JEREMIAH 28 - DEENA BAIBÉL (BSI)

Jeremiah Lang Hananiah

¹ Judah lokke Jedekiah rojake dítak appi kolang poolo pilngo nape roja ido dítak atel delo, Gibeon doolung lokke Ajjur ke oo kaaluna miripe ina Hananiah bí Kumkeng Ekum delo deddína bosi maglíng kerang delo lang miri kídarke keranglo ngome sikepe podo:

² “Ralyayalumna Ruutum Israelke Shédíbí sikepe podung: ‘Ngo Babilon lokke jungoliem dírpakyé.

³ Babilon lokke roja Nebukadnejjar bí Kumkeng Ekum sokke ekurang takamem lííla Babilonpe bomkunamem, dítak annyi araso ngo Kumkeng Ekum so bomang aayin moyéku.

⁴ Sike-sokke teyolo Judahke roja Jehoiakim ke oo Jehoiashin melang edítko Judah amiem umnyok bomlangkula Babilonpe enbo tokudí, bulum takamte so among so langaayin yéku. Kapeila ngo Babilonke jungoli dem dírpakyé. Sikepe Ruutum ngo polendung.’ ”

⁵ Depe porodem, Kumkeng Ekum delo miri kídí takam kelang bosi maglíng ami dakpom delo kaaluna miri Jeremiah bí kaaluna miri Hananiah me poto,

⁶ “Amen! Ruutum bí dekepe imodak langka. Babilon eloge Kumkeng Ekum sokke ekurang takamem nokke kaalula agom pokampe aamodakyikuka.

⁷ Idola nokke tatko lolang daadi takamke tatkolo ngokke ponam simkom tatbi langka:

⁸ Kerang longe lokke ila, nokkela ngokke kerapekai yétona kaaluna miri kídíe midu-mimak ipenam legang, tong-aryang, kilii-ramli atíe deddína amolo, delokke gai-gaina amo yéta tabunglo kayinyé emla kaalula potíto.

⁹ Idola asi-amonge aiyé emla kaalula luna mirike agome apíng líkna miri demmin arope Ruutumke lulígnam kaaluna mirie emla takame kangkéntone.”

¹⁰ Delo kaaluna miri Hananiah bí Jeremiah ke alínglo gedunam jungoli dem laabínla demtírto.

¹¹ Depe ipala ami takamke tatkolo bí poto, “Sikepe Ruutum bí podung, ‘Dítak annyi araso, Babilon lok roja Nebukadnejjar ke jungoli em bíkke rumkílo yéyinna opín-buang takamke alíng kídílok ngo joobín biyé.’ ” Depe irodem kaaluna Jeremiah bí agíke gígope gítoku.

¹² Jeremiah ke alíng lok Hananiah ke laabínla jungoli dem getírla irong loonyi longumko dorongem Ruutum ke agome Jeremiah kíng pííto:

¹³ “Gíla Hananiah me sipe polangka, ‘Ruutum bí sipe podung: No esing lok monam jungoli komin dírtone. Idola delok ayanpe no arem lok monam jungoliko paayé.

¹⁴ Sikepe Ralyayalumna Ruutum Israelke Shédíbí podung: Babilon lokke roja Nebukadnejjar ke rumkílo yédope, opín takamke alínglo arem jungoliem pyayin líkyé. Bulu takam bíme agér ibila bíkke ale rumkílo yéyinyé. Moonam lokke simon-sili kídíete bík agomem tatdope ngo iyé.’ ”

¹⁵ Kaaluna Hananiah me kaaluna Jeremiah bí sipe luto: “Hananiah no tattola! Ruutum bí nom lulígmang, idola no opín takam sim nok menam agomem arope tatyin moto.

¹⁶ Dekepeila Ruutum bí sipe podung: Nome tani among sokke laabín díkue píídak. No Ruutum ke mirupe ngiitom siggong kolok, sinyingke dítak araso no siyé.”

¹⁷ Dekepeila delok dítak delokke poolo kíníd nanalo kaaluna Hananiah bí sikai.