JEPHANIAH 2 - DEENA BAIBÉL (BSI)

Míílat Sudokupe Roguname

¹ Annyingmana kídí nolu supak menape,

² amyang kísape asare nolum mutpak mangadape, Ruutum ke guyamna marname nolukíng píímang adape, yirí-pedínamem bíkke lengkandí longe píímang adape kénsu tolangku.

³ Among sokke aapí-aang remelna takam nolu, séko bulu bíkke lulígnam kídíem igedudí, Ruutum kelo míílat sula aatolangku. Aina agérem gérlangka, delokke Ruutum ke keralo remel langka. Depe imílo, nolu Ruutum ke marnamem lengkando longe delo nolu itung-irénamlok mopít sulate iyépe.

Israelke Ampenglo Duuna Opín-buang Kídíke Nyokname

⁴ Gaja luune delo sékokom duuyimayé. Ashkelon dem kumrukpe imoyé. Ashdodem longe lootunglo monkutyé, delokke Ekron ami kídídem buluke luune delok monpakyé.

⁵ Nolu siyéng robenglo duuna, Philistain kídí nolu nyokdak. Ruutumke marname nolukíng píngkai. Bí nolum nyokmoyé, delokke noluke aralok atel koteng duuna kaimayé.

⁶ Noluke siyéng abeke among kídíde taayana arík kídípe ilangkula, mér kaabomna kídíke ekum kídíela mér duupom kídíe delo kayéku.

⁷ Turla dungkína Judah lokke ami kídíe among dem yébom yéku. Bulu among delo mér kídíem neyang dota gobola, delokke Ashkelon lokke ekum kídílo ibbom yéku. Ruutum buluke Shédí bí bulum yébo yéku, delo lekoda bulum jémo-remmoyéku.

⁸ Ralyayalumna Ruutum bí podung, “Ngo Moab delo Ammon ami kídíe, ngokke ami kídíem lukala luyé-lulénamem, delokke lute lula buluke amongem rotkamyé emnamem tatdung.

⁹ Israelke Shédí, turna Ruutum ngo berokpe pobeng bidung. Moab emlang Ammon em Sodom kelang Gomorrahke teyolo inam kísape nyokmoyé. De among kídí de alo lorung kídípe ila, delokke bénla dooyarna, delokke delo moonam íínyinge payééme sémsém ibomyé. Ngokke ami kídíe séko bulu turla duuyédí, among kídídem lííla, buluke amongdem yébom yéku.”

¹⁰ Dekepe Moab kelang Ammonke ami kídíem buluke míngkím sunam legapelang, míílola Ralya yalumna Ruutum ke ami kídíem ipu-ilénam legape itung-iréyéku.

¹¹ Ruutum bí bulum pesodope iyé. Bí tani among sokke kumsunam uyu kídíem inyok nyokyinyé, delo mipile agí dungko amonglo duula bíme kumsuyé.

¹² Ruutum bí Sudan lokke ami kídí emkom siyindope iyé.

¹³ Ruutum bí bíkke ralnamem Assiria kídíem nyokmope ilíkyé. Bí Ninebi luunedem kumrom-bénrom doopomkope, delokke asi kamana yépolkope ipakmoyé.

¹⁴ Delo de tabung simon-silike, kebu-pettangke bampompe iyé. Mooruk pettune delokke loyit pettange delo kumrom kirki kídílo undula kujir-jiryé. Paak kídíe ekum ebang kídílo akgoyé. Luune delokke ekum kídílo sidar esing ilíknam kídíe angíne beséryé.

¹⁵ Dekepe agíke ralnamlo míngkím suna, delokke aiyindung emla míísuna luunede roori-taki iyé. Delo duuna ami kídíde buluke luune dem tani amo sokke botte yalumne emla míngkím sudung. Kapena bénla byakruknam, ingkolodí moonamke simon-silie duuno sukuko amongkope de iyékune! Delok ampeng delok gína ami kídí takame peso-rían lok santun geyé.