JEREMIAH 9 - DEENA BAIBÉL (BSI)

¹ Ah! ngok dumpoosi asi deerung kope iduamílo delokke ngokke amigsi asi sirungpe iduamílo, ngokke ami kídíke sinam legape loodí-yohdípe kaptíduape.

² Ah! ngo yépol mooruk amolo ippoko kaduamílo, ngok ami kídílok gínyokgela dunyok geduape. Kapeila bulu takam abír-ayo mílílo itígoola, míngkesumana milungeke.

³ “Menam-yatnam epugem apjina, iyyipe buluke nabbél kídíde idung. Amoso bulu arolok ikumla yémang. Bulu paab konlokke paab konlo itíla, ngome arope míngke suyimang,” emla Ruutum bí polendung.

⁴ “Noluke angong-arumem ansulangka, noluke bíro kídíem míída sumapeka. Kapeila angong-arum miyongde lupu-luléne, delokke bíro kídí takamde mekup-yatkupne.

⁵ Angong terenge yatmín sula sékote aro agom pona kamang. Buluke nabbél dem medo-yaddope iyil sutung, delokke bulu paab agérlo apéé kamang.

⁶ Jeremiah no megoo-yatgoona aralo yédung. Bulu mela-yatla Ruutum me mepaksukai. Ruutum bí sipe polendung.”

⁷ Sikepe itíkolok Ralya yalumna Ruutum bí sipe ludung: “Ngok ami kídíe paab itínam legape ngo bulum arem em yolmo kunam kísape ideeyéku delokke bulum ikang-darkang kíyé. Buluke teyolo simpemílo ingko yangkoda ibong yayén?

⁸ Buluke nabbél kídíde, menam lutíla reyubnam yokmo kísaneke. Bulu agí nappang lok agom-aangeme kumri-donggonglo remelope poyé, idola buluke aapí-aangde repe-sinyingke etku-edape idung.

⁹ Sikesok legape ngo bulume ajéng imayénía? Sikena ami kídí teyolo ngo edo ramayénía? Sikepe Ruutum ngo polendung.”

¹⁰ Dem talla ngo poto, “Ngo dííte kídí sokke legapelang asi-among kídí legape yagorupe kapla jérla iyé. Kapeila dekede erengkai, delo sékote gígong yimang. Delokke gooru mudud koteng tatpayimang. Pettang kídíete deenyokla, simon-sili tabunge manyok geyinkai.”

¹¹ Ruutum bí luto: “Ngo Jirusalemem kumruk byakruk kope imoyé, delokke ménsurung gípompe imoyé. Judah lokke doolung kídíem, yépol amope imolangkula, ingko taniete duula yimadope imoyéku.”

¹² Delo ngo ííto, “Séko amieda sime kénla tatkényén? Sékomemda Ruutum no poyilla lega takam sim poge bilayé emla míídun? Kapei asi-among si rukla, sékote gíla yimadupe yépol mooruk kísape ikan?”

¹³ Ruutum bí sipe poyansuto, “Ami kídarsi ngokke agomem tatmape, ngokke ayonlok yémape, idong takamem mepakla,

¹⁴ dekedelok ayanpe bulu agí aapi-aang toltílok buluke buku kídílok poyilnam tuubuem igela Baal uyume kumsu-joosula igalok sikepe ikai.”

¹⁵ Depeila Israel ke Shédí, Maglíngke Ruutum bí sipe podung, “Kaatola ngo sim ami kídar sim kosana apimem domola, emo líknam asiem tíímoyé.

¹⁶ Bulu lang buluke buku kídarke kénkímanam mibo amolo bulum ngo mapan-maran sumoyé. Bulu nyokyinma tetedem ngo yoksem bomla bulum mondan tete bomyé.”

¹⁷ Ralyayalumna Ruutum bí sipe podung: “Supak airupe míngíng sutokula! Pengé lujina mimem tomla pengé lutola.

¹⁸ Delo ami kídíe poto, ‘Ngoluke amig kídísi yagorupe kaptí kolok miksie yagorupe lenla, delokke ngoluke mikpísi kapkolok yalíla imatete loope bulume pengé miriem lutí bomdope menape gogalangka.’ ”

¹⁹ Jayonlo kapdud eke kakai: “Ngolu nyokkai! Ngolu yagorupe annyingkai, ngoluke ekum kídíe bényinkai, ngolu among soge gínyok lenpe aiyé.”

²⁰ Delo ngo poto: “E mime kídía! Ruutum ke agomem tattola. Bíkke polennamem noluk nyorung kídíde tatgaptola. Noluke ara lolang noluke ome-oo kídíem pengé miri lunamem luyil bosutola.

²¹ Sinam-nyokname ngoluke eyab kirkilok aala, ngoluke ekum kídí takamlo aayinkai. Dekede ome-oo kídíem bedu-bedalo, yaamé koo kídíem dukan-bojarlo moka kayin gongkai.

²² Aríklo haar legape guborem gekumnam kísape, aam em gatkum namem joosing mínna kamana kísape, ami simang kídíe dooyinyé. Si Ruutumke ngome podope políkname.”

²³ Ruutum bí sipe ludung: “Mirem amie miremem, miga-miramna amie miramem, kénna-paana amie kénnamem míngkímsula mííte sumapeka.

²⁴ Buluke aralo míngkím sunako kayémílote de amide ngom kangkénla, ngok ayonem kénjila mííte supe aido. Kapeila tani among so ngo ayangem lengkannako, jonnam emlang pénsam agomem lujibonako.”

²⁵ Ruutum bí sikepe polendung: “Amíl-amo petomem pídésula ina kídíeme itung-irédí longe píídak.

²⁶ De ami kídíde: Ijipt, Judah, Edom, Moab, Ammon delokke yépol mooruklo duuna abíd-abíd ami kídíe. De ami kídíde tukku raadang lok dumídem buluke uyu kídí legape ngíngosula aapí-aang aralok pídé sumang. Bulu kelo lekope Israel kídíete aapíem pídé sumape ngok daapong ayonem bommang.”