JEREMIAH 49 - DEENA BAIBÉL (BSI)

Ammon Kídíem Ruutum ke Luname

¹ Ammon ami kídí legape Ruutum bí sipe ludung: “Israel bí oo kamanía? Bíme yébom kupena kamanía? Dekemílo Israel doolung kídílo kape Molek uyume kumna kídíe dunga bomla Gad me duubomkan?

² Idola Ruutum ngo podung, Ammon kídíke doolung luune Rabbah teyolo mimak adudem dudlíkla; de kumruk asum kope ilangkula delokke Rabbah me dunggo bomna doolung kídílo eme rílíkla delo Israel me monpakna kídíem monyan sulangkula idí longe píídak.

³ E Heshbon! No kaptola, kapeila Aime líípakto. Rabbah ami kídía! Ulo jérlen tola. Ankí gasorem polum sula, doolung etor aralo elo-belo duggola kapgo tola. Kapeila noluke uyu Molek lang bíkke miri kídíe delokke migom kídí tabungem umnyokla bulu mibo amolo duunyokyé.

⁴ Kape, aro aapílok yémana nolu lukím sukan? Noluke amo yiibe siipí-siiyé mílípe idung emla kape mííte sukan? E arolok yémana ome no, ‘Ngom séko mimak iyang bomyén?’ emla agí mirem teyolo mííte sudung.

⁵ Ralya yalumna Ruutum ngo podung, noluke dei-degonglok ngo noluke reyubrupe míínamem noluke teyolo bomayé. Nolu takame agíem dugpí sugepe dukpan-dukran sugong geyé, delokke dekepe dukna kídíem sékote laadum sukuna kamayé.

⁶ Idola Ruutum ngo podung, yépenam longelo ngo lekoda Ammon me miremmoyéku.”

Edom Kídíem Ruutum ke Luname

⁷ Edom ami kídí legape Ruutum bí sipe ludung: “Teman doolung luunelo kénnam gyan kamanía? Buluke aralo luyil bosune nyokkanía? Kebangem bulu luji bosu layimanía?

⁸ Dedanlo duuna kídí nolu dugnyokgela bupík kídílo runyok gelangka. Kapeila ngokke itung-irédí moodílo ngo Esau ke otíng-oyinem irééyé.

⁹ Onggur ayé pílne esinglo ayéme ako-annyi pílmape medung delokke yuem pyoona amie buluke mííbomnam petomem pyoodung.

¹⁰ Idola Esauke otíng-oyine agíem runyok gela yimadupe buluke rusi sukoem iyayé, Buluke ome-oo aasung-osak, kumrí-donggong takame nyokla bulu sute nyokyinyé.

¹¹ Ane-abu kaimana ome-oo kídíem ngokkíng melík langka. Ngo bulum kaabomyé. Noluke mime meyéng kídíete ngokkíng míngke sulado.”

¹² Ruutumbí sikepe podung: “Nolum kape idírmape asoope mepe meyén? Ankí kenolok bíísétna batidem tíípemana ete tíírodem, nolu tííperung aiyé.

¹³ Nolum emmumpe mesam mayé. Nolu tííperung aiyé. Ngo agí amín lok pésudola ludung; Bojrah doolung de kumrukpe ila ami takamke lupu-lulé lukepe, pésu-sukenape, peso-rían kangkepe ila doolung takame apíípe nyokyinyé.”

¹⁴ Ngo Ruutum kíng agom ko tatto; “Miru opín kídíeme dumsula Edomme mimak iangbomdope, kotokiko melíkla lulíkkai.

¹⁵ Edom nome ami takamke míípaknam, amín kaimana opín kope imoyéku.

¹⁶ Nolu dííte-lííreng teyolo duula, kedonna adi díítum teyolo duula, repe-sinying takame peso-rían dope ila ituakom; noluke ekumem kedon kolo mola pemí míya kísa asup subduakom, delok ngo olet moyéku. Noluke kímte rupe míísunam aapí kídíde nolum yatsukai. Sikepe Ruutum ngo polendung.”

¹⁷ “Edomke yagorupe tarí-tapa genamem, delok gína ami takame kaala mamamsula kaarí-kaanyope kaayé. Dekepeila Edom bí amike peso-rían kangkepe iyé.

¹⁸ Ruutum ngo sipe podung: Sodom emla Gomorrah me kape kísa nyokmotodí delok teyolo, dei-degong lokke doolung kídíe kape kísa nyoktak sukadí, deke kísa Edom delo tani atel kote turla duumayé.

