JEREMIAH 13 - DEENA BAIBÉL (BSI)

Ege Uug Legange

¹ Ruutum bí ngom sipe lulígto: “No gíla ege uugko rela ugílo gin-gelangka, idola deme asilo níílum mapeka.”

² Depeila ngo Ruutumke lulígnampe ege uugko rela ugíso gin-geto.

³ Delo Ruutum bí lennyinape ngom lulíg doku:

⁴ “Supak nokke ege uug rela gin-genamdem Euphrates korongpe gíla delokke robeng lokke lííbung-língang arung kolo rumnyok langka.”

⁵ Ruutum ke lukampe uugdem ngo lííbung-língang arung kolo rumto.

⁶ Longe ayo rungko doorodem Ruutum bí ngome políkdoku, “Ngokke rumnyok toka emnam ege uug dem Euphrates elo gílangkula laatokaku.”

⁷ Depe lulík kolok ngo Euphrates elo gílangkula rumnam ege uugdem laalentoku. Idola de loorí yimape ila gekan yimape ikai.

⁸ Delo Ruutum ke agome ngokkíng pííto,

⁹ “Ruutum bí sipe podung: Sike kísape ngo Judah kelang Jirusalem ke míngkímem loorí yimadope iyé.

¹⁰ Si atímana ami kídísi, ngokke agom-aangem talla igemana kídarsi, agí aapí tolkampe yétíla uyu kídíem kumsu-joosula ina kídísi loorí yimana ege uug sokke kísape loorí yimayé.

¹¹ Kape kísa ege uug sok ugíngem gin-gong sugedudí, deke kísape ngo Judah erang melang Israel me ginla mepe míídung; kapeila ngo bulume amín kana, ngokke agí amisupe delokke bulu ngome yidgela kumsula idope míítuai. Idola bulu ngok agomem tatmangkai.”

Onggur Alang Kaklag Legange

¹² Ruutum Israelke Shédíbí ngome, ami kídíem Ruutum bí sipe podung emla podope lulígto: “Ami takamke onggur alang kaklag tabungdem bíídope onggur alang lok ríkyin líklangka. Delo bulu, ‘Onggur alang kaklag tabunglo alangde bííyin dope meyardung,’ emla poyan suyémílo,

¹³ delo bulum sipe polangka: ‘Ruutum bí sikepe podung, so amoso duuna delokke Jirusalemlo duuna ami takam teyololang Dabid rojake roja palenglo duuna roja kídí emlang, kaaluna kídí delokke miri kídí takamlo tíngíre bííbomdupe iyé.

¹⁴ Delo ngo akon teyolo akone tummínsula, abu-ue tummínsula ibo sudope imoyé. Ngo bulum asampe ayayimayé, delokke ngo agísuete ayang yalensulate iyimayé, bulume nyokyinmoyé.’ ”

Míngkímsunamem Jeremiahke Lutorname

¹⁵ E Israel ami kídía, Ruutum bí ludung, iname nolu bokéla anmang mapeka.

¹⁶ Kaamo yuem aamo mangadape, kaamona díítumlo nolu ale tupsu mangadape delokke nolu angunem mííbomdusim, noluke Shédíme yidgelangka. Kapeila bí eerína kaamope batmoyé delokke bodona kaamo yohpe imoyé.

¹⁷ Nolu tatbo sumayémílo, noluke míngkím legape ngo sékote kaamang kolo kapsisuyé. Ruutumke mér kídíeme abílpe umla bomkupenam legape ngo yagorupe kapla, amig sok miksie bojérupe bítyé.

¹⁸ Rojemla roja anem polangka, “Noluke dumpolok angunna dumlube oletyé iname roja palenglok oilangka.”

¹⁹ Sokkodan Negeb among lokke doolung kídíem sittum bomkai, delokke dekedem siyyapena kaimang. Judah ami tabungem abílpe umyin bomkai.

²⁰ Línggíng telok tokna miru kídíem migmue gengon dola kaadusutola. Nolum kaabomna kídíde ingkolo? Yagorupe míngkímsuna kídíde ingkolo?

²¹ Noluke magpépe ibosunam kídíem Ruutum bí bulume, nolume ikummola, noluke teyolo ruutum dobom dope ruulík kumílo nolu kape kísape míísuyén? Mime okii kinam kísape noluke aapí-aange kimayénía?

²² Nolu agísuem, “Kapei sikepe ngolukíng ikane?” emla íngkísumílo, dekepe inamde noluke paab legape, noluke ege-galugem bétyinkai, delokke noluke amíl-amo kídíem ipusilééla ikai.

²³ Ethiopian amie bíkke yakana asigem angupe ila suyén, demangkom takar simyoe bíkke atak-arakna moríem angupe ilasuyén? dekekísa atímana agérlo iyitsuna nolu aina agérem ilayén?

²⁴ Dekepeila yépol amo lokke asare ampeem mutbomla doojéng moonam kísa nolum ngo pitpan pitran suyé.

²⁵ Sikepe ikupenamde noluke kompallo, noluke yége-dagge sukupenampe ikai, Ruutum bí sikepe polendung, kapeila nolu ngom mitpansula aromana uyu kídílo míngkesuto.

²⁶ Nolu annying sudope noluke ege-galuk kídíem noluke atuk migmo loope sursayé.

²⁷ Adi among lolang yiibelo, noluke annying rupe uyu kídílo abír-ayo ibosula, mime méélamlo muumín gena guré kísa, noluke dekena belumrunam agér kídíem ngo kaato. E Jirusalem no adír along ruuyé. Edít longe koda no deemang amope yétíyén?