JEREMIAH 19 - DEENA BAIBÉL (BSI)

Betna Peking Legange

¹ Ruutum bí ngom sikepe lulígto, “No kédéng peking pínalo gíla kédéng lok pínam pekingko laalangka. Delo nokke gíyém miro ami loklang miri akulok ayoko gíbola,

² Hinnom yiibelo gíla delo Potsherd Luuyab angko delo aala ngokke agomem no pobilangka.

³ No delo sikepe polangka: ‘Jirusalemke ami kídíe lang Judah lokke roja kídía, Ruutum ke agomem tatlangka. Maglíngke Ruutum Israelke Shédíbí sipe podung: Tatgap langka! Tatna nyorung takame mamam supenam tong-aryang agérlo ngo bomadak.

⁴ Kapeila ami kídíe ngom mepak geyéla mibo-miying uyu kídíke yépompe sim amo sim imokaku. Bulu agísue lang buluke buku kídíe, delokke Judah lokke roja aku kídíke kénkí manam uyulo bulu ipak ila, aman bila ikai. Amo sime bulu akor kamape dengompe yésuna kídíke iyyilok lííyin mokai.

⁵ Edílote ngokke aapíso gekímanam, popa-lupala lulík kímanam Baal uyu kíng buluke oo kídíem romlíkla, Baal uyuke legape kumpom kedonna igobila iyin gongkai.

⁶ Dekepe ila ansulangka, sim yiibe amo sim ami kídíe Hinnom yiibe demangkom Topheth emla mín-yimape, Petpom yiibe emla míndíku longe píídak.

⁷ “ ‘So moolop so ngo Judah keelang Jirusalemke mííbomnam takamem loorí momayé. Bulume mokape emla matana, buluke miru kídíke yoksalok bulume paka kayin moyé. Buluke simangem monkír ela kebu-pettangem dodope ngo iyé.

⁸ Sok moolop sok gína tabunge mamam sula akén geyimadupe, kaadope sim doolung sim ngo atímadope líímoyé.

⁹ Buluke ome-uem dosudope ngo bulum imoyé. Dekepe atí yimape ila bulu agí terengem domín sudope ngo imoyé. Edílo buluke miru kídíe mimakpe doolung sim gargo bomla deddína longem ibom yédí, dekena longelo sikena reyub runam agérem bulum ibosudope ngo imoyé.’ ”

¹⁰ “Depe lubirongem, nokke gíbosunam kídíke nome kaadungem pekidem betdola sim agom sim polangka:

¹¹ ‘Maglíngke Ruutum bí sipe podung: Kapekísa peking sim idum sulayimadope betmíktodí, dekekísape ngo doolung simlang ami kídí sim líípakyé. Simang yulíkpeko kaimadupe Tophethlo simange dooyé.

¹² Topheth doolung kísape so amoso duuna ami takam emlang sim doolung sim ngo imoyé.

¹³ Sikena deemana moolop Topheth kísape ingkona ekum miyong lodí takar kídíke legape nampona arí kanem romlíkdudí, asi-apong lok uyu ipak idudí, dekena Jirusalemke ekum miyongem delokke Judahke roja takamem deemang kayin moyé.’ ”

¹⁴ Depe irodem Ruutumke kaalu agomem ludope emla lulígko Topheth delok gílat sulang kula, Ruutum me Kumkeng Ekum gíídang kebang lupom delo ami takam keralo dagdola poto,

¹⁵ “Sikepe Maklíngke Ruutum Israelke Shédí bí podung, ‘Tattola! Ngokke agomem tatmape ami kídíke aapí-aang tolgaape Jirusalem doolung simlang tabungke teyolo ngo atí-atína tong-aryang adírem, ngokke lutonampe melíkyé.’ ”