai. Bí murkong gadum bomyanape iname delo menam abal lok agíem igulsuna dungai.

⁷ “Bím melíkto,” emla Jisu bí poyansukai. “Bíkke sikepe inamde sim nampona tél sim ngom yudí longetelo iruu napemin idune.

⁸ Nolu agínpe opanem yébo suyaryé, idokom ngom yéyar bosumayé.”

Lajarme Petpe Emla Ruuname

⁹ Depe iduem Judai amieke milungko Jisu bí Bethanilo dung emnamem tatla, delo bulu Jisu petomme kaape emla aamang, idola bíkke sikolokke iturkunam Lajar mete kaape emla delo gíto.

¹⁰ Dekepe iname ríne kídíe Lajar meteng petpe emla ruuto,

¹¹ kapeila bíkke legalok Judai ami kídíe bojé rungko Jisume míngkesula bíkkíng gímín gedungai.

Jisuke Mirampe Jirusalemlo Aaname

¹² Longe kondem Doman aranlo aana deddína miti milinge Jisu bí Jirusalemlo píídak emnamem tatto.

¹³ Bulu pam esing annem bomla bím yamrík kape gílento, bulu sikepe gokto, “Ríak daklangka!” “Ruutumke amínlok aanade gérne!” “Israelke Rojade gérne!”

¹⁴ Jisu bí gado ooko paala delo teyodelo duuto, dem sikepe attung:

¹⁵ “E, Jayonlokke omía, pesomapeka; kaatola nokke roje gado oo teyolo duula aadune.”

¹⁶ Kerape bíkkelo luyilsuna kídíe sim takam tatkén mangai. Jisuke angun ralnamem paarong emmin bulu sim atí takam sim bíkke legangem attung delokke bulu sim takam sim bím ibomto emla kénsu dungkune.

¹⁷ Depe idudelo mibamde Jisuke Lajarme agolok gakrep langkula, bím sikolokke gerep molangkula inam agomem potí gongkai.

¹⁸ Jisu bí sim irisinyo iyod sim ito emnamem tatla, deddína amie bím kaape emla gíto.

¹⁹ Dekepe ila Pharisi kídíe mipile pobosuto, “Kaatola si ngolum nyok modak. Kaalangka tani amosokke deddína amie bíkke méélamlo gíkane!”

Grik Ami Ayokone Jisume Mataname

²⁰ Depe iduem Grik amieke ayoko Jirusalemlo kumsukape gíne Doman aran longelo píído.

²¹ Bulu Galillo duuna Bethsaida doolung lokke Philipme aala íngkíto, “Saare, ngolu Jisume kaalínge idung.”

²² Philip bí Andriame poto, delo Andria lang Philip bí Jisume pokan bito.

²³ Jisu bí poyansuto, “Tanike Uem angun ralnamlo melík díkue píídakbong.

²⁴ Ngo nolum arope pobidung, ampilde kédelo olíkla yaalík mamílo, de ampil atelpe iyar abusula duuyaryé. Idakla de simílo, amíem bojéko parlen boyéku.

²⁵ Séko agíke turnamem aya sududí bí dem menyok suyé, idola tani amoso turnamem mepaksuna amide dem turyar pekolo bomsiiyé.

²⁶ Séko ngom kumdudí bí ngokke méélamlo gíperung aido; delokke ngo ingkolo duududí, ngokke béérang ekom delo duumínyé. Ngom kumnadem ngokke Abue mííyum sudung.

Jisuke Agí Sipenamem Pokan Subiname

²⁷ “Supak ngokke aapí ainasi míídírsue idung ngo kape pomíloi aiyén? ‘Yayie, sok moodí sokke ngom mosing toyika’ emmílua aiyén? Idokom sikena ankí keno lega pemin ngo aatone.

²⁸ Yayie, nokke amínem angun molangka!” Delokrongem teyong telok agomko lento, “Ngo angun ralnamem bito, delokke lekoda dem angun ralnamlo langaayéku.”

²⁹ Delo yéna milude dem tatla doomírko mírto emla pokai, abíde teyong kotoki komino bím luposutone emto.

³⁰ Jisu bí poto, “Si agomsi noluke ainam legang pemino, ngokke ainam lega pemang.

³¹ Supakmin tani amongem bisardíku longe; supak tani amosokke ruutumem monpakyéku.

³² Idokom ngom amosokke teyope laasa yékuem, ami takamem ngokkíng laanín suyéku.”

³³ Bí kape kísa siyédí demmin lengkan nape pobi sudune.

³⁴ Mibamde polenkai, “Kristo bí duuyaryé, emla Ayon kitablok ngolu taddung, demílo no kapeda ‘Tanike Uem berokpe laasayéku’ emkane? ‘Sékoda Tanike Oode?’ ”

³⁵ Delo Jisu bí bulum poyansukai, “Nolu angunem ool duubom mayé. Kaamue nolum aabom mangadape, angun dungadape nolu angunlo yélangka.

³⁶ Angunem nolu, duubom dungadape nolu angunlo míída sulangka, demílomin nolu angunke oope iyéne.” Dekepe Jisu bí poyinrongem, gíla bulu kelokke ruusigeto.

Amikídíke Míngkeng Píírame

³⁷ Sim irisinyo iyod takam sim buluke kangkolo Jisu bí ibilate, bulu bím arope míngke sumato,

³⁸ Si Kaaluna miri Isaiahke sikepe ponam agomem apíídope emlamino ikane: “Ruutume, séko ngoluke ngiitomem arope míngke sutone delokke sékome Ruutumke ralnamem lengkanton?”

³⁹ Sok legape bulu arope míngke sumato, kapeila sim Isaiah bí regokonlo podungku:

⁴⁰ “Bí buluke amigem mingma moto delokke buluke aapíem mide moto, dekepe ila buluke amiglok kaapete kaalamang, demangkom buluke aapílok kénpete kénlamang, delokke ngo bulum ipí dokupe míílat pete sukumang.”

⁴¹ Isaiah bí sim sikepe poto kapeila bí Jisuke angun ralnamem kaala delokke bíkke legangem poto.

⁴² Depe ilate Judialokke ruutum kídíe bojéko bím míngkesuto. Idola Pharisi kídí legalok bulum kumkeng ekumlokke monpak kupelo emla pesola bulu buluke míngkengem pokan sumang;

⁴³ kapeila bulu Shédíke koyid empemílo tani lokke koyidem mííbayato.

Jisuke Agomsulok Bisarname

⁴⁴ Delokrongem Jisu bí bottepe pokai, “Séko tanie ngom arope míngke sududí, bí ngom petommang, ngom melík nemkom míngke sudung.

⁴⁵ Séko ngom kaadudí, bí ngom melík nemkom kaadung.

⁴⁶ Ngo tani amoso ngom míngke sune kaamolo duumadope emla angun kísape aato.

⁴⁷ Ngokke agom kídarem taddola dekedem bomgap mana tanidem ngo bisarmang. Legade ngo tani amongem bisarkape emla aamang, idakkom mopít kakupe emlamin aatone.

⁴⁸ Ngom tomana delokke agom kídarem torík sumana amidem bisar penako kadung; ngokke ponam agom pak simin yéyin longelo bím ajéng luyékune.

⁴⁹ Kapeila ngo agí míísa sulok pomang, idakkom ngom melíkna Abuemino sim kape kísa delokke ingko kísa pope aidodí dem ngiitom tune.

⁵⁰ Bíkke ngiitomde turyar pekolo gílíkdung emla ngo kénsudung. Depe ila Abue ngom pogedope polík namem ngo ingkuem podudí de arone.”