JEREMIAH 32 - DEENA BAIBÉL (BSI)

Jeremiahke Arík Rename

¹ Judah lokke roja Jedekiahke dítak íyingko rojape ila, delokke Nebukadnejjarke dítak íying kolang píínyiko rojape idoem Ruutumke agome Jeremiah kíng pííto.

² Dekepe píído delo Jirusalem em Babilon lokke maglínge mimakpe gargo bomtuai, delokke Jeremiah me roja ekumem kaabomna kídíke kebang iko ekum lokke gíída delo patekpe umla meto.

³ Delo Judah lokke roja Jedekiah bí Jeremiah me sikepe podola patek umto, “Kape no sikepe polu-poorkan? No podung, ‘Ruutum bí sikepe podung: Babilonke roja alag aralo luune sim ngo melíkdak, delokke bí luune sim laayé.

⁴ Judah lokke roja Jedekiah bí Babilon kídíke alag aralok dugnyok gelamayé, idola arorupe bíme Babilonke roja alag aralo melíkyé, delokke Jedekiah bí Nebukadnejjar me agí amige kaasula migmoe kaarík sula lupo bosuyé.

⁵ Delo Nebukadnejjar bí Jedekiah me Babilon pe enbo langkula ngokke bíkke teyolo agér ipenamem ipíímang tete loope bí Babilonlo duuyé. Bí Babilonem mimak imín sudokom ikum mayé.’ ”

⁶ Jeremiah bí poto, “Ruutum ke agome ngokkíng pííto:

⁷ Nokke apang Shallumke oo Hanamel bí nokkíng aala sipe poyé, ‘Anathothlo duuna ngok arígem no retola, kapeila ali-atod aralo no anín yalume iname no rebadung delokke repene.’

⁸ Ruutumke ngom ponam pakpe Hanamel bí kebang ekum delo aala, ‘Benjamin among lokke Anathoth elo duuna ngokke arígem no retola, kapeila no reperune delokke rela bomsupene. No agísue repe aiyé,’ emla popado. Dem tatla, Ruutum bí arope ngom agom lupodung emla ngo míísuto.

⁹ Depe emkolok ngo baldín nokdi íying kolang kínídko bila Hanamel keelok Anathoth elo duuna bík arík dem reto.

¹⁰ Ngo bíme kakot ibo sula, siil tupla, amín atlík sula hakii amiemte amín atlík mola abal kídídem sér palalo sapla bito.

¹¹ Delo ngo elík bosula agom atbo sunam siil tupnam demlang siil tupmanam attem kunam dem bomla,

¹² Mahseiah ke onam Neriahke oo Barukhme, Hanamel ke kerang lolang hakii kídarke keralo delokke sipaying ekum delo yéna Jihudi ami takamke kangkolo bito.

¹³ “Buluke takam tatkolo delokke kangkolo ngo Barukhme bidola poyil líkto:

¹⁴ Ralyayalumna Ruutum, Israel ke Shédí bí sipe podung: Siil tupnam delokke tupmanam, agom elík bosunamem allíknam kakot kídí sime laala kédéng peking arangkolo aipakpe ool rungko duuyar dope mesiilangka.

¹⁵ Kapeila Ralyayalumna Ruutum, Israel ke Shédí bí sipe podung: Among so arík kídíem, ekum kídíem, onggur bagan kídíem lekoda reyéku.”

Jeremiahke Kumname

¹⁶ Neriahke oo Barukh me ngokke among renam legang atko kakot dem birongem ngo Ruutum me kumsuto:

¹⁷ “E Ralyayalumna Ruutum, nokke lakbíng ralnam loklang botteruna pauarlok taleng emlang amongem pílento. Nok legape ingkona atoemkom ila manam kamang.

¹⁸ No éjar amilo ayang lengkanne, idola abu kídíke imem ajéngem ome-oo kídílo rana langkula ine. E botteruna pauar kanarung Shédí, nokke amíne Ralyayalumna RuutumE emdung.

¹⁹ Nokke mííbomnam delokke agér inamde botterune. Tanike yéyi-yésangem no kényinne. Tanike mipil agér idoosupe, delokke ségupe no amanem orne.

²⁰ No Ijipt amolo irisinyo agérem, iyod kídíem ila silo loope dekepe itíne. Dekepe Israel lolang abíd ami opín kídílo ila amín kadorupe no ine.

²¹ No nokke ami Israel kídíem irisinyo iyod lok, reyub runam atolok, pauar kanarung nokke alagem yamtarla Ijipt lok laalen kune.

²² Gakíre lang ngullange bingko amosim, buku kídílo biyé emla togesula, no amosim bisune.

²³ Bulu aala amosim duunga bomto. Idola bulu nok agomem tatmato. Nok ayonem igemato. Nokke lulígem tatmato. Depeila sikena itung-iré takamem buluke teyolo no langaato.

