JEREMIAH 12 - DEENA BAIBÉL (BSI)

Jeremiahke Ruutum me Íngkíname

¹ E Ruutum, Nokkelo kebang agom lupenamem ngokke bomayém, no agínpe jonnampe kebang lunako. Idola nokke pénsampe kebang lunamem ngo íngkídung: Kapei atímane unnoti dune? Kapei míngke sumana kídíe yépope yédun?

² No bulum lela, bulu appír pírla kampope sisala ayé éédung. Buluke nappange nom agínpe yidgedung, idola bulu nome aapí-aanglo mínggemang.

³ Idola E Ruutum, no ngom kéndung, no ngom kaadung, delokke ngo nok teyolo edítko ayadune deme no ikangdung. Mér em kape kísa pakape emyém hobomdudí, deke kísape atímana ami kídí sim hobom langka. Bulume nyokmo díku longeko mengu sulangka.

⁴ Edítna longe koda amosi pítílla neyi-neyang kídíe ereeyéne? Simon-sili kebu-pettang kídíe, ami kídíke atímape yékolok siyin dubong; idola ami kídíe, “Ngoluke inam kídísim Shédí bí kaamang,” emla pobo sudung.

Ruutum ke Poyansuname

⁵ “No amieme dukkí suyéme apéédung, dekemíl kape kísa no guréem dukkí sulayén? Asarpe yépoko amolo no tupsudumílo, moonamlo Jordan asiem kooyém no kape kísa ilayén?

⁶ Nokke agíke lenbo sunam bíro kídíete nome yatla, nok mirolpe rollendung. Nom ai-kampope lupo sudokom no bulukíng míída suyimapeka.”

Ami Kídí Teyolo Ruutum ke Buuname

⁷ Ruutum bí sipe podung, “Ngok ekumem ngo mepaksukai, ngokke parlen sunam amieme ngo míípakkai. Ngokke ayasunam ngok ami kídíem miru kídíke alaglo ruulíkto.

⁸ Moonam lokke myomur simyo kísa, ngokke parlen sunam ami kídíe ngome ngírbom kolok, ngo bulum aklíngkai.

⁹ Rego mipílok pemí yoba bomnam pettang kísa ngok parlen sunam ami kídíe ikai. Depeila monkír kídí tabungem bulum dodope tomdumsuto.

¹⁰ Deddína mibo-miying mér kaabomne ngokke arígem loorí moyimayé, bulu ngok arígem líípak biyé, delokke ngokke kampona amongem moorukpe imoyé.

¹¹ Ngokke keralo, bulu deme ereena, míípaknam amope imola, sékote kaabom yimanampe ila among tabungde agér biyimanape iyé.

¹² Among delokke kéényungkon lokke ila kéényungkon loope Ruutum ke lulíknam ami kídíe lííyin goola, yépol mooruk kedonna among kídí kékon lok miru kídarde aabomyé, depeila sékote agíem ipísuge peko kamayé.

¹³ Amo sokke ami kídíe aamem dííyé, idola íínying tang kanem gatyé. Bulu usik-tasik emla ibom sudagakom atí ire paalen mayé. Depeila Ruutumke yagorupe markolok suyinna ali-aamem nolu gatyéku.”

Israelke Kumrí Amolo Ruutum ke Agome

¹⁴ Ruutumbí sipe podung: “Ngokke Israelke legape among ruubinamem yékam bomna atímana kumrí ami kídíem, ngo buluke amolok, appír lok esing busannam kísa bulum busanla, Judah erangemte bulukíng lekope busanmínla iyé.

¹⁵ Idola bulum takam ngokke busanrongem, ngo lekoda bulum ayang langkula, bulum mipil-miyongpe agí-agí moole-baale sulo bomayinyéku.

¹⁶ Bulum dekepe bomayékuem, bulu longeko kapekísa ngokke Israel amiem Baal uyu amínlok pémola, buluke dormoem luyiltuadí deke kísape bulu ngokke Israel ami kídíke dormo yédongem kénmín gela, ‘Ruutum ke turdung tetedem,’ emla pémín gela ikumílo, ngok ami kídí aralo bulumkom ai-kampope yébo sumoyé.

¹⁷ Idola ingkona opín-buangedí ngok agom tatmayéne, deme ngo apíírupe busanla nyokmoyé. Sikepe Ruutum ngo polendung.”