JEREMIAH 52 - DEENA BAIBÉL (BSI)

Jirusalemke Oletkuname

¹ Jedekiah ke Judah lokke rojape iduem bíkke dítage takying annyi kolang takteldo. Bí Jirusalemlo takying kolang taktelko rojape ito. Bíkke ane amíne Hamutal. Bí Libnahlo duuna Jeremiah ke ome.

² Jehoiakim ke ikampe bíteng Ruutum ke kangkolo atímape yéto.

³ Sikepe atímape iga legape Jirusalem lolang Judahlo tong-aryange pííla Ruutum bí bulume bíkke keralok monnyokto. Jedekiah bí Babilon roja Nebukadnejjar ke mirupe mirol rollento.

⁴ Dekepeila, Jedekiah ke rojape dítak konang delokke poolo íying lokke longe íying nana delo, Babilon lokke roja Nebukadnejjar bí agíke sipaying maglíng takamem gíbola Jedekiah me mimak ikape Jirusalemlo ento. Bulu Jirusalemlo pííla doolung dem gargoobomna mimak etor torgoola, doolung delokke luyulo notkoem ito.

⁵ Dekepe doolung dem tobomla Jedekiah ke takying kolang taktelkope idoloope gargoola duubomto.

⁶ Delok dítak delokke poolo appi lokke longe konang delo, doolung delo dírí-kenoe yagorupe ila, ami kídíe dope-tíípenam atí kaimato.

⁷ Delo longe delo doolung delokke líísak etor dem bénto. Babilon sipaying kídíe doolung dem gargoo bomlate yueme Jirusalem lok sipaying kídíde dugnyok geto. Bulu roja lokke appun baariko delok gíla, líísak etor annyi tuprík suko eyab delok lennyokla Jordan korong yiibe danpe dugnyok geto.

⁸ Idola Babilon lokke sipaying kídíde monmín gela Jeriko ke anín yiibe delo bulum píípu mínto. Delo bulu Jedekiah rojame umto. Depe Jedekiah me umdodem bíkke sipaying kídíde bím mepak geyéla dugpan-dugran sugela iyin gekai.

⁹ Jedekiah rojame bulu Babilon roja Nebukadnejjar kíng bomatoku, delo Nebukadnejjar rojabí Hamath among lokke Riblah emnam doolung kolo notko ila duuduai. Delo Jedekiah ke teyolo Nebukadnejjar bí kebangem baato.

¹⁰ Riblah delo Jedekiah ke amig keralo bíkke oo kídí emlang bíkke mite-migom kídí takamem moka kayinto.

¹¹ Dekepe irodem Jedekiah ke amig annyi demte roolen geyéla bíme íkoli lok yééla Babilonpe enbotoku. Babilonlo Jedekiah bí bíkke sido loorí loope duuto.

Kumkeng Ekumem Nyokmoname

¹² Nebukadnejjarke Babilon lokke rojape takying kolang dítak konang delokke poolo pilngo lokke looying nana longe delo, Babilon lokke maglíng ruutum Nebujaradan bí Jirusalemlo aalíkto.

¹³ Bí Ruutum ke Kumkeng Ekum demlang rojake ekum kídí, delokke Jirusalem lokke abíd gaina ekum kídíem emepe rípakto.

¹⁴ Nebukadnejjar ke ukum lok Babilon maglíng de Jirusalem em bilgona líísak etorem bénpakto.

¹⁵ Depe irodem doolung delo dungkína opan runa ami kídí emlang dungkína mistri agér ijiina kídí, delokke Babilon lokke rojalo gíasulína kídíem Babilonpe enbotoku.

¹⁶ Idola Judah among arang lokke opan yalumna ami kídíem arík bagan isula duudope Nebujaradan bí gíbo kumape mela gítoku.

¹⁷ Babilon ami kídíde Kumkeng Ekum lokke pitol gaang kídí emlang pitol gaari kídíem, delokke pitol lok monam bottena asi téngki deme demmík geyéla pitol takam dem Babilonpe giiyin bomtoku.

