JEREMIAH 5 - DEENA BAIBÉL (BSI)

Jirusalemke Paab Kídíe

¹ Jirusalemke bedu-bedang takamlo gíyin goodola rego miyolo kanggola,

² Bulu, “Ruutum ke turdung tetedem,” emla Ruutum me kumsudung, idola dekede aro aapílok imang.

³ E Ruutum, nok amige aroem matamanía? Bulum no demlate bulu kinam kénpasumang, no bulum tujét-saayét late, bulu nokke iyilnamem kangkén sumang. Bulu aapí míílat sunam kakímang, delokke ayanpe buluke aapíem líídungpe imo tetedung.

⁴ Delo ngo mííto, “Si ami kídí si opaneke delokke bopoleke, kapeila bulu Ruutum ke yélot em, delokke bíkke mííbomnamem kénaamang.

⁵ Ami kídarke ruutum kídílo ngo gíla, bulum luposuyé; kapeila bulu Ruutum ke bedang, Shédíke ayonem kéndung.” Idola bulu takame akampe Ruutum ke yébonamem míípakto, delokke bík agomem tatmato.

⁶ Dekepeila moonamlok myomur simyoe bulum aabomla rekka kayinyé, delokke yépol mooruk lok sipyange bulum aabomla tarongpe pupansuyé. Takar simyoe gílen-gíanem rekrík sudope buluke doolung beyu-ramgomlo totíbomyé. Kapeila buluke angupe ilangkula ngok mirolpe ikunamdem sanamyimang.

⁷ Ruutum bí sipe íídung, “Nolum kape kísa ngo paab dem mesam líkyén? Noluke ome-oo kídíe ngome mepakla, aro shédímana uyu kídíem kumtígongkai. Buluke míínam tabungem ngo apíípe ruubito, idola bulu abír-ayo mílílo itígoola, raséng ekumem bííyin bomkai.

⁸ Bulu gairupe donam-tíínamem binam muutígoona guré kísa, mipilde kumrí-donggongke mime mílílo kaatígoodung.

⁹ Sikena legape ngo bulum itung-irémayénía? Sikena opín kídí teyolo ngo edo rakumayénía?

¹⁰ Ngo ngokke ami kídíke onggur arígem miruem melíkla paletmoyé, idokom takamdem inyokmomayé. Ngo bulume aag kídídem sékbínmoyé, kapeila de aag kídíde ngokkemang.

¹¹ Israel lokkelang Judah lok ami kídare, ngome apíírupe mepakkai. Ngo Ruutum sipe podung.”

Ruutum ke Israelem Míípakname

¹² Bulu sikepe mebo-yatbo sutídung: “Ruutum bí atí imayé. Ngolukíng dug-adíre aamayé. Ngolu midu-mimak, dírí-keno atí kénmayé.

¹³ Kaaluna miri kídarete, emmumpe asar gadumpe idung; Ruutum kelok bulu aro agom paayimang.”

¹⁴ Depeila Ralyayalumna Ruutum bí sipe ludung, “Ami kídíe sikena agom pobo sukolok, ami kídí dem ereena esing kísape imola, ngokke agomem, Jeremiah nokke nappa delo emepe imoyé. De emede bulum gubomyé.

¹⁵ E Israel ami kídí, Ruutum bí polendung: konnying-mennying kekai miramrupe duutísuna mibo-miying opínlo, noluke agom-aang kénpímanam, mootenglo duuna opínko, noluke mirupe ngo langaayé.

¹⁶ Buluke gatbung kídíe, ayaana ago arung kísa, buluke mipil-miyongde lukén manam miram mílíe.

¹⁷ Bulu noluke isinam ali-aam emlang donamem doyinbiyé; bulu noluke oo kídí emla ome kídíem doyinbiyé; bulu noluke taro alung-abamem doyinbiyé; bulu noluke onggur ane kídíem lang pik esing kídíem doyinbiyé; noluke míídíí sulíknam líísak etorpe torgosunam dem, buluke yoksalok takamem bénpak pakyinbiyé.”

¹⁸ “Idola delo longe kídí deloteng, Ruutum bí podung, ngo nolum takam ngo apíírupe nyokyin momayé.

¹⁹ Delo edílo noluke ami kídíe, ‘Kapei sikepe Ruutum ngoluke Shédí bí ngolum imokane?’ emla íngkíyém, Jeremiah no bulum sipe polangka, ‘Kapekísa nolu Ruutum me mepakla, mibo-miying uyueme agí amolo kumsududí, delok eduem nolu mibo-miying amolo, buluke rumkílo duula nolu bulum agér ibiyé.’ ”

²⁰ Judah among lolang, Jakobke opín tabunglo sim agom sim gogying goolangka:

²¹ “E agíke tukku pinnyo kasumana bopol ami kídía, nolu amig gedulate kaapamang, nyorung gedulate tatpamang.

²² Nolu ngok keralo dan-gela ngome pesomanía? Ngo asi sipare taaboyimadope, siyéng asi robelo sulliem rísupe rumanía? Sipar kídíe taatílate deme edílote taabomang. Sipar adude yagorupe muulate edílote rísuem eebomang.

²³ Idola si ami kídarsi tolna aapí geyinla ngokke mirolpe ilenla, bulu angukon bedalok enpat terísukai.

²⁴ Bulu buluke aapílo edílokom, ‘Toodí yamolo amli aranem idope, asi-asarem moodíem kadope, ruyar bina Ruutum ngoluke Shédíme pesola bíkke lottalo yélaju,’ emla pobosukímang.

²⁵ Kapeila imem-harem kídíde bulum sikepe míídíí kamomang, delokke buluke paab kídíde ainem míípat momang.

²⁶ Ngok ami kídí pénsamlo, atírumaneke kadung. Bulu pettang batna etku-eda kísa amiem batgoola umgoodung.

²⁷ Petíllo peroge bííyamnam kísa, buluke ekumde yatbíng sunam ekurang mílíe; deloge bulu kímte-remte along gekai, delokke dongelsula ngelyinkai.

²⁸ Buluke aimana agér kídíde rísu kaimang. Bulu ane-abu kaimana ome-uem, pénsam agom lubimape, opan aréénem igul kamang.

²⁹ Depeila Ruutum ngo sipe lulendung: ‘Sikepe inam legape ngo bulum itung-irémayénía? Sikena ami kídí teyong so ngo edo ramayénía?’

³⁰ Asi-among so reyubrupe mamam subomnam agéreke idung: Kaaluna kídíe menam agom lugoodung,

³¹ miri kídíe agí míngkorpe dormo ayonem bomdung, delokke ngok ami kídíete sikena bedangem gílídung, idola deke delokke iyindí longe telo bulu kape iyénadí?”