ISAIAH 61 - DEENA BAIBÉL (BSI)

Ruutum ke Ipítdí Longe

¹ Ruutum Shédíke Aide ngokkíng dung, kapeila opanlo tatpona ngiitomem sigdope, Ruutum bí ngom pídéto. Aapí míídírna kídíem ashéng dokupe, umnam kídíeme melen kunam agomem pokan bidope, delokke pateklo duuna kídíem, laalen dokupe;

² Ruutumke ayadí longe emlang miru teyolo Shédíke edo radíkuem, pogong bidope; duuk-adírla kapna-ríína kídíem ngiido kupe,

³ delokke Jayonlo ankí-kenona kídíem ngiila; metbu ayanpe appun lungguem bidope, kapnam-ríínam ayanpe ashénge idokupe, delokke usigai emla aapí dukrupe míngkolo yidge dokupe, bí ngom melíkto. Agíke angun-abéem lengkan dope, Ruutumke alag sulok leyin sunam deena esing kídíe emla bulum takame poyinyé.

⁴ Konnying-mennyingkai kumrukpe ina, nyokyin langkula doorom kuna, siirum siirum loope atmík goonam, doolung aku kídíem, bulu anípe mosaa langkula, kampo-tatporupe, ilang kula turyin moyéku.

⁵ Mibo-miying ami kídíe noluke mér kídíem kaabomla, noluke arík kídí lolang onggur ríkséng kídílo agér ibiyéku.

⁶ Delo nolume, ngoluke Shédíme agér ibina kídíe, delokke, Ruutum ke miri kídíe, emla man-yinyé. Opín takamke mirem teyolo, nolu dola-tííla yéyéku, delokke buluke mirem teyolo, nolu míngkím suyéku.

⁷ Buluke annyingnam ayanpe, ngok ami kídíe adu annyiko paayéku, delokke ayang luyulo yénam ayanpe, yébom kunam ekuseranglo ashéng yéku; Dekepe buluke asi-amongem bulu, adu annyi kope dobom langkula, agínpe ashéname bulukíng kayaryé.

⁸ Kapeila Ruutum ngo, pénsam bedangem matala, paab emlang mili-hodong agérem kangkinako. Ngokke agomem mesing ayar sula, bulukíng duuyarpena daapongem ibosula, ngo amanem bulume biyé.

⁹ Opín takam keralo, buluke otíng-oyinem kényinyé, delokke bulu amín kayé. Bulum kaana takame, Ruutumke utepooro ruulíknam ami rungeke emla arope mínggeyé.

¹⁰ Ngo Ruutum kíng yagorupe erdung; ngokke Shédí kíng ngokke aide ashérudung. Kapeila turnam egelok bí ngom pítlíkto, delokke deena lukdorem, kape kísa nyamranlo makboe amílem mokím sudakdí, delokke nyamenge lunggu-tadok gedudí, delok kísa bí ngom imoto.

¹¹ Kape kísa kédénge ali-ayéem garlen modudí, delokke kape kísa gíídang etor baarilo oying amí kídíe garsa dudí, delok kísape Shédíbí deenam emlang yidnamem, opín-buang takam keralo kalen moyé.