JEREMIAH 31 - DEENA BAIBÉL (BSI)

Israelke Ekum Angkupename

¹ Ruutum bí podung: “Dekena yékupenam longe kídí delo, Israelke opín-buang takamke Shédípe ngo iyé, delokke bulu ngokke amipe iyinyéku.

² Mimaklo singongna kídíe, yépol amolo ngokke ayangem paayéku, delokke Israeleme ngo apéé moyéku.”

³ Yétonam longelo Ruutum bí ngolum lengkan sudola sipe potuai: “Nolum ngo agínpe turyarna ayalok ayato; nolum ngo agínpe kayarna ayalok ayang ayaryé.

⁴ E Israel mimum koo kídí, nolum ngo lekoda siisa molangkula mosaayéku. Lekoda nolu tamburin tapungem bomla, ashéla miri-paksong iyéku.

⁵ Samari adi amolo, lekoda nolu onggur arígem ilangkula, deke delokke ayé kídíem eraprupe dobo-tííbo suyéku.

⁶ ‘Kaju ngolu Jayonlo gíla, Ruutum ngoluke Shédí kíng gílaju,’ emla kaabomna amike gogying gogdíe longeko kayéku.”

⁷ Ruutum bí sikepe podung: “Opín-buang daadiem gaiyalum yana, Jakobke legape ashéla miri lulangka. ‘Nyokngola turkína Israel em, nok ami kídíem, E Ruutum, mopít langka,’ emla tabunge taddope nolu yidge langka.

⁸ Kaatola ngo bulum línggíng amo telok, delokke tani among kéényung regolok, laadum suyin yéku. Buluke aralo, migma lebyane, koo gene delokke okii kina mime, idum sula mití-maglíngpe amie iyé.

⁹ Ngokke bulume langaadungkuem, bulu kapla-rííla, kumsula iyé. Ngo bulume tupsupeko kamangko bedang bejonlok, remelna sirung asi abelok, aayin boyéku. Kapeila ngo Israelke abue delokke Ephraim bí ngokke oo obínge.

¹⁰ E opín tabunga, Ruutum ke agomem tatlangka; siyéng asi robenglo duuna mooteng amolo, legang kídí sim pogo langka: ‘Sékodí Israelme yépan-yéran sudope itodí, bí bulum takam laadum suyin yéku. Mér kaabomne mér kídíem kaabomnam kísa, bí bulume kaabom yéku.’

¹¹ Kapeila Ruutum bí Jakob me relen yéku, delokke bulum pauar kayana alag aralok ipít yéku.

¹² Bulu takam, Jayonke díítum teyolo resala, ashélok ngomla iyéku. Bulu Ruutumke, siipí-siiyé, ali-ayé, mér kídí, delokke gooru-sobén kídíem bojépe rubila aman kadope ikolok Ruutum kíng yagorupe ashéyé. Delo bulu aipe asi bitínam baari kísape ila, bulu ankí-keno adír kaimayé.

¹³ Delo mimum koo kídíe paksong soola ashéyé, delokke milokonge mine-koope ashéyé. Delo ngo buluke pengé miriem ashéna miripe imolangkula, dug-adír ayanpe ashénam, delokke erapnamem kamoyéku.

¹⁴ Delo miri kídí emkom ngo donam kamo yéku, delokke ngok ami kídí míínam takamem ngo apíípe biyinyéku. Ruutum ngo sikepe polendung.”

Israel Teyonglo Ruutum ke Ayang Yalensuname

¹⁵ Ruutum bí sipe podung: “Ramah doolunglo yagorupe kapdud-ríídudko tatkai. Ome-oo kídíe nyokyin kolok Rasel bí, ngiinam emte tatyimape, nyokna ome-oo legape bí kapdung.”

¹⁶ Ruutum bí podung, “Nok kapnam dem melangka. Nok miksiem dílen moyimapeka, kapeila nokke agér ire amanem ngo bidakku. Bulu miru amolok aalat suyin yéku.

¹⁷ Depeila nokke yékupename kampodung, nok ome-oo kídíe agí amolo aalat suyin yéku.

¹⁸ Ephraim ke sigínnamem ngo tatto, bulu sikepe ludung: ‘Ngolu arope, agom tatmana taro oo kísape yéto, idola no ngolum agom tatdope poyiltoku. Ngolum menape ilen tokui. E Ruutum ngoluke Shédí, ngolu menape aalat sulídungku.

¹⁹ Ngoluke yépe-yélela yérongem, ngolu aapí míílat sudungku. Ngoluke yémemem kénsurongkuem, ngolu annying sula, míímé sulangkula, angkengem kítsudungku. Kapeila ngoluke yaamé siisang lok ila, ngolu paablo yétíto.’

