JEREMIAH 33 - DEENA BAIBÉL (BSI)

Ipítkupenam Legape Pobikuname

¹ Roja ekumem kaabomna sipaying kídíke kebang ekum delo Jeremiahke pateklo duudung adaem, lennyinape Ruutumke agome bíkkíng pííto:

² “Tani among sime pílenna, sékomemdí Ruutum emla míndune bí podung:

³ ‘Ngom goglangka, delo ngo poyansuyé, delo nokke kénkí-hényi manam, mapang kíramnam botteruna legí-sigang takamem ngo poyilyé.’

⁴ Ruutum Israel ke Shédíbí Jirusalemke ekum kídí emlang Judah lokke roja ekum kídíem, mimak iya bomla bénpak pakyinla doolung kídíem líísak kyare rela mimak iyabomnam legape iyinyé.

⁵ Babilon ami kídíem mimak imín sukolok ami simange bííyin bomyé. Ngokke aklíng-marlíng lok deddínem mokayé. Doolung sokke atírumanam legape doolung sok ngokke migmoem rumnyok suyé.

⁶ Depe ituakom longeko ngo lekoda doolung sokke amíl amoem ai molangkula ami kídí takamem ipí-píyin yéku. Bulu ailangkula aapí-aange eetetpe yélangkula peso-rían kaimape yéyéku.

⁷ Ngo Israel melang Judah me abílpe yényok kolok laalen yéku. Bulume kerang yétonam kísa siirep moyéku.

⁸ Ngok keralo buluke paab inam takamem arbín yéku. Ngom mirolpe ila inam paab takamem ngo asampe mepak biyé.

⁹ Dekepe iyékuem si doolung si, ngome yagorupe amín kamoyé, ashéngmoyé, delokke yidge-rínggeyé. Kapeila sok doolung sok legape ngokke aina agér inamem tani among sokke ami takame tayyinla, peso-ríanpe mííla, doolung sokke teyolo ngokke utepooro rubinamem kaayinla, buluke unnotinamem, aapí eetetpe yékunamem kaala mibo-miying takame aapíe dan-geyé.

¹⁰ Nolu sim doolung sim rongngamna, ato-siro kaimana, tani-taroete duuyimangkope emdung. Idola Ruutum ngo sipe podung: Aroe Judahke doolung kídí elang Jirusaleme, tani taroe byakruknam rongngam nakope ituakom,

¹¹ longeko sikeso ashéng sédude, nyamran adude kalangkula, Ruutumke Kumkeng Ekumso Ruutumke keralo amanem boma langkula: “ ‘Ralya yalumna Ruutumme yidge langka, kapeila Ruutum bí aine. Bík ayange agínpe duuyardung,’ emla ami takame yidgela miri lugela iyin yéku. “Kapeila ngo kerang yékampe edíng-siríla yédokupe ami kídíem yéyin moyéku.”

¹² Ralyayalumna Ruutum bí sipe podung, “So amo sokke doolung takame rongngamla, tani-taroe kaimape iko kídarsi longeko mér yékeng pelang mér kaabomne apéé péépompe iyéku.

¹³ Adi amongke doolung kídí, anggodanke leebelo duuna doolung kídí, sokko danke Negeb among, Benjaminke among yéta kídí takamso, mér kaabomna kídíe mér kídíem alaglo san-go yéku. Ruutum ngo sipe podung.”

¹⁴ “Judah erang lolang Israel eranglo ngokke togesunamem ngo ayala ipíídí longe píídak,” emla Ruutum bí podung.

¹⁵ “Delo moodí delo delokke dekena longe delo, Dabidke otíng-oyinlok Deena Aagko saalenyé. Amoso ingkuedí aine delokke deene, deme bí iyé.

¹⁶ Delo longe kídí delo Judah em mopítyé, Jirusalem bí denge-poope duuyéku. Bíkke amínem, ‘Ruutum ngolume Deepítne,’ emla mínyé.

¹⁷ “Kapeila Ruutum bí sipe podung: Israelke roja palenglo agínpe duudope Dabid kelok lenna otíng-oyine kayaryé.

¹⁸ Delok teyo delo ngok keralo agínpe romnam aman, ali-ayé aman, delokke abíd-abíd ipak kídíem iyar dope Lebi opínlok miri ami kamape imayé.”

¹⁹ Jeremiah kíng Ruutumke agome pííto:

²⁰ Ruutum bí sipe podung: “Longe lang yue agínpe agí-agí moodípe iyar sudope ngo longe emlang yuem daapongko ibosutung. De daapongde edílokom nyokmayé.

²¹ Deke kísape ngo, Dabid kíng lenna roja adonge kayardope Dabid kíla Lebi opíne agínpe miripe ngok keralo iyardope Lebi opínlo daapong ibosutung.

²² Ngo Dabidke otíng-oyin emlang ngok keralo miripe iyarpena Lebi opínem, taleng telokke takar kísa imoyé, siyéng asi robeng lokke sulli kísa bojémoyé.”

²³ Jeremiah kíng Ruutumke agome pííto.

²⁴ “ ‘Ngokke ullen sunam erang annyi Israel melang Judahme ngo mepakto,’ emla ami kídíke agom ponamem no tatmanía? Depe pobosula ami kídíe kaapu-kaaléla, ngok ami kídíem opín kope kaayimang.

²⁵ Idola Ruutum ngo longem lang yuem daapong ibosula, taleng temla amosim agí-agí bedanglok gísudope ayon kídíeme iyin bitung.

²⁶ Ngokke sikepe inam kísape ngokke daapong ayonem ngo Jakobke otíng-oyinlo, delokke Dabid kelo ibosutung. Ngo Dabidke otíng-oyin akonem Abraham, Isaak, delokke Jakobke teyolo yébodope ullenyé. Ngo agí ami kídísulo ayang yalen sulangkula bulume mirem moyéku.”