ISAIAH 9 - DEENA BAIBÉL (BSI)

¹ Idola ankí-kenolo yéna kídar legape adír longe kaimayé. Jebulun among emlang Naphtali amongem ankí-keno adírlok jonmo toku. Delok ayanpe yépenam longelo mibo-miyingke yébomnam Galil emla, Raadang Siyéng lok ila Jordan korong robelo duuna among takamem Ruutum bí yidnamem paamoyéku.

Angkupena Rojake Legange

² Kaamo aralo yégoona ami kídíe botteruna angunko kaapangkai. Sinam kobung kaamo aralo turla yéna kídílo angunko sangkai.

³ No opín-buangem bojémola, bulum yago yadope ashémoto Tanie ali-ayé isi-sasidi longelo ashénam kísa, Demangkom ikumnam miru kídíke sérangem amie orpan suyém ashénam kísa, bulu nok keralo ashéng gekai.

⁴ Nok ami kídíeme irítnana arem banggénem, gordulo jonggenam baare esingem, eget tebekruna jungolipe getínamem, Midian kídíem ikumdí longe delok kísa no ato takamem nyokyin moto.

⁵ Mimaklo gínana leyug takamem, iyyi bitjénam ege takamem emelo guyin moyéku.

⁶ Kapeila ngolukíng koo ko otung! Ngolume oo ko bitung! Bí takam ruutumem yége bomyéku. Bíme, “Míírí-míínyona, Kénna-paana, Luyilna, Ralyayalumna Shédí, Turyarna Abu, Aapí eetet bona Roja Oo,” emyé.

⁷ Bíkke amonge goobyakla aapí eetetpe yéname yéyindí kaimayé. Bí Dabid rojame yétítnape ila, bík yétalo yéyar bomlangkula, agér-anamem deenamrupe ila, ilenlok ila, iyarbomyé. Ralyayalumna Ruutum ke ername sike takam sim apíídope iyé.

Ruutum bí Israelem Irééyéku

⁸ Ruutumbí Jakob ke otíng-oyin Israel kídílo, bíkke aklíla kebang lunamem lulento.

⁹ Israelke takam amie lang Samari doolung luunelo duuna takame, bíkke sikepe agér inamem kaayin-kényinyé. Supak bulu míngkímsula miképpe idung.

¹⁰ Bulu sipe mandung, “Líísak ekume oletkai, idola ngolu delok ayanpe elíng lok ekumem moyéku. Sikamor esing lok gaangem palet yinto, idola ngolu delok ayanpe gairuna sidar esing lok ilíkyéku.”

¹¹ Ruutum bí, buluke miru kídíem mirolpe rollen mola, bulum mimakpe aamoyé.

¹² Sanggodanlo Siria ami kídíe, delokke anggodanlo Philistia ami kídíe, Israelem dope emla nappange koyakai. Dekepe idagakom Ruutum ke aklíde kadan teteyé. Bíkke alage itung-irépe leedu tete bomyé.

¹³ Idola Ralyayalumna Ruutum bí bulum itung-irélate ami kídíe aapí míílat sulangkula, bíkkíng aalat sukumang.

¹⁴ Depeila Ruutum bí Israel ke dumpong emla taméem, delokke kejur aagemla dolbumem lootel lok pabínyé.

¹⁵ Miro kídíe lang milum kídarde dumponge, yatgona miri kídarde tamée.

¹⁶ Sim ami kídí sim gímem bonade bulum yébone, delokke yébona kídí de kobulo olet bodung.

¹⁷ Mipil nappange deemana agomlo potí kolok, mipile Ruutumke kaabape yémape atímape yétínam legape, meyéng kídí emlang ane-abu kaimana ome-oo kídíem, delokke mimum-yaamé kídílo Ruutum bí ayayimayé, delokke ashéng bomyimayé. Dekepe ila, Ruutum ke aklíde kadan tete bomla, bík alage itung-irépe leedu tete bomyé.

¹⁸ Tang kana esing pasumem guna eme kísape, ami kídíke atímange idung, delokke delo moonam delo yagorupe emepe gula, delokke míkkíe kaatak-kaayak yimadupe uusadung.

¹⁹ Ralyayalumna Ruutum ke marnam legape, bík ingéngname among takam deme emepe gubomdung, delokke ami takam dem gunyok bomdung, delokke takame agí-agí legape míísuto.

²⁰ Rego-mipílo amie dopa-tíípamape, donam paanam anyo demte dokér-doyérsula dolate akii dodarpe dopamang. Bulu agíke ome-uemte dosu dubong!

²¹ Manasseh kelang Ephraim ami kídarde pamín-níkmín sugeyéla, lekope bínyi Judah amiem mimak ibomdung. Dekepe ilate Ruutumke aklíde kadan tete bomla, bík alage itung-irépe leedu tete bomyé.