²⁰ Ephraim bí ngokke ashébomnam, ayayalum sunam oo mangía? Ngo bíme agínpe lutídokom, ngo bíme míípa sumanía? Depeila ngo bím ankídung, delokke ngo bím ayayalen sudung.

²¹ Bedang iyodem ila, díímí uto. Noluke enang kupeko bene-bepongem aipe kangkén sulangka. E mimum koo Israel, aalat sulangkuka; noluke doolung kídílo píídum suyin sulangkuka.

²² E yépat suna ome kídí, edít longe koda nolu tumgo suyén? Tani amoso, Ruutum bí aní atoko pílenyé, de idune: Mime kone milokong konem dakbomyé.”

Israelke Yékupenam Angun-abé Lamte

²³ Ralyayalumna Ruutum Israelke Shédíbí sipe podung: “Edílo ngo bulume abílpe yényokko amologe langaayékudí, delo Judah lo duuna doolung takamke ami kídíe, ‘E deena dííte, dormo duupom, Ruutum bí nok teyolo utepooroem ruulíkyé,’ emla pobo suyé.

²⁴ Delo arík inelang mérem kaabomla notko ití goone lekope Judah lokke doolung kídílo duubo suyé.

²⁵ Delo ngo adung apééna kídíem apéémoyé, delokke tíílíng kenona kídíem, dodar-tíídar moyé.

²⁶ Delo ami kídíe, ‘Ngo ippala, amíl amoe eker-etsang kaku,’ emyé.

²⁷ “Ruutum ngo podung, Judah among lolang Israel amolo, amiem milu-mibampe imolangkula, simon-sili taro kídíemte parmo langkula idí longe píídak.

²⁸ Ngo kape kísa bulume puubínla, dírpakla, ikum mola, nyokmola, tong-aryang ilíkdope kaabom todí, deke kísape bulume isa langkula, edíípe sisa molangkula aipe leríng kadokupe kaabomyéku.

²⁹ Delo longe kídí delo ami kídíe sikepe man-yimayé: “ ‘Kuuna onggur ayém ane-abue doto, delokke ome-oo kídíke iipange iikumkai.’

³⁰ “Idola mipil-miyongpe agí-agí paab legape sisuyé. Sékodí kuuna onggur ayém doyédí bíkke iipang sue iikumyé.”

³¹ Ruutum bí sipe polendung: “Judah ami lolang Israel amilo ngo daapong aníko ibo suyé.

³² Ijipt amolok ngo buluke buku kídíem agí alaglok laalangkula gíbo langkula kerape daapongko ibosuto. Ngo buluke Ruutumpe ilate dem daapong dem bulu benpakto. Idola angkupena longe kídí telo ngokke aní daapong ibosukupenam de benpak tonam aku daapong kísamayé.

³³ Lunnying-nyampoke Israel kelang Judah ami kídíke yéku peko longe telokke ngokke lang buluke aní daapong ibo sukupenam de sipe iyé: “Ngokke ayonem buluke aapílo rulíkyé, delokke buluke aanglo atlíkyé. Ngo buluke Shédípe iyé, delokke bulu ngokke amipe iyé.

³⁴ Ruutumme kéntola emla sékote, agí kumríem demangkom erangem luyilna kaimayé. Kapeila bulu takam, aména lokke ila bottena loope ngome kényinyé. Kapeila ngo buluke atímangem mesam biyé, delokke buluke paab kídíem míípa suyimayé.” Ruutum bí sikepe polendung.

³⁵ Ruutum bí sipe podung, “Sékodí longem angun bidope doonyiem ruulíktodí, poolo emla takar kídíem yuem angun bidope ruulíktodí, sékodí siyéng asiem ine-siola sipar bottepe taamo dudí, bíkke amíne Ralyayalumna Ruutum.

³⁶ Ngokke sikepe asi-asar teyolo ilíknam, idong-iyon kídarsi edílo kaimayédí, delo petom Israele ngok keralo, opín kope iyimayé.

³⁷ Ingkona longe lodí taleng tesim kílayédí, rumkíng kédéng arang besime kénpíng tokyédí, delo petom ngo Israel ami kídíem, buluke agér itonam legape mepaklado.” Sikepe Ruutum bí polendung.

³⁸ Ruutum bí sipe podung: “Jirusalem doolung sim Hananel Ekum ponyuk lokke ila Kéényung Eyab loope anípe ilen díku longe píídak.

³⁹ Kínana rímode delok holen danla jonnampe Gareb díítumlo ipala delok billang kula Goah kíng hoayéku.

⁴⁰ Simang kídí emlang metbu nyoruk elpom delok ila sanggo danke arík iko Kidron Yiibe lok ila Guré Eyab eloope, de among takamde Ruutum ke keralo deena amongpe iyin yéku. Jirusalem doolung dem edílokom bényimayé, delokke nyokmo yimayé.”