²⁴ Kaatola, Babilonke maglíng kídíe doolung sim buluke alag aralo bomdope elíng kyareme doolung sim gargoola, resa tete bomdung. Midu-mimak lok, dírí-kenolok, kilii-ramlilok si doolung si miru kídíke alag aralo nyoklíkdak. Nokke lukam pakpe supakke kaaname ato-siroe, iyinkai.

²⁵ Miru kídí alag aralo si doolungsi aadagakom E Ralyayalumna Ruutum, no, ‘Aballok aríkdem rela, agér dem hakii kadope ibosulangka,’ emla ngome lulígne.”

²⁶ Depe kumrodem Jeremiah me Ruutum bí sikepe poto,

²⁷ “Ngomino Ruutum, tani takamke Shédíbí. Ngok legape ingkona atoeda ila manampe idun?

²⁸ Dekepeila sikepe Ruutum ngo podung: Ngo sim doolung sim Babilon maglíng kídí kelang roja Nebukadnejjar ke alag aralo bilíkdak;

²⁹ miru kídíe doolung so aala, doolung sim emepe rílíkdak. Ingkona ekum kídí lodí Baal uyume nampona arí kanem romlíkla, asi apong amanem abíd uyu kídí lote ipakpe ilíkgola itodí, dekepe iko ekum takamdem, ngome aklíng mokolok, Babilon maglíng kídíem eme rílík moyinyé.”

³⁰ “Israel lang Judah ami kídíe, buluke siisang lokkai abíd imape atímana agér mílílo itígoola, buluke agí alaglok písunamem kumtí sula ngome yagorupe aklí línggap mokai.

³¹ Ingkona longelo sim doolung sim luulen todí, delokke ilenla silo loope si doolung si ngome aklímola, martímola ití berokkai. Iname sime ngo, ngok amig kangko sok luyumoyé.

³² Jirusalem sokke amie, Judah amo lokke amie, delokke Israel ami tabunge buluke atímana agér inamlok ngome yagorupe marmokai.

³³ Buluke lamkuem ngome gekasula migmuem lengkan suyimang. Ngo bulume luyil-yiltí late bulu ngok agomem tatmang, delokke irít-iket namemte kangkén sumang.

³⁴ Bulu ngokke amín duulíkko Kumkeng Ekumlo belum runam mimangem pílíkla deemang mokai.

³⁵ Bulu Hinnom Yiibelo Baal uyuke legape runggu píla, buluke oo kídarem ipakpe ilíkla, Molek uyu kíng ome kídíem ilíkto. Sikena belumnam agérem idope ngo lekokom lulíg kímang, delokke sike rorípe iyépe emla ngok aapí sote míngkímangai. Bulu sikepe ila Judah amongem bojérupe paab kamoto.”

Aipe Yékunam Legange

³⁶ “Nolu luune sok legangem sikepe podung, ‘Si doolung si midu-mimak, dírí-keno, delokke kilii-ramlilok, Babilonke roja alag aralo aayé;’ idola Ruutum Israelke Shédíbí sikepe podung:

³⁷ Ngokke yagorupe aklíla marlíla, ingko ingkona among kídí lodí ngo bulume monnyoktodí, deke delok ngo lekoda bulum laadum sulangkula so among so ai-kamporupe duuyin moyéku.

³⁸ Bulu ngokke amipe ilangkula ngo buluke Shédípe iyéku.

³⁹ Buluke yénam emlang buluke kékonlo, buluke ome-oo yénamlo ainam legape, ngome bulu pesola agínpe yédokupe bulum ngo aapí-aangem atelkope delokke aina ségu emlang agér-anamem atelpe idope ngo bulum ruuyéku.

⁴⁰ Ngo bulukíng agínpe duuyarpena Daapongem ibosuyé. Aina agérem ngo bulum ibi ayaryé. Ngokkelok bulu gílat sukumadope, ngome pesola mínggela yéyar dokupe ngo buluke aapí-aangem anípe usa moyéku.

⁴¹ Buluke legape aina agér ibikolo ngo eraprupe ila, ngokke aapí-aanglok apíírupe so among so bulume duuyar dokupe rubiyéku.

⁴² So ami kídar so kape kísa ngo sikena aní adírem langaatodí, deke kísape ngo buluke teyolo ngokke togesunam aina ato-siro amanem ruulík biyéku.

⁴³ Lekoda noluke, ‘Babilon ami kídílo bilíknam among si rongngamna agér bimana, delokke tanie lang taro atíe duubom manam amonge,’ emla mannam among kídí sime, relen yéku.

⁴⁴ Ngo buluke asi-among yétem ilen bilangkula, bulu lekoda anggo dan dííte yiibe among kídí elokke ila sokko dan Negeb amolo, delokke Benjamin amolo, Judah amolokke doolung kídí lolang adi amolo, delokke Jirusalemlo asi-amongem rebo sulangkula, koret ibosula, kakot ibosula, siil tubbo sula, hakii ami tombosula daadi takam bulu ibosuyéku. Sikepe Ruutum ngo podung.”