JOAN 1 - DEENA BAIBÉL (BSI)

Turnam Bina Agome

¹ Lendak delokai agome dungai, delokke de Agomde Shédíkíng dungai, delokke de Agomde Shédí bí.

² Bí kerayalum pekai Shédíkíng duuto.

³ Bíkkelok atí takamem píto, pínam takam si bíkke kékonlok pínam kamang.

⁴ Bíkkíng turname kato delokke de turnamde tani kídíke angunpe ito.

⁵ Angune kaamolo ngunkanto, idakkom kaamue dem kénmato.

⁶ Delo Shédíke melíknam amiko kato; bíkke amíne Joan.

⁷ Ami takame bíkkelok arope míngke suyépe emla bí angun delokke hakiipe aato.

⁸ Bí agísue angunmang, bí angun delokke hakii kootír pemino aatone.

⁹ Mipil taniem angun bina aro angunde tani amoso aatuai.

¹⁰ Agomde tani amoso yéto, delokke bíkkelok tani amongem pílate tani amonge bím kangkénmato.

¹¹ Bí agí amosulo aatuai, idokom agí amie bím torík sumato.

¹² Depe idokom bím toríksula, bíkke amínlok míngkesuna takamem, bí Shédíke ome-oope ilanana ralnamem bito

¹³ de ome-oode tani odong lokmang, demangkom mime milo míísu lokmang idola Shédí kelok lenna kídíe.

¹⁴ Agomde tanikope ila ngoluke gooralo duumín gekai. Ngolu bíkke angun ralnamem kaato, Abukelok ayang emlang aruem bomla aana angunlok ralna, Oo atelem kaato.

¹⁵ Joan bí bím hakii bito. Bí gokla sikepe poto, “ ‘Ngokke méélamlo aamín gena bí ngom pemílo botte yane, kapeila ngokke kerang pekai bí turla yéto’ emla ngokke pokannam amiemin si.”

¹⁶ Bíkke yanggonge bíísét kolok ngolu takame akon paarongem akone ayang igulem paato.

¹⁷ Kapeila ayonem Mosikíng bilíkto; yanggong elang arue Jisu Kristo kelok aato.

¹⁸ Sékote Shédíme kaana kamang, idola Abukelo duuna Oo atel demin bím lengkantone.

Joan Baptiske Ngiitome

¹⁹ Depe iduem Joanke hakiiye sikepe ito: bí sékodí dem íngkídope emla Jirusalem lokke Judai ami kídíe mirie kelang Lebi kídíem melíkto.

²⁰ Bí pobeng sugotmang, idakkom peebepe pobisula poto, “Ngo Kristomang.”

²¹ Bulu bím tatkíto, “Demílo no séko? No Elijah bía?” Bí “Ngo bímang” emto. “No kaaluna miridía?” Bí “Ma” emyansuto.

²² Bulu ííyin nape poto, “No sékoda? Ngolum melíkna kídílo pobi dokupe aruem pobisutola. Nokke agí legasuem pobi sutola?”

²³ Joan bí Kaaluna miri Isaiahke agomlok poyansuto, “Ngomin mootumlo ‘Ruutumke bedangem jonmolangka’ emla agom ponade.”

²⁴ Depe iduem melíknam Pharisi kídíeke

²⁵ bím íngkíto, “No Kristo petemang, Elijah petemang, kaaluna miri petemang, demílo no kapeila baptis idune?”

²⁶ Joan bí poyansuto, “Ngo asilok baptis idung, idokom noluke pénsamlo noluke kénmanam amiko dung.

²⁷ Bí ngokke méélampe aapena amie, bíkke leyuk aan emte ngo taaba mane.”

²⁸ Si tabusi Bethani doolung Joanke baptis iboko Jordan korong Sanggo danlo ito.

Shédíke Mérbenue

²⁹ Longekon dem Joan bí Jisume bíkkíng aanín dakpe kaala poto, “Tani amosokke paabem laabín bipena Shédíke mérbenuem kaasutola!

³⁰ ‘Ngokke méélamlo aapena amide ngokke kerapekai duubong’ ngokke embomnam de simino.

³¹ Ngo agíe bím kénmangai, depe idola ngokke Israel opínlo bím lengkan dope emla ngo asilok baptis ila aato.”

³² Delokrongem Joan bí sim hakii bidola poto, “Teyong telok Aide pekí kísape oila bíkkíng duudope ngo kaato.

³³ Ngo bím kénmayai, idola ngom asilok baptis idope melíkne ngom sikepe poto, ‘Aide tokla duulík dope nokke kaanam amide Deena Aidlok Baptis ipene.’

³⁴ Simin Shédíke Ue emla ngokke kaanamde delokke ngo hakii bidung.”

Jisukíng Kerayalumpe Luyilsuna Amikídíe

³⁵ Longe kondem Joan bí bíkkíng luyilsuna midum annyi konem yébosula yéto kukéng.

³⁶ Bí Jisume gídakpe kaayédem, bí poto, “Shédíke mérbenuem kaatola!”

³⁷ Luyilsuna annyikone bím depe podope tayyédelo bulu Jisukíng gímín geto.

³⁸ Ngéélat sukuname, Jisu bí bulum mamín gedope kaala, íngkíto, “Nolu ingkoko míídun?” Bulu pokai, “Saare (depe emnamde luyilbone), ingkolo no duudune?”

³⁹ Bí poyansuto, “Aatola nolu kaasudope.” Depe iname bulu gíla delokke ingkolo bí dudí dem kaato, delokke delo longedelo bíkkíng duubosuto. Delo íying baji dobong.

⁴⁰ Simon Pitorke bíro Andria bí Joanke agomem tatla Jisukíng gímín gena akone.

⁴¹ Andriake kerayalumpe inam atí akonde bíkke bíro Simonme paala, “Ngolu Messiah me paato” (depe emnamde Kristome) emla pobinamde.

⁴² Delokrongem bí Simonme Jisukíng aaboto. Jisu bí bím kaasudola poto, “No Joanke oo Simon. Nom Kepha emyé” (dem angukonpe atkuname Pitor.)

Philip Melang Nathanaelme Jisuke Tomname

⁴³ Longe kondem Jisu bí Galildanpe enpe emla mííto. Philipme paala bí, “Ngokkíng gímín getola” emto.

⁴⁴ Philip bí Andria delokke Pitorke akampe Bethsaida taonlo duune.

⁴⁵ Philip bí Nathanaelme paala poto, “Mosike ayon Kitablo atbomnam delokke kaaluna miri kídíe atnam Josephke oo Najareth lokke Jisume ngolu paato.”

⁴⁶ “Najareth lok aina atíko lendunía?” emla Nathanael bí íngkíto. “Aala kaato langka” emla Philip bí poto.

⁴⁷ Nathanael bí aaníndope kaayédem, Jisu bí poto, “Sina aropak Israel amide, bíkkelo menam yadnam kamang.”

⁴⁸ “No ngom kape kísa kéntone?” emla Nathanael bí tatkíto. Jisu bí pokai, “Nokke tapang ane rumkílo duudungem Philipke nom tommang adape ngo nom kaato.”

⁴⁹ Delokrongem Nathanael bí poto, “Saare, no Shédíke Ue; nomino Israel lokke Roje.”

⁵⁰ Jisu bí poto, “Ngo nom tapang ane rumkílo duuduem kaato emkolok no arope míídung. No simpenem botteyana atí siriem kaayé.”

⁵¹ Delo bí potemto, “Ngo nom aruem pobidung, no teyong among eyabem siyyadope, delokke Shédíke teyong kotokie Tanike Oolo tokdu saatokla idope kaayé.”