¹⁸ Bulu Kumkeng Ekumlo agér inana: peking kídí, metbu laalen nana lukung kídí, rungguem arbín nana paudar mekeng kídí, séragem kampo-tallo inana ekurang kídí, ipak iyém iyyi kaanana egug kídí, arí nampona mekeng egug kídí, delokke abíd-abíd Kumkeng Ekum delo agér inana pitol ekurang kídíeme bomyintoku.

¹⁹ Bulu uun lok demangkom baldín lok pínam abíd-abíd ekurang kídí ara lokke, soria peking kídíem, aména egug kídíem, mekol joonana kídíem, iyyi sukla bomnana egug kídíem, metbu mekeng kídí, sérak dakkeng kídí, arí namponem mekela purlíknana lukung kídí, apongem suknana egug kídí takam emte bomtoku.

²⁰ Roja Solomon ke Kumkeng Ekum legape pitol lok pínam gaang annyi, gaaripe nííbom lanam kídíem, asi téngki bottenadem, delokke duuda sukeng rubo mimangpe pílíknam íying kolang annyidem, deke delokke tebege sapla yimape ito.

²¹ Gaang annyide akampak nekíai. Annyi dekai kedone 8 mitar, delokke pegonge 5:3 mitarkope ito. Annyide ruubungla pitol bisame 75 milimitar ko ido.

²² Gaang miyong ke teyong delo pitol lok pínam 2:2 mitar kedonna baareko kato. Dekedem kamporupe dalim appun moimuape pígoong líkname.

²³ Dekepe kampope tupket líkla moimuang dalim appunpe ilíknam tabungde língko ko ito. Deke delokkem íying konang kolang akkéem amolo dagdola kaapato.

Judah Ami Kídíem Babilonpe Umbomkuname

²⁴ Maglíng ruutum Nebujaradan bí ami umla bomkunam teyolote miri írnepe ina Seraiah, miri írgíngpe ina Jephaniah melang Kumkeng Ekum lokke lamgé kaabomna midum angumko umtak sula gíbotoku.

²⁵ Doolung ara delok bí mimak ibona ruutum kídí, delokke rojem poyilna midum kíníddem, delokke sipaying legí-sigang kídíem atgebona sékétéri ruutum, doolung delokke miro ami midum íying akkéko umla bomtoku.

²⁶ Bulum takam gíbola Riblah doolunglo notko ila duuna Babilon ke roja keralo aaboto.

²⁷ Hamath amo lokke Riblah doolung delo rojade bulum takam mokamoto. Dekepe Judah lokke ami kídídem, buluke amo lokke mootelo duuna mibo amolo abílpe umnyok bomtoku.

²⁸ Si Nebukadnejjar ke abílpe bomkunam ami hisabe: Nebukadnejjarke dítak kínídnape roja iduem bí midum 3,023 ko umbomtoku;

²⁹ bíkke takying kolang dítak píínyi nanadelo, Jirusalem lok midum 832 ko umbomtoku;

³⁰ bíkke takying annyi kolang tagumnape roja iduem Nebujaradan bí midum 745 ko umbomtoku. Takamem idumsula midum 4,600 ko umbomtoku.

Jehoiashinme Melenkuname

³¹ Ebil-Merodak ke Babilon rojape ilendo dítak delo Judah lokke roja Jehoiashin me bí ayala patek ekum lok bí melentoku. Dekepe melen dokude Jehoiashin me abílpe umrong lokke takying angum kolang dítak kíníd lokke poolo íying kolang annyi lokke looying annyi kolang longe pilngo nalo ito.

³² Ebil-Merodak bí Jehoiashin me ai-kampope agom lupola, Babilon pateklo duuna abíd roja kídíem pemílo gaiyana duupomlo duumoto.

³³ Delok rongem Jehoiashinme patek galugem gemoyimape bítpakla, bíkke abíd turdo dítak loope Babilon rojake dopom tébullo bíme donam-tíínamem doyar motíto.

³⁴ Bíkke sido loorípe turdu tete delo loodí mipíke Babilon lokke rojade bíme dope-tíípenamem, ege-galugem, delokke abíd-abíd míínam kídíem bitíto.