JEMS 5 - DEENA BAIBÉL (BSI)

Miremsobo Kídí Legape Lutosubiname

¹ Supak mirem kídí nolu tatbeng sutola, nolukelo aapena ebín esong legape buulíng kaplíng getola.

² Noluke mireme yaapakkai, delokke noluke ege galugem takíde doyin tobong.

³ Noluke uun areme ínpakdung. Buluke ínnamdei nolum lengkan sudung delokke eme kísape noluke adínem dodung. Nolu yéyin longe kepemin sérangem mekumtune.

⁴ Tatsutola! Noluke hajirang biramnam noluke arígem ibina amikídíe nolum akla kabbomdung. Ali yidbina kídar lokke kapname Ralna Shédíke nyorunglo píídung.

⁵ Tani gíídaso noluke yéname kampo tayyo, shénam monam mílípe ito. Nolu nyokdíku longe delok kepe agísue leemo sudung.

⁶ Nolu deesuna, nolum iyan sumana amiem díngka mokato.

Duuk Adírem Jémgename

⁷ Demílo bíro kídía, Ruutumke angkuma tetengem donggap getoka. Kénsu langka, arík inekom aríklok aina ali ayé lenpenam legape edítko gédí donggup pedong legape yémgapla toyadun!

⁸ Nolukom, ralnampe donggap bomtoka, kapeila Ruutum bí aadak kubong.

⁹ Bírokídía, nolu akone akonem lukí pokí sumapeka, depe imílo nolum bisaryéku. Bisarna Ruutumde lamgélo daggu dubong!

¹⁰ Bíro kídara, adírduem luyii sunape, Ruutumke agomem pogebina, kaalu kangorna kídíke jémgap genamem míngkítoka.

¹¹ Séko bulu mínggap dudí ngolu bulum gérne emla míídung, dem nolukom kénsudung. Nolu Jobke donggap namem tatto, delokke méélam yalumdelo Ruutum bí ingkuem bitodí dem kaasuto. Ruutum bí ayang kaapa sunako delokke yaasamnako.

¹² Bíro kídía, teyong yalumpe podung, nolu pésu mapeka. Teyong amín pekom, rumkíng amín pekom demangkom atíkon amínlok dokom pésu mapeka. Noluke tolík namem “Todung” delokke tomanamem “Tomang” emsémtoka, demamílo nolu bisar kosuyé.

Míngkesula Kumname

¹³ Noluke aralo adírnako kadudí? Bí kumsupe aido. Delokke ayokone ashéng dumílo bím yidgenam miriem lumotoka.

¹⁴ Noluke akone kinako kadudí? Bí mondoli lokke abu abíngem tomsula kumsula delokke Ruutumke amínlok tél nyongko sula ipe aido.

¹⁵ Delo míngkesula kumlík name kina amidem aimoyéku, Ruutum bí bím gerep moyéku. Bí paab itumílote, dem maab biyéku.

¹⁶ Delok legape akone akonlo agí paabem ponkan sulangka demílo nolum ipíyéku. Deena ami kumnamde airupe ralnam kala agér bidung.

¹⁷ Elijah bí dekena amikuai. Bí pedong omarudope mínggapla kumname, arope amoso tagum kolang poolo akkéko pedong oyimato.

¹⁸ Lekoda bí kumkuname, talenge pedong okaku delokke amoso ali ayé lenkaku.

¹⁹ Ngokke bírokídía, noluke akone arolokke gípek sulennako kadumílo bím akonpe langaangkupe aido,

²⁰ delokke sim mínggap gelangka; séko paab gena amiem bíkke imem bedang lokke langaang dungkudí, bí sipe kolokke mosing dungku delokke deddína paabem menyok bidungku.