JEKHARIAH 6 - DEENA BAIBÉL (BSI)

Guré-gaari Appiko Kaarí-kaanyolo Kaaname

¹ Ngo lekoda kangonsula kaatoname pitolpe ina dííte annyi pénsam kologe guré-gaari appiko duglen dope kaato.

² Kerangke guré-gaari deme sona guré kídíde yalíng neke, annyinana kede yorang neke,

³ angumnana kede yasing neke, delokke appinana kede atak-arak ina guré kídíeke.

⁴ Delo ngome luposuna teyong kotoki deme ngo íngkíto, “E ngok ruutum, sikesi ingkueda?”

⁵ Bí ngome pobido, “Sikesi asar appie; bulu tani among takamke Ruutum ke keraloge supakpak píídung.”

⁶ Yorana guré kídí sobomnam guré-gaaride Babilonlok línggíng amongpe, yasina guré kídí sobomnamde anggodan amope, delokke atak-arakna guré kídí sobomnamde sokkodan amope endak.

⁷ Edílo atak-arakna guré kídíde gílen todí, delo bulu gíla, tani amongem kanggoodope yagorupe erla irepkai. Delo teyong kotokide bulume lulígto, “Nolu tani among tabulo gígongla kanggo langka.” Delo bulu gíkai.

⁸ Delokrongem teyong kotokide ngome gogtoola podo, “Babilonlok línggíng amope gína guré kídíde Ruutum ke marnamem imaptoku.”

Joshuame Roja Dumlup Luplíkdope Ukumname

⁹ Sikepe Ruutumke agome ngokkíng pííto:

¹⁰ “Monnyoknam Heldai, Tobijah, delokke Jedaiah buluke binam aman kídíem bomla Jephaniahke oo Josiahke ekumlo menape gílangka. Si ami kídí si Babilonlo monnyok líkkolok píídungku.

¹¹ Buluke aman binam delokke baldín loklang uun kídar deloge dumlupko píla, Jehojadakke oo, miri írne Joshuake dumpolo lublík langka.

¹² Depe ipala Maglíngke Ruutum bí, ‘Aag emnam amide bíkke yéko amonglo siirepyé, delokke Ruutumke Kumkeng Ekumdem anípe morepyéku.

¹³ Bí moko aropakpe Ruutumke Kumkeng Ekumdem mokupene. Bí kímte-remte rupe roja palenglo duula, ami kídí teyolo ruutumpe iboyé. Miriko bíkke paleng ampeng delo dakyé, delokke roja delang miride eetetpe yénam legapelang lekí-leko bosunamem agérpe gérbosuyé,’ emdung emla bíme polangka.

¹⁴ Dumlubde Heldai, Tobijah, Jedaiah, delokke Jephaniahke oo Josiah bulume míípa suyarnana atokope Ruutumke Kumkeng Ekumdelo duuyaryé.”

¹⁵ Mootengoolo duuna ami kídíe píídumsuyé, delokke Ruutum ke Kumkeng Ekumdem mokukolo igulyé. Dekepe Kumkeng Ekumdem edílo moyinyédí, delo Maglíngke Ruutum bí ngome nokkíng lulíktung emla no kénsuyé. Delokke si takamsi, Ruutum nokke Shédíke lulígnam kídíem no apíírupe igeyémílo, arope ilíkyé.