JEREMIAH 46 - DEENA BAIBÉL (BSI)

Karkhemishlo Ijiptem Ikumname

¹ Kaaluna miri Jeremiah kíng opín-buang takam legape Ruutumke agom lunam kídíe:

² Kerayalumpe Ijipt ami kídílo luname: Sim agom lunam sim Judah lokke roja Jehoiakim ke Judah amolo toodí takpinape roja iduem, Euphrates korong roonelo Babilonke roja Nebukadnejjar ke maglínge Karkhemishlo ikumduem luname:

³ “Noluke kattam emla tamkung kídíem iruula mimak ikolo gílentola!

⁴ Guré kídíem leemo lenla deke delo reesa saayin tola! Noluke mimak dumlubem luplík sula opéé-opéépe dagyin langka. Gíníng kídíem yarjo joyintola! Mimak leemoem pítgetola!”

⁵ Ruutum bí íngkídung, “Ngo ingko koi kaadun? Bulu pesola duglat sudungku. Bulu ikum kosuto. Bulu rego mipílo peso-rían gela kangkut sukumape lomla dugyin gedungku.

⁶ Dugdugna kídíete dugge layimangkai, delokke sipaying miram kídíete ipítsula yimang. Euphrates roone línggíng dan telo bulu tupsula olet letyinkai.

⁷ Sékoi, asie tela robengem biibona Nayil korong kísa idune?

⁸ Ijiptmin asie tela robengem biibona korope idune. ‘Ngo gerepla tani amosime biibomyé, doolung takam emlang delokke ami takamem ngo nyokyin moyé,’ emla Ijipt bí podung.

⁹ Mimak guré kídí emlang gaari kídíem duglen motoka. E maglíng kídíe, mimak gílen langka, Kush lokke lang Put lokke ami kídíe tamkung bomla, Lidia lokke ityi-epugem gela menape lomlen bomlangka.

¹⁰ Idola de longede Ralyayalumna Ruutum ke longe. Bíkke miru teyolo edo rayan sudíku longe. Bíkke yokse, aang píípe bulum doyinma tetedem, buluke iyyiem aang píípe tííyinma tetedem, bulume patí bomyé.

¹¹ E Ijipt ami kídíe, nolu Gileadlo gísaala noluke legape kuséréngem mata tokala. Noluke kuséréng takamde agér biyimang, iname nolu emmumpe ankí-kenoem bojé modung.

¹² Noluke annyingem mibo opín takame tatyinkai. Noluke kapnam-rííname among takamso bííyin gongkai. Sipaying kone sipaying konlo tupsula, bínyi lekope olet bosukai.”

Nebukadnejjarke Ijiptlo Píínam Legange

¹³ Babilon ke roja Nebukadnejjar ke Ijipt em mimak ipe emla aaduem, si Jeremiah ke teyolo Ruutum ke agom pííname:

¹⁴ “Ijipt amo lokke Migdol, Memphis, delokke Tahpanhes doolung kídílo gogying goolangka. Nolum lang noluke dei-degong takamem, yokse kida bomdung, iname nolu takam iru sula anbom langka.

¹⁵ Kapei noluke mirampe ina Apis uyu bí oletkan? Kapeila Ruutum bí bíme paletto.

¹⁶ Nokke sipaying kídíe, ‘Kaju menape lomla miru kídíke yoksalok dugpísuge langkula agíke amolo, agíke ami sulo duglang kupe,’ emla sipaying kídíde akon teyolo akone ojém-oyém bosula iyinkai.

¹⁷ Delo bulu érla, ‘Ijipt lokke Pharaoh rojabí agom petome ma; bíkke idíem bí meboosuto,’ emla lubo sukai.

¹⁸ Ralya yalumna Ruutum emla amínem gena, Roja bí sipe polendung: Ngokke turdu tetedem, dííte kídí pénsamlo, kape kísa Tabor dííte kedon yalum dudí, siyéng asi teyolo kapekísa Karmel dííte kedonpe duududí, deke kísa Ijipt nom mimak aabomna ngo, ngokke ralname kadung.

¹⁹ Ijipt lok ami kídía! Abílpe umkosupe iru sulangka. Memphis me ami atel kote kaimadupe, kumruk-moorukpe imoyé.

²⁰ Ijipt bí kampona rune rubíl kísanako, idola línggíng danlok tayube tokbomdak.

²¹ Bíkke relík bomsunam sipaying kídíde, ngelna rubo kísaneke. Bulu dakka sulamape, dugge kupeneke. Kapeila bulum itung-iréla, buluke nyokdí longe píídak.

²² Miru kídarke aabomyém, ‘Hiss,’ emla yongge kuna tabí kísape, Ijipt bí dugnyok yéku. Esing teepe emla egíng bomla gíbomna amipe, miru kídíde Ijipt me iya bomyé.

²³ Yagorupe moonam de iduakom, bulu moonam esingdem tengaa bomyé. Bulu saplate sapkén yimanam pemír mírbam emte bojéyana mibame.

²⁴ Línggí danlok tokna miru kídíe, Ijipt ami kídíem ikum ilila, Ijipt ami kídarde yagorupe annyingla iyé. Ruutum ngo lulendung.”

²⁵ Israelke Shédí, Ralya yalumna Ruutum bí sipe podung: “Ngo Thebes ke uyu Amon me lekope, Ijipt lokke uyu kídar, delokke roja kídarlo itung-iréyé.

²⁶ Bulume, bulum matana buluke miru, Babilon ke roja Nebukadnejjar ke alag ara lolang bíkke sipaying ruutum kídíke alag aralo ngo ruulíkyé. Idola méélam yépekolo kera yétonam kísape Ijiptlo ami duubom yéku. Ruutum ngo podung.”

Ruutum bí Agí Amiem Ipítyéku

²⁷ “E Jakob keelok lenna ngok ami kídía, pesomapeka, E Israel, nolu aapí-aange danmapeka. Mooteng among delok ngo arope nolum ipít yéku. Umnyokla dunyokko amolok, noluke otíng-oyinem laalen yéku. Jakobke otíng-oyine, aapí eetet rupe, dengomrupe, séko kíngte peso penam kamape duuyéku.

²⁸ Ruutum ngo podung, Jakob keelok lenna nolu, atí peso mapeka, kapeila ngo nolukíng duumín gedung. Nolume ngokke mepan-meran suko mibo ami kídíem, ngo nyokmo dagakom; nolum ngo apíípe nyokyin momayé. Nolum ngo deepít agér lokmin aapí ikang yéne, kapeila nolum ngo asampe adír bimape imayé.”