JEREMIAH 6 - DEENA BAIBÉL (BSI)

Jirusalemem Miru Kídíke Gargoobomname

¹ Benjamin ami kídía, dugnyok gelangka. Jirusalemlok dugpí sulangka. Tekoalo bikulem mutlangka, Beth Hakkheremlo mekanglok iyod bilangka. Kapeila reyubrunam adírpename lang atung-aréépename línggídan telok tokdak.

² Ngo kamporuna Jayonke ome em nyokmoyé.

³ Mér kaabomne, mérem gíbola, bím mimak ikape aala, rego miyolo agí-agí míngkorsupe maglíngke tombuem hola bíme dunggobomyé.

⁴ Bulu sipe embosuyé, “Menape mimak lemoem ilen laju, kaju longe raadangem mimak iya bomlaju.” Idola bulu sipe lubosuyéku, “Supak ikan yimang, yume kaabong, adenge iyala bodona ugyume píídak!

⁵ Iname kaju ngolu bíkke líísak etorem, kaamoso mimakpe iyala bénpaklaju.”

⁶ Maglíngke Ruutum bí sipe podung, “Jirusalemem mimak iyang bomdope, esinglok teela ebang etorpe isabomto. Doolung sime itung-irérupe aiyé, kapeila bíkke ipusilééname yagorungkai.

⁷ Kapekísa asi deerunglo asie bíísadudí, deke kísape bíkkíng atímange bíítísadung. Pamín-níkmín adude bíkkíng bíngkai, delokke bíkke kinam ramnam elang tarí-tapa kídíe, ngok kangkolo katí berokkai.

⁸ E Jirusalem, ngokke lutor namem tattola, demamílo ngo nokke lok moote langkula, sékote delo duuna kaimadupe, kumruk doolungpe imoyé.”

Mirolna Israel

⁹ Ralyayalumna Ruutum bí ngome sipe poto: “Onggur aríklok onggur ayém pílkut-píllutnam kísa Israelem ikutyé. Depe imangadape Jeremiah no edítko ilayédí deddíkope amiem ipíttoka.”

¹⁰ Ngo poyansuto, “Bulume ngo lutor godokom, sékoda ngokke agomem tatbiyéne? Buluke nyorunge tatpamang, rubédung. Ruutum nokke agomde buluke legape gomképe ila bulu erapmang.

¹¹ Ngo agísuete, bulukíng yémín gela nok marnam aralo kadung. Sikesim ngote hakjém gelayimang.” Delo Ruutum bí ngome poto, “Bedu-bedalo yéman goona koo aména kídí lolang dakdum-dakrumsuna yaamé kídílo ngokke marnamem purlík goolangka. Milo-mimem lekope umyé delokke mijing-ejo emkom mesammayé.

¹² Buluke ekumem, arík kídíem delokke mime kídíem, angukon amilo biyé. Ngo amoso duuna ami kídí teyoso sikepe adírem bilenyé.

¹³ Mine-koope, mipil-miyong amie abal paanam mííta-hakta mílílo ita tatídung, delokke kaalune lang miri kídíete ami kídíem yattígongkai.

¹⁴ Bulu ngok ami kídíke taríem aang kibom sumape pupu-mumupe elíkgoodung. Aapí-aang eetet kamaduemte bulu, ‘Aidung atí ebín-ebon kamang,’ emla lugoodung.

¹⁵ Buluke sikepe belumrunam agér kídíem bulu annying sumanadí? Ma, bulu atí annying sumang. Annying lok bulu migmo yalíng gepeteng gemang. Depeila edílo ngo bulum adír bilenyédí, delo bulu abíd ami takamke oletkolo bulute oletmínyé. Ruutum bí podung.”

Shédíke Bedangem Israelke Mepakname

¹⁶ Ruutum bí sikepe podung, “Nolu bedumlo dagdola kaatola, gaiyalumna bekuem matala delok gílangka. Delo nolu aapíe eetetpe yéyé. Idola nolu, ‘Ma ngolu delok gímayé,’ emla poyansuto.

¹⁷ Delo ngo nolum kaabom dope, kaabomnem ullíkla poto, ‘Miruke bikul muddudem tattola,’ idola nolu, ‘Ngolu tatmayé,’ emla lukai.

¹⁸ Depeila opín-buang daadi tabunga; ngokke ami kídí teyolo ingkona adíre aayédí deme kaalangka, tallangka, delokke hakiipe ilangka.

¹⁹ Among kédéngete tallangka! Buluke pakki-budii pakro bukanpe ire ayéme ngo bulum bidak, buluke teyolo itung-iré adírem ngo bomayé, kapeila bulu ngok agom tatmang, delokke ngok ayonem igemang.

²⁰ Bulu Shebalok arí namponem delokke mooteng amonglok, nampona sérangem boma bituakom ngo deme aipe kaayénía? Noluke romnam aman dem ngo torík sumang. Noluke ipak kídídem ngo ashé bommang.”

²¹ Depeila Ruutum bí sipe podung, “Ami kídí keralo ngo tupsupekuem leeyé. Deke delo abu-oope oletyé. Kumrí-donggong elang angong-arum tabunge lekope nyokyinyé.”

²² Ruutum bí sikepe ludung, “Kénpíng yimanam línggíng amolok, miga-miramruna opínkonem mimak lemoem ilenmoto. Depeila kaatola, línggíng dan telokke amolok sipaying maglínge tokbomdak.

²³ Bulu gíníng, yoksa, yokmo ityiem edíírupe leemo sulíkdung. Bulu mikíreke delokke ayang emnam kénmaneke. Buluke gurélok dugyéme siyéng asi muudud kísadung. E Jirusalem, nok teyolo bulu mimak ipe emla tobom lenkai.”

²⁴ Dem talla ami kídíde, “Midu-mimak legangem ngolu tatto. Depeila mime okii kinam kísa ngolu adírlok kilenkai, Ngoluke ale-alage lebya-lakbyangkai.

²⁵ Ngolu arík enpe, bedu-bedalo gígope, peso alongkai, kapeila miru kídíe mimak leemoem gelen kolok reyub runame ngolum gargoobomkai.”

²⁶ Delo Ruutum bí ami kídíem luyilto: “E ngok ami kídía! Ankí gasorem tulum sugela metbu molsutola; oo atel nyoknem kabbomnam kísa, yagorupe ankí-keno bomsula kapla ríílangka, kapeila menang asak nolume nyokmopene píídak.

²⁷ Jeremiah nome, aremem kapekísa ikang kídudí, dekekísa ngok ami kídíem ikang dope ngo lulígdung. Bulu kape kísana ami ekei, deme no kangkílangka.

²⁸ Bulu arem delokke pitol kísa tolla, aapí tolna mirol kídíeke. Bulu beibetope luge-poge mílílo lutígoola, aapíe deeyimangkai.

²⁹ Eme medung aralo eme yagorupe íírdungai, idola pakrang dem kampope yolmadada, delokke pakrang tayé lenmadada, atímana ami kídíem ikutmadada.

³⁰ Depeila bulume mepaknam baldíne emla manyé, kapeila Ruutum bí bulume mepakkai.”