JEKHARIAH 1 - DEENA BAIBÉL (BSI)

Ruutum Kíng Aalat Sudokupe Tomname

¹ Parsia among lokke roja botte Dariaske dítak annyinape roja dodo delokke poolo píínyinana delo Berekiahke oo, delokke Iddoke oten kaalu miri Jekhariah kíng Ruutumke agome sipe pííto:

² “Noluke buku kídí teyolo Ruutum bí yagorupe marto.

³ Dekepeila ami kídíem sipe polangka: Maglíngke Ruutum bí sikepe podung, ngokkíng aalat sutokula, delo ngokom nolukíng aalat suyéku.

⁴ Kerangke kaaluna miri kídíke lugong gebinam, noluke abu kídar kísa imapeka. Bulu sikepe poto, ‘Noluke atímana bedalok gílat sulangkuka, delokke noluke aimana séguem mepala míílat sulangkuka.’ Idola bulu ngokke agom-aangem aipe tatgap bimato, delokke lugíluko tatmato. Sikepe Ruutum bí polendung.

⁵ Supak noluke buku kídíe íngkolo? Delokke kaaluna miri kídíe turyarla yédunía?

⁶ Idola ngokke kaalu miri kídílo ngokke lulígnam ludong kídíemlang agom kídíem noluke buku kídíe igemang kolok bulu adírem paamatonía? Delo bulu aapí míílat sulangkula sikepe lubo suto, ‘Arorupe ngoluke atímana ségu kídíelang agér-anam kídíe airumape ikolok, deke delokke areme Ruutumke ruunampe ngolu paadungku.’ ”

Kaalu Mirike Kaarí-kaanyolo Guré Kídíem Kaaname

⁷ Dariaske dítak annyinape roja dodo delokke poolo íying kolang atel, Shebat poolo delo Berekiahke oo, delokke Iddoke oten Jekhariah kíng Ruutum ke agome yohlo kaarí-kaanyope pííto; delo Jekhariah poto,

⁸ “Ngo amikonem guré yalína kolo dukdope kaato. Bí dukla jétuka esing kako yiibe kolo dakkai. Bík méélam delo yalína, yamona, delokke yalunna guré eke kado.

⁹ Delo ngo íngkíto, ‘E ngok Ruutum, sikepe morí kana guré kídí legasi ingkuedí?’ “Delo ngom luposuna teyong kotokide sikepe poyansudo, ‘Sikesi ingkuedí dem nom ngo supak lengkanyé.’

¹⁰ Delo jétuka esing kídí ara delo dakna amide, ‘Tani among sokke rego kéényunglo kanggoodope Ruutumke lulígnam kídíe bulu,’ emla popaado.

¹¹ “Delo bulu jétuka esing kídí aradelo dakna Ruutumke kotoki delo, ‘Ngolu tani among rego kéényung takamlo kaayin goola kaaname, tani among tabusi eetet-monetrupe apééla duudung,’ emla legí-sigang kídíem popaatoku.

¹² Delo Ruutumke kotokide poto, ‘E Maglíngke Ruutum, no Jirusalem teyolo lang Judah kídíke teyolo dítak íying kínídko aklíla martíbomto. Nokke ayang díku longe píngku mangadape edít longe koda marpoyéne?’

¹³ Delo ngome lupo suna kotoki deme Ruutum bí ai-kampo remelna agomlok lupo poyan suto.

¹⁴ Dekepeila ngome luposuna kotokide ngome poto, ‘Maglíngke Ruutumke agomem sikepe pokan goolangka: Ngo Jirusalem kelang Jayonke legape ankí aloodung.

¹⁵ Idola eetet-monetrupe duuna abíd opín-buang kídí legape ngo marlíng aloodung. Kapeila ngok ami kídí teyolo ngok marlíngem anyongko jémgap sudungem, si opín-buang kídísi ngokke ami kídíke adírem mangkemya moto.’

¹⁶ “Dekepeila sikepe Ruutum bí podung: ‘Ngo Jirusalem teyolo asampe ayangkupe aalat sudungku. Ngokke Kumkeng Ekum dem morepyéku, delokke luune sime anípe morepyéku.’

¹⁷ “Pakyape no sime pogoolangka: Maglíngke Ruutum bí sikepe podung: ‘Ngokke doolung kídíde lekoda jéla-remla iyéku, delokke Ruutum bí Jayonme ayang langkula Jirusalemme ullen suyéku.’ ”

Kaarí-kaanyolo Reebung Appiko Kaaname

¹⁸ Delo ngo kaadu sula kaatoname reebung appiko kaato.

¹⁹ Delo ngom luposuna kotoki dem, “Sikesi ingkueda?” emla íngkíto. Bí ngome, “Sikesi Judah, Jirusalem delokke Israel ami kídíem apit-ayit idope tubbyakna taleng kuppo sokke ralname,” emla pobido.

²⁰ Delo Ruutum bí ngome esing mistri midum appiko martul bomdupe lengkanto.

²¹ Delo ngo íngkíto, “Bulu ingko koda ipe emla aadune?” Bí poyansula sipe poto, “Judah em dumponge ngérep yilamadupe ipit-iyitna opín-buang kídíem, peso-ríanmola nyokmope emla bulu aadung.”