JEREMIAH 17 - DEENA BAIBÉL (BSI)

Judahke Paab elang Adírname

¹ “Judahke paabem arem koonying lok mimangpe tuplíktung, delokke daimon koonyinglok akorpe atlíktung. Dekedem buluke aapí líítam lolang buluke aang runggu kídíke areng kídílo iyin líktung.

² Díítum teyong kídílo, rotne leríng kídílo Asherah uyu mimeke mimang emlang bíkkíng ipak iko rungguem, buluke ome-oo kídíete míípa sudung.

³ Amo tabulo, noluke paab ití kolok, dííte yiibe, moole takam lokke noluke mirem ekurang kídí takam emlang noluke uyu kumpom takamem, noluke miru kídíem lííyinmoyé.

⁴ Noluke agí imem sukolok, noluke yébomnam agí amongem, ingkuem ngo noluke emla ruulen bituadí, deme nolu nyokmoyé.

⁵ “Ruutumbí sikepe podung, ‘Sékodí taniem míngkesula, adínke ralnam teyolo míída suyédí, de amide ngokke béénamem paayé. Kapeila de amide ngokke lok mootengkaku.

⁶ De amide yépol among aralo duuna améngona pasum kísane. Jénam-remname aadokom de amide kaapamayé. Sékote dungkímangko, alo kédéng kala erengko yépol amolo, de amide duuyé.

⁷ Idola séko amiedí Ruutum kíng míngkesula, bíkkíng edíírupe míílíkla yéyédí, de amide gairune.

⁸ Bí korong abelo duuna esing kísane, delokke appíre asi aralope píradung. Doonyi pamkie iabomdokom de pesomang, kapeila delokke anne yaying ayardung. Dírí-keno longe píídokom de atí ankí kamayé, kapeila de ayé éérek kayimape ééyaryé.

⁹ Séko tanike aapíem kénjiyén? Aapíde takamem pemílo yatjiyane, aapí lok kinamdem ipílayimang.

¹⁰ Ruutum ngomino aapíem matane, delokke aangem ikaane. Mipil tanike yédu-dakduem kaala, delokke ségu-siyangem kaayinla, ngo amanem ruubine.’ ”

¹¹ Aimana ségulok abal paala miremna amide, apí pímape asuplo gubbomna pettang kísane. Bíkke gíyilo miremde nyokyéku, delokke bíkke yéyin longe delo, atí kaimape ila, bí bopol kísape iyéku.

¹² Ngoluke Kumkeng Ekumde, kera lokkai kedonna dííte ponyuklo pílíknam angun-abéna roja paleng kísane.

¹³ Israel tabungke mííte sunam, E Ruutum, nome mepakna tabungde annyingyé. Nome mepakla gíkuna kídíde nyokkuna sullilo amín atnam kísape iyé. kapeila turna asi sirung Ruutum nome, bulu mepakto.

Jeremiahke Ruutum kíng Igul Koname

¹⁴ E Ruutum ngome ipílangka, delo ngo apíírupe aiyéku; ngome ipíttokui delo ngo arorupe apít-arape yéyéku. Kapeila nom petommin ngo yidgeduune.

¹⁵ “Ruutum ke agome ingkoloi, dekedem supak apíí motoi,” emla ami kídíe lupu-lulédung.

¹⁶ Nokke mér kídíem kaabom kolok ngo dugnyok gekumang. Adír longem ngo mabommang emla no kéndung. Ngokke nabbél sok agom lenna tabudem, nok keralo ngo lukan bidung.

¹⁷ Sidí-nyokdí longelo nomin ngokke rusi sukenge, depeila ngok keralo no reyubnampe imayika.

¹⁸ Ngome irééna kídíeme annying molangka, idola ngomdan annying momayika. Bulume peso-ríane aabom dakyika, idola ngome peso-rían lok mopít dakyika. Buluke teyolo sinam-nyoknam longem bomala, sinam-nyoknamem adu annyi kope, buluk teyolo imolangka.

Sabbath Legange

¹⁹ Ngome Ruutum bí sipe poto, “Jirusalem ke luuyab kídí lolang Judah ke roja kídíke gídung-gítok suko luuyab delo gíla daggodola

²⁰ bulum sipe polangka, ‘Luuyab kídíso aalang-gílang ina Jirusalemke ami kídía, Ruutum ke agomem nolu tatlangka,

²¹ Ruutum bí sipe podung: Sabbath longelo eget gemapeka, delokke Jirusalemke luuyab kídísok ekurang joodung-jootok sula imapeka.

²² Noluke buku kídíem ngokke lulígnampe Sabbath longedem deena longepe melangka. Depeila ekum lok ekurang gedung-getoksula imape Sabbath longedem agér imapeka.

²³ Noluke buku kídíde aapí tolla, agom-aang tatbimape, luyil-iyilnamem kangkén-míngkénsula imape yéto.

²⁴ Idola noluke teyolo Ruutum bí sipe podung: Nolu ngokke agomem tatbila Sabbath longelo luuyab kídísok ekuserang bomdu-bomtoksula imape, Sabbath longe sim deena longepe, agér imape nyoyémílo,

²⁵ Dabid ke palenglo duuna roja kídíe lang mite-migom kídíe gai-gakorupe luuyab kídísok madu-matok sula iyaryé. Roja kídí delang migom-mite kídíde, Judahlo duuna kídí emla Jirusalemlo duuna kídíem lekope, bulu guré-gaarilok yondu-yontok sula agínpe iyarla duuyar bomyé.

²⁶ Judahlo duuna doolung tabung emla Jirusalemem dunggo bomna doolung kídílok, Benjamin among lokke lang anggodanke díítum rumkíng kídílo duuna kídíe, delokke línggíngke adi among lokke lang sokkoke Negeb among lokke ami kídí takame, ipaknana ekuserangem, romnam amanem, ali-ayé amanem, nampona serangem, yidgenana aman atí-sirí tabungem Ruutum ke kumkeng ekum delo bomyin aala píídum suyinyé.

²⁷ Idola nolu Sabbath longem deena longepe míímape, ngok agomem tatmape, Jirusalemke luuyab kídílok, Sabbath longelo ekuserang gedung-getok mapeka emnamem ipatsula iyémílo ngo imit kíramnam ememe Jirusalemke luuyab kídílo gulen moyé. De emede Jirusalemke líísak ekum kídí takamem gukut-gulutla iyinbomyé.’ ”