JEKHARIAH 14 - DEENA BAIBÉL (BSI)

Ruutum ke Aanamelang Ruutumname

¹ Ruutumke longeko píídak, delo longe delo Jirusalem nome língaala, nokke amig kangkolo líínam atoem orpan sunamem no kaasuyé.

² Jirusalemme mimak iyabomdope ngo opín takamem dumsumoyé. Delo doolungdem bulu laala ekum kídí takamem língaala mime kídíem ipusilééla, doolung delokke arotkonem mibo amonglo monnyokyé, idola delokke kékonem doolung delok bomkumayé.

³ Kerang yétonam longe kídí kísape, delo Ruutum bí dem opín kídardem mimak imín sudope gílenyé.

⁴ Delo longe delo Jirusalemke sanggodanke Olib Díítum delo Ruutumke ale tuayé. Delo Olib Díítumde sanggo lokke ila anggoloope, annyikope barpan sula pénsam delo botteruna gééjongko kayé. Díítum delokke arotkonde línggípe ngétsaayé, delokke arotkonde sokkope ngéttokyé.

⁵ Nolu ngokke gééjong delok duknyok geyé. Gééjongde Ajel loope iríyé. Delo longe delo, Judah lokke roja Ujjiahke longelo taron tonduem kapekísa nolu duggetodí, delok kísape nolu duggeyé. Delo Ruutum ngokke Shédí bí, teyong kotoki takamem gíbola aayé.

⁶ Delo longe delo angun kamayé, ansing pete mayé, delokke aapam kote kamayé.

⁷ De longede Ruutumke kénsunam angu ngupakna, longe aro kumang yoh aro kumang, yuemte angunna longekope iyé.

⁸ Delo longe delo turnam bina asie Jirusalemlok biilenyé. Asi delokke arotkone Sina Siyénglo, delokke arotkone Among Raadang Siyénglo biilíkyé. De dígín-díyupe dítak rubungem biitíyé.

⁹ Delo longe delo Ruutum atel petom iyé, delokke bík amín petomde kayé, kapeila Ruutum bí tani among sokke rojape iyé.

¹⁰ Delo Jirusalem sokkoke among Geba lokke ila Rimmon loope, Arabah kísa yiibeyé. Idola Jirusalem doolungde takam amongem kedon yayé. Doolungde Benjamin yapgo lokke ila kerangke yapgo aku kako kéényung yapgo loope ilíkla, Hananelke kedonna líísak ekum lokke ila roja erang kídíke onggur alang kétpom loope irílíkyé.

¹¹ Jirusalemde delo eetet-monetrupe duulang kula, amie parlangkula edílokom nyokyimayé.

¹² Jirusalemme mimak iyabomna opín kídí tabulo si kilii-ramli kídar si kayé: Buluke turdungemte buluke adín kídíe yaalenyé. Buluke amig kídíelang nabbél kídíe yaayé.

¹³ Delo moodí delo, Ruutumbí ami kídí tabungem akén-ayén moyimape imola, ami kídíe kangkén-tayyén yimape ibosula anínpe dakbosune momín sula, pamín sula ibosuyé.

¹⁴ Jirusalem legape Judah ekom miruem mimak imínsuyé. Delo bulu miru opín takamke uun kídíem, baldín kídíem, delokke ege-badu kídíem ginggo pakpe giiyé.

¹⁵ Sikena reyubnam kilii-ramliko, miru kídíke guré kídílo, uut simon kídílo, delokke gado kídílote kayinyé.

¹⁶ Dekepe irongem, mimak iyala Jirusalem me aabomna ami kídí lokke singong kídíe dítak moodí-moodíem Jirusalemlo gísaala rojape ina Maglíngke Ruutumme kumsukape, delokke Ippo Doman Adeng-apeeme ikape emla gíbom bomtíyéku.

¹⁷ Delo ingko opíne Maglíngke Ruutum Rojame kumsukape gímayédí, buluke amonglo pedonge obimayé.

¹⁸ Ijipt ami kídíe saala lekí-siko agér-anamlo ibosumayémílo, bulu pedongem paamayé. Ippo Doman Adeng-apeeme imín gemana kídí teyolo ingkona kilii-ramliem Ruutum bí ruulík dudí, dekena kilii-ramliem buluke teyolote ruulíkyé.

¹⁹ Ippolo Doman Adeng-apeeme ibosumana opín takamlolang Ijipt ami kídílo sikena itung-iré kídíe pííyé.

²⁰ Delo longe delo, guré kídíke kolong kídílo, Ruutum KEPE DEENE emnam agomem palíkyinyé. Ruutumke Kumkeng Ekum lokke dama, peking kídí takame, deena runggu keralo metínam deena egug kísa deena ekurangpe iyinyé.

²¹ Jirusalem kelang Judahke dama peking tabude Maglíngke Ruutumke keralo deena ekurape iyinyé. Ipak ipe emla aana tabude deena peking kídílok apim monayé. Delo longe delo Maglíngke Ruutumke Kumkeng Ekumlo pesi koret ina amie kayimayé.