JEREMIAH 10 - DEENA BAIBÉL (BSI)

Mimang Kumsunamelang Aro Kumname

¹ E Israel ami kídía, Ruutum ke nolum agom lunam kídí sim aipe tatgap tola.

² Ruutum bí sikepe ludung: “Mibo-miying opín kídíke séguem kaayil sumapeka, taleng telokke irisinyo iyodem kaala kape kísa mibo-miying ami kídíe peso-rían dakdí, buluke kísape nolute peso-ríanla imín gemapeka.

³ Kapeila mibo-miying ami kídíke dormo kídíde atí agér kamane. Bulu sikepe idung, moonam lok bulu esingko beeyé. Deme esing mistride inana ekuranglok, kampope mimangko pílenyé.

⁴ Delo dem uunlokla baldínlok kampope yollíkyé, delokke martullokla kililok, kampope tupsut sulíkla, dírpan sula oletmadope iyé.

⁵ Epum-gíriem, tani mimangpe ege ngotlíkla, ale-alag ilíkla ipala, pettang delokke abíd simon-siliem monpakdope aríklo tudíla menam kísa buluke mimang de agom polamang. Bulu gíla sumala, bulum joobompe aiyé. Dekena mimangde atímana agérem ilamang, delokke aina agéremte ilamang. Depeila dekedem pesomapeka.”

⁶ E Ruutum, nokke kísana sékote kamang. No botterunako. No amín kala pauarkana rungko.

⁷ E opín-buang daadike roje, yidge-ríngge penamde nomin.

⁸ Mibo-miying ami takamde ségu kasumana bopole, agér kamana esingde bulum luyilne.

⁹ Buluke esing mimangem kyamlumna baldínde Tarshish amolok bomaname, delokke uun kídíde Uphaj amolok bomaname. Mimangde mistri kídíke moonam mílíe, bulu mimangdem, yasa-yamugna egelok leemolíkla, ege sumjinake alag inam lok panggu-paré ilíkname.

¹⁰ Idola Ruutum nomin aro Shédíe. Nomin turyarna Shédíe, delokke agínpe duuyarna roje. Edílo no maryédí, amosi epíndung, opín-buang takame nok aklídem hakjém gela madung.

¹¹ “Bulume sim polangka: Talengemla amongem pímana uyu kídíde amo soklang taleng rumkíng sok nyokyinyéku.”

Shédíme Yidgenam Miriko

¹² Shédí bí kédéngsim bíkke pauarlok pílento, tani amosim bíkke kénnam gyanlok molento. Bí kénjila talengemte ruubanto.

¹³ Bíkke lulígyém, taleng telokke asie doomír mírdung, delokke doomugem among duurílok gyasa modung. Bí pedonglo lekope yaariem garmodung, bíkke kumsung lok asarem mutlen modung.

¹⁴ Sikena iyod keralo ami kídíe atí kénna kamang delokke bopolpe iyindung. Uun mona mistri tabude, bíkke mimangloge annying paayindung. Bíkke mimang uyude yatne delokke turmane.

¹⁵ Dekede míípaknam are kamane, edílo Ruutum bí dekedeme kebang lubom yékudí, de takam nyokyinyéku.

¹⁶ Jakobke Shédí bí mimang kísamang. Bímin ato-siro tabungem pílenne. Bímin Israelem agí amisupe ruulensune. Bík amíne Ralyayalumna Ruutum.

Angkupena Atung-aréépename

¹⁷ Jirusalem ami kídía, nolum mimage aabom kabong. Iname menape leemo moruusula doolung sok gílenpe iru sutola.

¹⁸ Kapeila Ruutum bí sipe podung, “Supakke moodíso, amoso duuna tabungem ngo monpakyé. Ngo ami kídí teyoso adírem langaala bulum umyindope iyé.”

¹⁹ Jirusalem amie kaplento, “Ngoluke tarí legape adír alongkai. tarí sim ipísula yimayé. Sim kinam sim ngolu hakjém gelayé emla míísutuai.

²⁰ Ngoluk tombu ekume nyokkai, aan kídí tabunge bínyinkai. Ngoluke ome-oo kídíe gínyok nyokyinkai. Tombu ekum kídí sime tuldíng bokuna kaimang. delokke ngolum ippo pobina kote kaimang.

²¹ Mér kaabomna kídíde ségu kana kamang. Bulu edílokom Ruutum me mata-tattamang. Depeila bulu unnotidí kamang. Buluke mér kídíe yépan-yéran suyindung.

²² Tattola! Línggíng amo telok, botterupe ngomdud eke píídak. Dekede Judah lokke doolung kídíem lííruk gooyé delokke ménsurung uupompe iyé.”

Jeremiahke Kumname

²³ E Ruutum, tanide agíke yénamem ruusuna kamang, delokke tanide agíke yénamke lekorem kaalula korsuna kamang, emla ngo kéndung.

²⁴ Dekepeila E Ruutum, nokke ami kídí teyolo irítdola yagorupe tolmayika, demangkom nokke maryém demmayika demamílo ngolu nyokyinyé.

²⁵ Nome kumsumape ila, nome mepakla ina mibo-miying ami kídílo nokke marnamem melíktoka. Kapeila bulu nokke ami kídíem paka-níkkala, ngolume agínpe nyokyinmola, asi-amongemte kuruk aloomoto.