JEREMIAH 38 - DEENA BAIBÉL (BSI)

Ereena Asi Déérungkolo Jeremiahme Melíkname

¹ Mattan ke oo Shephatiah, Pashhur ke oo Gedaliah, Shelemiah ke oo Jehukal, delokke Malkhiah ke oo Pashhur bulu Jeremiah ke ami kídíem agom ponam kídíem tatto. Jeremiah bí sikepe poboto:

² “Ruutum bí sipe podung, ‘Séko buludí doolung so duuyéne bulu mimak loklang, dírí-kenolok, delokke kinam-ramnam lok siyé. Idola séko buludí Babilonke maglíng kídílo gíayéne, bulu turyé. Buluke yénamem bulu mopísula turyé.’

³ Sok teyolo Ruutum bí sipe podung: Sim doolung sim arorupe Babilonke maglíng alag aralo melíkyé, delokke bulu doolung sime umyé.”

⁴ Migom kídíde dekedem tatla rojeme sikepe pokantoku: “Sim ami sim mokape aido. Doolung sokke sipaying maglíng duuna kídíeme bík agomlok aapí amé modung. Ami kídíemte ebín molendung. Bíkke agom-aang kídísim tatname si ami si doolung sokke ami kídíke ainam legape mííla agom pomang, idola buluke nyokkupeko bedangem pobidung.”

⁵ Jedekiah rojabí dem tatla bulume, “So legang so ngo nolume atí luyamang. Noluke míínampe ilangka,” emla poyansuto.

⁶ Delo bulu Jeremiah me umla, roja ekumem kaabomna sipaying kídíke kebang ekum gíídang delo roja oo Malkhiahke asi déérung delo, bíme rímo lok ogla arang delo lettokto. Asi déérungde asi kamato, idola yupyang petompe ila Jeremiah bí yupyang aralo yullum aato.

⁷ Idola roja ekum delo migompe agér ina Kush amolokke mumbal, Ebed-Melek bí, Jeremiah me asi déérung aralo melíkto emnamem tatla, roja delokke Benjamin Eyablo duudungem,

⁸ Ebed-Melek bí rojadem kaarík sula lupoto:

⁹ “E ngok roje, si ami kídar si kaaluna Jeremiah ke teyolo airumape itung. Bulu Jeremiah me asi déérung aralo líktung, delo bí siyérung. Delo edílo doolung so ettínge kaimayédí, delo bíme kenoe pínkayé.”

¹⁰ Dem tatla Kush amo lokke mumbal Ebed-Melek me rojade, “Jeremiah ke simang adape no midum íying angumko gíbola bíme asi déérung delok horeptoku,” emla lulígto.

¹¹ Delo Ebed-Melek bí ami tomsula roja kumsung ekum delo aala, ege-galuk akueke laala delokke sotkyaem bomla, sotkya dem asi déérung aralo Jeremiah kíng lettok bito.

¹² Delo Kush ami Ebed-Melek bí Jeremiah me, “Ege dem nokke lamku, kiirung kídar delo ngotlík suto, sotkyae nokke amíldem tarí iket madope,” emla lulígla, Jeremiah bí dekepe ito.

¹³ Delo bulu Jeremiah me asi déérung aradelok hosaatoku. Depe irongem bulu bíme kebang ekum gíídalo meto.

Jedekiahke Jeremiahme Íngkíkuname

¹⁴ Depe irongem Jedekiah rojabí Jeremiah me tomlang kula Kumkeng Ekum lokke eyab aatak angumnana delo aamoto. Delo rojade, “Nome ngo agomeke íngkíyé. No agom atel kote mesup mapeka,” emla poto.

¹⁵ Jeremiah bí, “Nom ngo aro agomem pomílote, no ngom mokayé, delokke nome poyil mílote no ngok poyilem tatmang,” emla Jedekiah rojame poyansuto.

¹⁶ Delo Jedekiah roja Jeremiah ke keralo ami tatmadope pésudola, “Ngolum ngamona Ruutum ke turdu tetedem ngo nom mokamayé, delokke nome mokape emla matana kídíke alag lote nome melík mayé,” emla poto.

¹⁷ Delo Jeremiah bí Jedekiah me popato, “Ralyayalumna Ruutum Israel ke Shédí bí sipe podung: No Babilon rojake maglíng ruutum kídílo mimak imín sumape agíeme melíksula jonbo suyémílo, nolang nokke edung-erange turyé, delokke yéname nyokmayé. Sok teyo soteng sim doolung simte emelok rípakmayé.

¹⁸ Idola Babilon rojake maglíng ruutum kídílo agíeme melík sula jonsumayémílo, sim doolung sim Babilon maglíng kídílo ruulíkyé, delokke bulu emepe rípakyé, delokke no agísuete buluke keralok duknyok gelamayé.”

¹⁹ Dem tatla Jedekiah roja bí Jeremiah me poyan sula poto, “Babilon elo duuna Jihudi ami kídíem ngo pesodung. Si Babilon maglíng kídísi ngome buluke alag aralo melík langkula, bulu ngome ipusilééla ipelo.”

²⁰ Delo Jeremiah bí poto, “Bulu nom dekepe imayé. Ngokke ponampe ila no Ruutumke agomem tatlangka. Depe imílo no aiyé, delokke nokke yéname turyé.

²¹ Idola no Babilon roja maglíngke ruutum kídílo agíeme melíksula jonsumayémílo Ruutum bí sikepe ngom lengkantung:

²² Judah lok roja lokke mime kídí, roja ekumlo dungkína takamem Babilon rojake maglíng ruutum keralo gílenyin boyé. Delo mime kídíde nome sipe lugeyé, “ ‘Nokke míngke sunam angong kídíe, nome mííbo-míngkong bola míímem boto, nokke ale yupyanglo yullumkai. Nok angong kídíe nome mepakto.’

²³ “Babilon ke keralo, nokke mime ome-oo kídí takamem bomayinyé. No agísuete buluke alag aralok dugpísuge lamayé. Babilon lokke roja maglínge nome umyé, delokke sim doolung sim emelok rípakyé.”

²⁴ Delo Jeremiah me Jedekiah bí poto, “Ngonyike luposunam sim séko mete kénmo mapeka, demamílo no siyé.

²⁵ Migom kídíe ngo nome lupo sutung emla tatla nokkíng aala nome, ‘Roje nome ingko koda potone, delokke no rojem ingko koda potone? Ngolum pokan langka. Ngoluke keralo agom rumnyok mapeka depe imílo ngolu nom petyé,’ emla nome luyémílo,

²⁶ bulume sipe polangka, ‘Jonathanke ekumlo sidokupe ngome melík kumayika emla ngo rojeme rogutonamin.’ ”

²⁷ Migom kídíe arope aala Jeremiahme íngkí lupoto. Delo bí roja lokke ponam agompe takamem pobito. Delo bulu bíme agom atíyang ííyimato, kapeila bíkkela roja delokke lupo sunamem sékote tatna kamato.

²⁸ Depe irongem Jirusalem em umdo longe loope, roja ekumem kaabomna sipaying kídíke kebang ekum delo Jeremiah bí duuto.