JEREMIAH 7 - DEENA BAIBÉL (BSI)

Jeremiahke Kumkeng Ekumlo Ngiitom Signame

¹ Sikesi Jeremiah kelo Ruutum ke agom pííname:

² “Kumkeng Ekum lokke eyablo dakla sim agom kídí sim pokanlangka: Ruutum me kumsu kape emla sok eyab sok gíana, Judah lokke ami takama, Ruutum ke agom sim tallangka.

³ Ralyayalumna Ruutum Israelke Shédíbí sipe ludung: noluke agér-anam ségu-siang kídíem isi-simo sulangkuka. Depe imílo nolum ngo so among so duudan tetemoyé.

⁴ ‘Simino Ruutum ke Kumkeng Ekume, Simino Ruutum ke Kumkeng Ekume, Simino Ruutum ke Kumkeng Ekume,’ emla sikena agom pobosula nolu yatna agom lubo sumapeka.

⁵ Nolu arope noluke yélot-daklot emla noluke ségu kídíem míísi-míímo sulangkula noluke aralo jonbo suyékumílo,

⁶ nolu meyéng kídíem, ane-abu kaimana ome-oo kídíem, delokke mibo-miying kídíem itung-iréla iyimayémílo, so moolop so dengompe yésunake yénamem mokagoola, uyu kumla agí atímangem ipaa-paanyoksula iyimayémílo,

⁷ ngo noluke bukuem tolíksunam amoso nolum agínpe duuyarmoyé.

⁸ “Idola kaatola! Nolu, nolum yatna agom kídílo míngkesula yétídung.

⁹ Noluke kénkímanam angu uyuem kumla, Baal uyume arí namponem nyotbila, yatna uyu kídílok pésugoola, abír-ayo igoola, moka goola;

¹⁰ dekepe igoopala, ‘Ngolu aidung,’ emla ngok amíne kako Kumkeng Ekum delo dagang langkula belumrupe inam kídíde airunedí?

¹¹ Ngokke amín kana Kumkeng Ekumde línggona kídíke rusi supompe iko ekumía? Idola ngo noluke inamem kaadung!

¹² Ngokke kerayalumpe ngok amínem duulíkmoko Shiloh doolungem kangkítola. Israel kídíe ngok agom tatmape atírumape ila kape kísape doolungem nyokmotodí dem kénlangka.

¹³ Noluke atímana agér inam kídí legangem ngo lukup-lulatsula lutíto idola nolu poyansumato.

¹⁴ Depeila nolumla noluk abu kídíem ngokke binam, ngokke amíne kalíkna, noluke míídíí subomnam Kumkeng Ekumdem kape kísa ngo Shilohlo itodí deke kísape ngo iyé.

¹⁵ Ngo kape kísa noluke erang Israelem itodí deke kísape nolumte ngo, ngok keralok monpakyé. Ruutum ngo podung.”

Ami Kídíke Agom Tatmaname

¹⁶ Ruutum bí ngom poto, “No ami kídí sok legape ngokkíng atí kumbi mapeka, rogubila agom atí pobimapeka. Kapeila ngo nome atí tatbiyimayé.

¹⁷ Judah among lolang Jirusalemke bedang kídílo buluke bíírík-hamgo mana agér inam kídídem no kaamanía?

¹⁸ Buluke teyong amongke rani embomnam uyu mimeke legape ome-oo kídíe esing gedumsula, abu-abíng kídíe eme parla, mime kídíe ettíng raabila, delokke ngom aklídope abíd uyu kídílote asi-apongem tonbila igoodung.

¹⁹ Idola ngom petomía bulu imardune? Bulute agísuem atímang ipaasulígla agí teyolo annyingem langa sulíkmanía?

²⁰ Depeila Ralya yalumna Ruutum ngo, ngokke marnamem so Kumkeng Ekumso, ami kídí teyolo, simon-sili kídí teyolo, ali-ayé kídí teyolo melígla, de marnam emede sékote imit laayimadope guyinbomyé.

²¹ Nolu romnam aman delokke abíd-abíd aman teyolo adínem itemla agísue dodung. Idola Maglíngke Ruutum, Israelke Shédí ngo, nolu dekepe imape apíngpe adín tabungem dotola emdung.

²² Kapeila edílo ngo noluke buku kídíem Ijipt amonglok laalenla agom luposuduem ngo romnam aman delokke abíd-abíd ipak legangem pomík goola lulígmang.

²³ Idola simmin ngo bulum lulígtone: Ngo noluke Shédípe delo nolu ngok amipe idope, ngok agomem tallangka, noluke yéname ai-kampodope ngokke luyilnam bedanglok nolu gílangka.

²⁴ Idola bulu aipe agom-aangem tatmape igeyéla, buluke atímana líídung aapí míngkorsupe bulu yésukai. Bulu keradanpe gímape méélamdanpe gílat sukaku.

²⁵ Noluke buku kídíke Ijipt amongem mela gílendoku longe delokke ila silo loope ngokke kaaluna miri kídíem nolukelo moodí-moodílo melík líktídung.

²⁶ Idola bulu letel kote aipe tatbila, mínggela ikímang. Supakke ami kídí sirange, noluke neku-buku kídíem pemílo pakyape aapí-aange tolla mirolpe rolneke.

²⁷ “Edílo sim agom kídí sim, Jeremiah no ami kídíem popayédí, bulu nom tatmayé, bulume gogdokom bulu elík líkyan sumayé.

²⁸ Depeila bulume, ‘Si ami kídísi, Ruutum buluke Shédíke agom-aangem tatmaneke delokke bíkke nyorung etnamem kangkén sumaneke. Aroe nyokkai, buluke nabbél lok arode kaimang,’ emla bulum lulangka.”

²⁹ “E Jirusalemke ami kídía! Noluke dumídem ngíbín sula elpak langka. Díítum teyolo nolu pengé miriem lulangka. Kapeila Ruutum bí mepakkai delokke, supakke siirum teyoso bíkke yagorupe aklíname kakai.

Hinnom Yiibelo Belumrunam Agér Inam Kídíe

³⁰ “Ruutum bí sipe lulendung: Judah lokke ami kídíe ngok kangkolo atírumana agérem ikai. Ngokke amíne duulíkko Kumkeng Ekumlo bulu belumrunam mimangem ilíkla bulu deme deema mokai.

³¹ Ngokke aapíso míngang kímanam, ngokke lulíg kímanam, agíke ome-oo kídíem Hinnom Yiibelo Topheth emnam rungguko píla, emelo romka líkdung.

³² Iname ansulangka! Longeko píídak, edílo ami kídíe deke rompomem Topheth demangkom Hinnom Yiibe emyimape Petkako Yiibe, emla luyé. Kapeila delo simang yukol kaimadupe simang kídíem bulu yutíyé.

³³ Dekepe idí longe delo ami kídíke simang kídíe pettang kídí keelang atímana simon-sili kídíke donampe iyé, delokke dekedem monpak bipena atí kamayé.

³⁴ Kapeila ngo, Judah among lolang Jirusalemke bedang takamlo, nyamran donam-tíínam, ashéng-angam miri ludud dekena adud-ayud atí kaimomayé, legade amongsi rongngamna moorukkope iyé.”