¹⁹ Jordan korongke robeng lokke nyomrang pasumlok lenla lotta yiibe amolo hutlenna myomur simyo kísa, ngo Edom me bíkke dungko amolok lomdope monlenyé. Delo ngokke ullennam ami de amongdem ruutumyé. Sékome ngokkíng lubísulayén? Séko ngome dakrík sulayén? Ingkona ruutume ngome aklayén?

²⁰ Depeila Edomke mirupe Ruutumke míínamem, Teman ami kídíke teyolo bíkke mííbomnamem tatlangka. Bulum takam nyokmola buluke ome-oo kídíemte sobomyéku, deme míírí-míínyope mííyé.

²¹ Buluke oletnam adudlok amonge taronpe ton-geyé, buluke ulo gogdudem siyéng loope tatpaayé.

²² Kaatola Bojrah ke teyolo míya pemí kone, alabe taayala deetokla yinggo bomyé. Dekepe idí longe delo, Edom ke maglíng kídíke aapí-aang de okii kina mime lokke aapí kísape iyé.”

Ruutum ke Damaskasem Luname

²³ Damaskas legape Ruutum ke agome: “Hamath lang Arpad bínyi aimana agom tatla ankí-keno míídír lendung. Bínyi asoope doomana sipar taatína siyéng asi kísa míídír ayarkai.

²⁴ Damaskas me adír kiname ibomla, akén-ayén yimape ila, ralnam atí kaimape peso-rían lok dugnyok gekai.

²⁵ Ngokke ashé bomnam, amín kanarung doolung luune dem kapei mepakmane?

²⁶ Maglíng ke Ruutum ngo podung: Dekepe idí longe delo yaamé koo kídí tabungde bedang takamlo siyinyé, delokke bíkke sipaying kídíe adud-ayud atí kaimayé.

²⁷ Ngo Daamaskas ke etorem eme rílíkla roja Ben-Hadad ke roja ekum kídíem emelok guyin moyé.”

Ruutum ke Kedar Melang Hajorme Luname

²⁸ Babilon lokke roja Nebukadnejjar ke mimak iyabomla inam Kedar doolung kelang Hajorke legangem Ruutumke agom luname: “Kedar me gerep bomla mimak iangbomla, sanggodanke ami kídíem nyokmoto!

²⁹ Buluke notko kídí emlang gooru-sobén mér kídíem bomyéku. Buluke uut simon kídí emlang dungkeng takamem jooyin bomyéku. Ami kídíe, ‘Peso-ríane tabunglo kayinkai,’ emla ulo gogyé.

³⁰ Ruutum ngo podung: Hajorlo duuna kídí nolu menape dugnyok gela eerína bupík kídarlo dunggong gelangka. Kapeila Babilon ke roja Nebukadnejjar bí noluke mirupe atoko rulen bomdung, noluke mirolpe rollendung.

³¹ “Ruutum bí lulígdung: Atí etor-eyab kamana pellenpe ami duuna delokke gomyét sula duuna kídídem agíeme gairupe míísula edíírupe míína kídíem darepla mimak iyabomlangka.

³² Kapeila buluke uut simon kídídem delokke gooru-sobén abam dem dengerupe umla bomlayéku. Séko buludí dumídem ngítu sudune bulume rego mipílo ngo pitpan sugoyé. Rego miyonglok buluke teyolo ngo tong-aryangem ruulíkyé.

³³ Hajor bí kumruk doolungpe, ménsurungem yébom kukope agínpe iyaryéku. Tani turkína atel kote delo duuna kaimayé. Sikepe Ruutum ngo polendung.”

Ruutum ke Elamem Luname

³⁴ Judah lokke roja Jedekiah ke rojape ití-sigo longe kídar delo Elam legape kaaluna Jeremiah keelo Ruutum ke agome pííto. Ralyayalumna Ruutum bí sipe poto:

³⁵ “Kaatola ngo Elamke yagorupe míídíí subomnam iyyi dem dírtuyé.

³⁶ Taleng telokke kéényung appilok gumnam asarem ngo langaala bulume, buluke duunyok goopeko kaimadope pitpan-pitran sula imoyé. Buluke dunga mangko kamape rego mipílo duuyinyé.

³⁷ Bulum mokape emla matana, buluke miru keralo ngo Elam me akén-ayén yimadope imoyé. Ngokke yagorupe marlílok buluke teyolo ngo tong-aryangem bomayé. Bulume petyinma teteloope ngo yoksalok monbomyé.

³⁸ Elam ke roja kídí emlang mite-migom kídíem nyokyin mopala ngokke roja palengem Elamlo ilíkyé.

³⁹ Idola píngkupena longe telo ngo Elam me mirem moyéku. Sikepe Ruutum ngo polendung.”