JEMS 4 - DEENA BAIBÉL (BSI)

Tani Amongem Ajuuname

¹ Noluke aralo ingkuei lumín manmín sumodune? Dekepe nolum ebín mínsu monade noluke mííbo kaabo aapílok lenmanía?

² Nolu atídem míídungai idola dem paamang, dekepe ila nolu petlídung; nolu atíem kaabue séngéé dungai, ilate nolu ingkuem míídudí dem paamang dekepe ilamin nolu lumín manmín sudune. Nolu ingkuem míídudí dem paamang kapeila nolu Shédíkelok dem paape emla komang.

³ Nolu koyémte paamang kapeila nolu atímana agíke sénam legang petompe kodung.

⁴ Míngke pííramna amikídía, tani amosokke angong arumde Shédíkelo mirue, dem kénmanía? Séko bulu tani gíída sokke angong arumem mííbadudí bí Shédíke mirupe ine.

⁵ Demangkom emmumpe ngolukíng duumín gena aidde nesu posu aapí gemodung.

⁶ Idakkom bí ngolum bojépe yanggongem bidung. Delok legape Dooying kitabe podung: “Shédí bí yidsunem akdung idakkom yanggongem mínggíp sunalo bidung.”

⁷ Demílo agísuem Shédíkíng mebi sulangka. Uyuem tolya sutoka, delo bí nolu kelokke duggeyéku.

⁸ Shédíkíng aníntoka, delo bíte nolukíng anínyé. Paabna kídía noluk alagem subín sutola, delokke aapí annyi gena nolu, noluk aapíem pídéé suto langku.

⁹ Kaplíng buulíla duuk ankí getola. Noluke ngilnamdem, noluke shénamem ankí kenope yége tolangku.

¹⁰ Ruutumke keralo agísuem míímé suto langku, delo bí nolum bomonyé.

Kristan Bíruem Bisar Ibosupe Maname

¹¹ Bírokídía, lukaa bosu mapeka. Séko akonem lukang luyééla demang kom bím bisar dudí de amide ayonem aksudung delokke bisar idung. No edílo ayonem bisar dudí, dem igena amipe imang, idola bisarna amipemin idune.

¹² Ayon bina delokke bisarnade atelko, turnam emte turmo ladung delokke nyoknam emte nyokmo ladung. Idakkom noluke donggongem bisar isupena kídí nolu séko?

Míngkímde Ipemaname

¹³ “Silo demangkom nyampo ngolu so demangkom delo taon borona delo gíla dítagko pesikoret ila murkong poisar italaju” emna kídí nolu tatgaptola.

¹⁴ Kapeila nolu nyampo kape iyédí demte kénsumane. Noluke turnamde ingkue? Nolu anyongo legape duuna delokrongem menape nyokkuna aapam kísane.

¹⁵ Dempenem nolu, “Si Ruutumke míísang emílo ngolu duula dekedem iyé,” empename.

¹⁶ Idakkom nolu supak míngkímsula, yidsula idung. Sikepe míngkím sunam takamde atímane.

¹⁷ Séko bí bíkke aina agér ipenamem kénsudola delokke dem imape idudí bí paab ine.